ufuġ 40 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

tazdġt n‑sidi rbbi

^17-18 ass izwurn ġ‑wayyur izwurn ġ‑wis sin isggʷasn [tigira n‑mad‑ffuġn miṣr] a‑ġ‑issbidd musa ah̬iyyam n‑tzdġt n‑rbbi. ig‑as tifggigin‑ns d‑tannalin‑ns, ig‑as tigusin d‑isutar‑ns.

¹⁹ ifsr asddul isdidn f‑iggi n‑uh̬iyyam, ig ilmma fllas asddul iḍnin, ġmklli‑t‑yuṣṣa sidi rbbi.

²⁰ yasi‑d tilwaḥ n‑tuggʷa, isrs‑tnt ġ‑ṣṣnduq. izzri ikurayn ġ‑ih̬urṣan n‑ṣṣnduq, isrs ilmma fllas ‹addal n‑rrḥmt›.

²¹ išškšm ṣṣnduq s‑uh̬iyyam, yagʷl lh̬amiya ma‑issntaln ṣṣnduq‑an n‑tuggʷa, ġmklli‑t‑yuṣṣa sidi rbbi.

²² izayd musa ig‑n ṭṭabla ġ‑ugʷns n‑uh̬iyyam ġ‑brra n‑lh̬amiya ġ‑tsga lli‑iwalan ššamal.

²³ isrs‑n fllas aġrum ġmklli‑t‑yuṣṣa sidi rbbi.

²⁴ isrs‑n lḥska ġ‑ugʷns n‑uh̬iyyam ġ‑isiwala n‑ṭṭabla ġ‑tsga lli‑iwalan ljanub.

²⁵ issrġ‑n gis lqnadl ġ‑umnid n‑sidi rbbi, ġmklli‑t‑yuṣṣa sidi rbbi.

²⁶ ig‑n tisi n‑uwrġ ġ‑ugʷns n‑uh̬iyyam ġ‑lgddam n‑lh̬amiya.

²⁷ ibh̬h̬r ilmma gis s‑tujjutin mimnin, ġmklli‑t‑yuṣṣa sidi rbbi.

²⁸ yagʷl asntl ġ‑imi n‑uh̬iyyam.

²⁹ ibnu tisi [n‑wanas] i‑tġrṣiw jdrnin ġ‑brra n‑imi n‑uh̬iyyam. issattuy ilmma fllas tiġrṣi ijdrn d‑twafka n‑imndi, ġmklli‑t‑yuṣṣa sidi rbbi.

³⁰ isrs ṭṭas imqqurn ġ‑gr‑uh̬iyyam d‑tisi n‑tġrṣi, iɛmmr s‑waman n‑irid

³¹ a‑zġ‑gis‑isirid musa d‑harun d‑tarwa‑ns ifassn d‑iḍarn‑nsn.

³² ar‑siridn ġakud nna‑kšmn s‑uh̬iyyam ula ġakud nna‑n‑akmurn s‑tisi n‑tġrṣi, ġmklli‑t‑yuṣṣa sidi rbbi.

³³ iskr musa rrff, isutl i‑usarag lli‑ġ‑illa‑uh̬iyyam d‑tisi n‑tġrṣi, yagʷl asntl f‑imi n‑usarag. ġmkan a‑s‑ikmml musa tawuri‑an.

³⁴ imatti‑d‑umdlu ġakudan, idl ah̬iyyam‑an n‑umnaggar, iɛmmr lmajd n‑sidi rbbi tazdġt‑an.

³⁵ ur‑iẓḍar musa a‑ikšm s‑uh̬iyyam n‑umnaggar, ašku ittrs‑fllas‑umdlu, iɛmmr lmajd n‑sidi rbbi tazdġt‑ns.

³⁶ zġ‑ġakudan tasawnt ġakud nna‑ityalal‑umdlu f‑uh̬iyyam, ar‑tzayadn ayt‑israyil f‑umuddu‑nsn.

³⁷ imma ġakud nna‑ur‑ityalal, ar‑tqaman ar ass nna‑ġ‑ityalal.

³⁸ kullu ma‑tmuddun, illa‑umdlu n‑sidi rbbi f‑uh̬iyyam ġ‑uzal, tili fllas lɛafiyt ġ‑iyḍ, ar‑t‑kullu‑ttmnad tamunt n‑ayt‑israyil.