ufuġ 4 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

timitar lli‑imla sidi rbbi i‑musa

¹ irar‑as ilmma musa: «walaynni ur‑ra‑sri‑sfldn mddn ula qbln awal‑inu. rad‑iyi‑inin: ‹ur‑ak‑d‑iban rbbi da‑bdda‑illan.› »

² isqsa‑t sidi rbbi: «ma‑illan ġ‑ufus‑nk?» yini‑as: «aɛmud».

³ yini‑as: «gr‑t‑in f‑wakal.» igr‑t‑in ġakudan f‑wakal, s‑iwrri iga algʷmaḍ, irwl musa zġ‑gis.

⁴ izayd sidi rbbi yini i‑musa: «mdi‑n afus‑nk tamẓt‑t ġ‑tmġilt‑ns.» imdi‑n afus‑ns ġakudan yamẓ‑t, s‑iwrri iga aɛmud ġ‑ufus‑ns.

⁵ yini‑as sidi rbbi: «ġmkan a‑s‑ra‑k‑amnn is‑ak‑d‑iban rbbi da‑bdda‑illan, iga‑t rbbi n‑id‑babatsn ibrahim d‑isḥaq d‑yaɛqub.»

⁶ isawl‑d daġ sidi rbbi yini‑as: «šškšm afus‑nk s‑uḥbiš n‑tmlsit‑nk.» išškšm musa ġakudan afus‑ns s‑uḥbiš‑ns. lliġ‑t‑id‑issufġ, hati ijdm, iwrri imllul zund adfl.

⁷ izayd rbbi yini‑as: «rar afus‑nk s‑uḥbiš‑nk.» irar afus‑ns s‑uḥbiš. lliġ‑t‑id‑daġ‑issufġ, hati iwrri ilm ig ġmklli yadlli iga.

⁸ yini‑as rbbi: «iġ‑ur‑srk‑sfldn ula umnn‑k s‑tmatart tamzwarut, a‑ur‑imil amnn‑k s‑tis snat.

⁹ walaynni iġ‑ur‑uminn s‑snat‑tmitar‑ad ula sfldn s‑wawal‑nk, tasit‑d imikk n‑waman zġ‑wasif n‑nnil tffit‑tn f‑wakal iqqurn, s‑rad‑wrrin‑waman lli‑di‑tusit zġ‑wasif gn idammn f‑taġart.»

¹⁰ irar musa i‑sidi rbbi: «wa rbbi‑nu, ur‑giġ bu‑wawal, la ġayd izrin ula ġilad ġ‑tsawlt s‑uh̬ddam‑nk. hati iẓẓay ils‑inu, išqu flla ad‑sawlġ.»

¹¹ yini‑as sidi rbbi: «ma‑iskrn imi n‑bnadm? ma‑iskrn bnadm a‑ig aẓnẓum nġd aḍrḍur? ma‑t‑iskrn a‑yisfiw nġd a‑ibukḍ? is‑urd nkki a‑t‑iskrn, nkki‑ad igan wad bdda illan?

¹² zayd ġilad, nkki a‑ra‑iɛawn imi‑nk, mlġ‑ak ma‑ra‑tinit.»

¹³ imma ntta irur‑as: «wa rbbi‑nu, ġir azn kra n‑yan yaḍni.»

¹⁴ iġḍb sidi rbbi f‑musa yini‑as: «imma gʷmak harun gu‑lawi, ssnġ is‑issn a‑isawal. hatin ġilad ikka‑d aġaras a‑k‑id‑imnaggar. iġ‑k‑iẓra, ra‑srk‑ifrḥ.

¹⁵ zayd ar‑srs‑tsawalt kiyi, ar‑as‑tmalat iwaliwn ma‑ittini. rad‑tɛawanġ imi‑nk ula imi‑ns, ar‑awn‑malaġ ma‑ra‑tskarm.

¹⁶ ra‑isslkam iwaliwn‑nk i‑mddn, ig zund imi‑nk, tgt zund rbbi‑ns.

¹⁷ ra‑tasit aɛmud‑an ġ‑ufus‑nk ar‑srs‑tskart timitar.»

iwrri musa s‑tmazirt n‑miṣr

¹⁸ iddu musa ġakudan iwrri s‑dar‑uḍggʷal‑ns yatru yini‑as: «ġir adj‑iyi ad‑wrriġ s‑dar aytma ġ‑miṣr ad‑ẓrġ is‑sul‑ddrn.» yini‑as yatru: «zayd, a‑dik‑tmun sslamt.»

¹⁹ isawl‑d sidi rbbi s‑musa ġ‑tmazirt‑an n‑midyan yini‑as: «zayd twrrit s‑miṣr, ašku willi‑k‑isiggiln a‑k‑nġn, hatni mmutn.»

²⁰ yawi musa tamġart‑ns d‑tarwa‑ns issni‑tn f‑yan‑uġyul, iwrri s‑tmazirt n‑miṣr. yasi dids aɛmud n‑rbbi ġ‑ufus‑ns.

²¹ yini daġ sidi rbbi i‑musa: «iġ‑n‑truḥt s‑miṣr, trart lɛaql a‑tskart ġ‑lgddam n‑firɛawn kullu lɛjayb lli‑giġ ġ‑ufus‑nk. walaynni hatin rad‑ssiqarġ ul‑ns. ur‑ra‑yadj mddn ad‑ddun.

²² zayd tinit i‑firɛawn: ‹ha ma‑inna rbbi da‑bdda‑illan. israyil iga iwi ifh̬ddi.

²³ nniġ‑ak, rẓm i‑iwi a‑yyi‑itqasa. iġ‑tagʷit ad‑as‑trẓmt, ha‑yyi rad‑nġġ ifh̬ddi‑nk.› »

²⁴ lliġ nsan ġ‑yan‑udġar ġ‑uġaras, imnaggar‑t sidi rbbi iskr f‑a‑t‑inġ.

²⁵ taf ṣifura yan‑uẓru n‑uznad, tbbi ilmš i‑yus, tggr‑n srs i‑iwurzan n‑musa tini‑as: «s‑ṣṣaḥt, asli n‑idammn ad‑iyi‑tgit.»

²⁶ yadj‑t ġakudan a‑iddr. f‑ssibt n‑tẓallit‑an a‑f‑as‑tnna ‹asli n‑idammn›.

²⁷ inna‑yad sidi rbbi i‑harun: «ddu s‑lh̬la a‑n‑tmnaggart d‑musa.» iftu imnaggar‑t‑in ġ‑dar‑udrar n‑rbbi insallam dids.

²⁸ isawl musa i‑harun f‑kullu iwaliwn lli‑f‑t‑id‑yuzn sidi rbbi ula timitar lli‑f‑t‑yuṣṣa a‑tnt‑iskar.

²⁹ iddu ilmma musa d‑harun, ssmunn‑d kullu imġarn n‑ayt‑israyil.

³⁰ yini‑asn harun kullu iwaliwn lli‑s‑inna sidi rbbi i‑musa, iskr timitar ġ‑umnid‑nsn.

³¹ amnn mddn‑an. lliġ sfldn is‑d‑yuggʷa sidi rbbi s‑ayt‑israyil iẓr tadallit lli‑ġ‑llan, ssknun ih̬fawn‑nsn sjdn‑as.