ufuġ 34 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

tinbaḍin n‑lɛhd

¹ yini ilmma sidi rbbi i‑musa: «skr snat tilwaḥ n‑uẓru zund tilwaḥ zwurnin. ra‑gisnt‑araġ iwaliwn lli‑llanin ġ‑tmzwura lli‑trẓit.

² ḥiyyl i‑zikk ṣbaḥ, tġlit‑d zikk s‑udrar n‑sinay, tbiddt‑d ġ‑umnid‑inu ġ‑ih̬f n‑udrar.

³ a‑ur‑dik‑imun yan, ula iban yan ġ‑udrar kullut, ula ksant‑uwlli ula imugayn ġ‑tama n‑udrar.»

⁴ iɛdl musa snat tilwaḥ n‑uẓru zund tilli zwurnin. inkr zikk ṣbaḥ, iġli s‑udrar n‑sinay ġmklli‑t‑yuṣṣa sidi rbbi, yasi dids snat tilwaḥ n‑uẓru.

⁵ iggʷz‑d sidi rbbi ġakudan ġ‑umdlu, ibidd‑d dids, iɛlm‑t s‑ism n‑‹wad bdda illan›.

⁶ ġakudan a‑izri sidi rbbi ġ‑umnid‑ns ar‑yaqra yini: «wad bdda illan, wad bdda illan, iga rbbi da‑itḥnnun ar‑itrḥam, ur‑a‑izrab a‑iġḍb, tigat dars lḥnant izgan ula tayri idumn.

⁷ ar‑iskar s‑tayri izgan ġ‑wafḍan n‑mddn. ar‑itṣamaḥ i‑willi ʷh̬šnnin ula willi jlanin ula willi skarnin ddnub, walaynni ur‑ra‑tn‑yadj bla lɛqubit. ar‑itrara f‑lh̬ʷšant n‑lajdud i‑tarwa‑nsn ula tarwa n‑tarwa‑nsn, ar tis kraṭṭ ula tis kkuẓṭ tasutin.»

⁸ iḥarru musa iknu s‑wakal isjd

⁹ yini: «iġ‑flla‑trḍit a‑rbbi‑nu, ḍalbġ‑ak a‑rbbi‑nu a‑didnġ‑tmunt tilit ġ‑wammas‑nġ, wah̬h̬a qqurn ih̬fawn n‑mddn‑ad. ṣamḥ‑aġ f‑lh̬ʷšant‑nġ ula tijli‑nġ, tgt‑aġ d‑wink.»

¹⁰ yini sidi rbbi i‑musa: «ha‑yyi skrġ lɛhd, d‑rad‑skarġ lɛjayb ġ‑iẓri n‑kullu mddn‑nk, ur‑jji‑llint zund ntnti ġ‑ddunit kullutt ula ġ‑dar kra n‑uqbil yaḍni. kullu iqbiln lli‑awn‑sutlnin, rad‑ẓrn iskkirn n‑rbbi da‑bdda‑illan, ašku rad‑darun‑skarġ mad‑bahra‑issġuwḍn.

¹¹ «awyat‑stt ġ‑mayd‑s‑kʷn‑umrġ ġassad. han rad‑ṭṭayġ ġ‑lgddam‑nun ayt‑amur d‑ayt‑kanɛan d‑ayt‑ḥit d‑ayt‑fariz d‑ayt‑ḥiwi d‑ayt‑yabus.

¹² rarat lɛaql a‑ur‑tskrm kra n‑lɛhd d‑imzdġn n‑wakal lli‑s‑ra‑tddum, a‑ur‑iwrri ig taẓqqurt ityawmdayn ġ‑gratun.

¹³ h̬lwat ikʷrkar lli‑f‑a‑tbh̬h̬arn ntni, trẓm ifariwn lli‑mi‑knnun, tbbim tiggjda‑nsn n‑‹ašrah›.

¹⁴ a‑ur‑tqasam kra n‑rbbi yaḍni, ašku rbbi da‑mi ism‑ns ‹wad bdda illan› iga wad išqan f‑ma‑igan wins. s‑ṣṣaḥt šqiġ nkki f‑ma‑igan winu.

¹⁵ a‑ur‑tskrm kra n‑lɛhd d‑imzdġn n‑wakal‑an, a‑ur‑imil iɛrḍ‑awn yan gisn ġakud lliġ a‑qqrṣn ġ‑umnid n‑id‑rbbi‑nsn ar‑darsn‑tfsadn, tššm ula kunni zġ‑tġrṣi‑ns,

¹⁶ tawim‑d ula kra ġ‑istitsn i‑tarwa‑nun, ddunt ntnti ar‑tfsadnt ġ‑dar id‑rbbi‑nsnt, awint ula tarwa‑nun ad‑darsn‑tfsadn.

¹⁷ «a‑ur‑sar‑tskrm i‑ih̬f‑nun kra n‑id‑rbbi zġ‑maylli ifssin.

¹⁸ ġmklli‑kʷn‑uṣṣaġ a‑ra‑tzzraym lɛid n‑urh̬ṣiṣ. ssa n‑uwssan a‑ra‑tšttam arh̬ṣiṣ ġ‑wayyur n‑‹abib›, ašku ayyur n‑‹abib› a‑ġ‑di‑tffuġm zġ‑miṣr.

¹⁹ winu a‑iga kraygatt awtm nna‑d‑izwurn zġ‑waḥlig, kullu ifh̬dditn ġ‑lksibt‑nun ġ‑imugayn ula ulli.

²⁰ imma ifh̬ddi ġ‑iġʷyal, a‑ti‑tfrrum s‑yan‑ulqqaġ. walaynni iġ‑ur‑ti‑tfrim, trẓm amggrḍ‑ns. kraygatt ifh̬ddi ġ‑tarwa‑nun, a‑ti‑tfrrum. han a‑ur‑d‑yakmur yan s‑lgddam‑inu s‑ifassn h̬wanin.

²¹ sḍis‑uwssan a‑ra‑tth̬damm, imma wis ssa‑uwssan iga win‑usunfu, ig‑iyt azmz n‑tyuga ula win tmgra, a‑gis‑ttsunfum.

²² «tamgra tamzwarut n‑irdn a‑ġ‑ra‑tzzraym lɛid ‹win smmus id‑mraw n‑wass›. ula tamgra tamggʷarut n‑usggʷas a‑ġ‑ra‑tzzraym ‹lɛid n‑iḥšaš›.

²³ kraṭṭ‑twal ġ‑usggʷas a‑ra‑di‑tbiddadn kullu iwtman‑nk ġ‑lgddam n‑rbbi siditun da‑bdda‑illan, ig rbbi n‑israyil.

²⁴ ġ‑uwssan‑an ġ‑rad‑ṭṭayġ iqbiln ġ‑lgddam‑nun ssusɛuġ iwtta‑nun, ur‑ra‑yili ma‑n‑iḍmɛn akal‑nun, ġakud nna‑tawnm a‑tbiddm ġ‑lgddam n‑rbbi siditun kraṭṭ‑twal ġ‑usggʷas.

²⁵ idammn lli‑ra‑yyi‑di‑tssakmurm, a‑ur‑n‑didsn‑tgm aġrum iktin. a‑ur‑tssnsm tiġrṣi n‑lɛid n‑usurf i‑ṣbaḥ.

²⁶ awyat‑d ma‑ifulkin ġ‑lġllt tamzwarut n‑wakal‑nun s‑tgmmi n‑rbbi siditun. a‑ur‑tssnum ikru ġ‑ugʷfay n‑innas.»

²⁷ yini ilmma sidi rbbi i‑musa: «ara iwaliwn‑an, ašku s‑iwaliwn‑an a‑s‑dik‑skrġ lɛhd kiyi d‑ayt‑israyil.»

²⁸ ik‑n musa ġ‑dar sidi rbbi kkuẓ id‑mraw (40) n‑wass azal wala iḍ, ur‑a‑ištta ula da‑issa. yara ġ‑tilwaḥ iwaliwn n‑lɛhd lli‑igan mrawt‑tnbaḍin.

ar‑issmrġa‑uwdm n‑musa

²⁹ iggʷz‑d musa ġakudan zġ‑udrar n‑sinay, yasi‑d snat tilwaḥ n‑tuggʷa ġ‑ufus. lliġ‑d‑igguz musa, ur‑issin is‑iqama‑uwdm‑ns ar‑issmrġa zġ‑umnaggar n‑gras d‑sidi rbbi.

³⁰ harun d‑kullu ayt‑israyil, ġ‑lliġ‑n‑mnadn, ẓrn udm n‑musa ar‑issmrġa, iksaḍn ur‑ẓḍarn a‑n‑srs‑akmurn.

³¹ iġr‑asn musa ġakudan, yašk‑id dars harun d‑kullu imġarn n‑tamunt, isawl didsn musa.

³² akmurn‑in ilmma kullu ayt‑israyil, iɛawd‑asn kullu ma‑f‑t‑yuṣṣa sidi rbbi ġ‑udrar n‑sinay.

³³ lliġ ikmml musa iwaliwn‑ns, ig yan‑waddal f‑uwdm‑ns.

³⁴ ġakud nna‑ikšm s‑umnid n‑sidi rbbi a‑dids‑isawl [ġ‑uh̬iyyam n‑umnaggar], ikks addal‑an ard‑d‑iffuġ. ġakud nna‑d‑iffuġ, ar‑d‑isslkam i‑ayt‑israyil ma‑f‑t‑yuṣṣa sidi rbbi.

³⁵ ġakud nna‑d‑iffuġ, ar‑ẓrran ayt‑israyil udm n‑musa ar‑issmrġa, irar ġakudan addal f‑uwdm‑ns ard iwrri ikšm daġ a‑isawl d‑sidi rbbi.