ufuġ 33 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

¹ yini ilmma sidi rbbi i‑musa: «zayd kiyi d‑mddn lli‑di‑tssiwnt zġ‑wakal n‑miṣr, tawnm zġ‑ġid s‑wakal lli‑f‑ggulliġ i‑ibrahim d‑isḥaq d‑yaɛqub iniġ‑asn: ‹ra‑t‑fkġ i‑wamud‑nun.›

² ha‑yyi ra‑n‑aznġ yan lmalak ad‑awn‑izwur, ṭṭayġ ayt‑kanɛan d‑ayt‑amur d‑ayt‑ḥit d‑ayt‑fariz d‑ayt‑ḥiwi d‑ayt‑yabus.

³ zaydat tawnm s‑yan‑wakal lli‑ġ‑ingi‑ugʷfay d‑tammnt. walaynni ur‑rad‑iliġ nkki ġ‑wammas‑nun, a‑ur‑imil fnuġ‑kʷn ġ‑uġaras, ašku mddn mi iqqur ih̬f a‑tgam.»

⁴ lliġ sfldn mddn i‑wawal‑an išqan, ṭiyr‑asn bahra. adrn i‑ih̬f‑nsn, ur‑sul‑lsin kra ikʷlan.

⁵ ašku inna sidi rbbi i‑musa: «ini i‑ayt‑israyil: ‹mddn mi iqqur ih̬f a‑tgam. han mra is‑iwnġ ġ‑wammas‑nun ġir yat tasaɛt, ra‑kʷn‑fnuġ. ġilad kksat ikʷlan lli‑tlsam f‑ad‑ẓrġ ma‑rad‑awn‑skrġ.› »

⁶ mayan a‑f‑ur‑sul‑lsin ayt‑israyil timlsa kʷlanin, tigira n‑mad‑fln adrar‑an n‑ḥurib.

ah̬iyyam n‑umnaggar

⁷ ġ‑uwssan‑an ar‑n‑issbiddad musa yan‑uh̬iyyam yaggug‑n f‑usras. ig‑as ism ‹ah̬iyyam n‑umnaggar›. wanna iran a‑isiggl s‑sidi rbbi, iffuġ s‑uh̬iyyam n‑umnaggar lli‑illan ġ‑brra n‑usras.

⁸ ġakud nna‑iffuġ musa s‑dar‑uh̬iyyam n‑umnaggar, ar‑kullu‑nkkrn mddn, kraygatt yan ibidd ġ‑imi n‑uh̬iyyam‑ns, ar‑n‑tmnadn ġ‑musa ar kiġ ikšm s‑uh̬iyyam.

⁹ ġakud nna‑ikšm musa s‑uh̬iyyam, ar‑di‑ttgguz tannalt n‑umdlu, tbidd ġ‑imi n‑uh̬iyyam, ar‑ilmma‑isawal sidi rbbi d‑musa.

¹⁰ ġakud nna‑ẓran kullu mddn‑an tannalt n‑umdlu tbidd ġ‑imi n‑uh̬iyyam, ar‑kullu‑tbiddadn ar‑n‑knnun, kraygatt yan ġ‑imi n‑uh̬iyyam‑ns.

¹¹ ġmkan a‑s‑a‑isawal sidi rbbi d‑musa udm s‑uwdm, ġmklli isawal‑urgaz d‑umddakkʷl‑ns. ġakud nna‑d‑iwrri musa s‑usras, ar‑n‑itqama‑umqasa‑ns ġ‑ugʷns n‑uh̬iyyam‑an, iga‑t‑uɛyyal yahušuɛ lli‑igan yus n‑nuwn.

sidi rbbi izzɛam musa

¹² yini musa i‑sidi rbbi: «ẓr ġilad. kiyi a‑yyi‑innan: ‹ssawn mddn‑ad›, walaynni ur‑ta‑yyi‑tmlit manwa ra‑didi‑taznt. tinit‑iyi daġ: ‹ssnġ‑k s‑ism‑nk, taft rrḍa ġ‑iẓri‑nu.›

¹³ imma ġilad iġ‑sri‑trḍit, ml‑iyi iġarasn‑nk f‑a‑k‑issanġ kiyi, afġ rrḍa ġ‑iẓri‑nk. swangm ula aqbil‑ad, ašku mddn‑nk ad‑gan.»

¹⁴ irar‑as‑d: «nkki a‑ra‑dik‑imun ssunfuġ‑ak.»

¹⁵ yini‑as musa: «iġ‑ur‑ra‑didi‑tmunt, a‑ur‑aġ‑tssawnt zġ‑ġid.

¹⁶ ašku mamnk a‑s‑ra‑d‑ibayyn rrḍa lli‑s‑sri‑trḍit, nkki d‑mddn‑nk? is‑urd s‑tamunt‑nk didnġ, f‑a‑ntyawẓlay zġ‑kullu iqbiln yaḍni lli‑illan f‑iggi n‑wakal.»

¹⁷ yini‑as sidi rbbi: «awal lli‑s‑iyi‑tnnit a‑rad‑skrġ, ašku rḍiġ srk, issanġ‑k s‑ism‑nk.»

¹⁸ iḍalb‑as musa: «ġir ml‑iyi lmajd‑nk.»

¹⁹ irar‑as‑d: «rad‑zzriġ kullu afulki‑nu ġ‑umnid‑nk, ɛlmġ‑k s‑ism n‑‹wad bdda illan›. rad‑rḥmġ wanna riġ a‑t‑rḥmġ, ḥnnuġ f‑wanna riġ a‑fllas‑ḥnnuġ.

²⁰ walaynni ur‑tẓḍart a‑tẓrt udm‑inu, ašku bnadm ur‑iẓḍar a‑yyi‑iẓr iqama iddr.»

²¹ izayd sidi rbbi yini‑as: «hati illa ġ‑tama‑nu yan mani ġ‑ra‑tbiddt f‑uẓru.

²² ra‑k‑ssntalġ ġ‑usttiġ n‑uẓru lliġ a‑izray lmajd‑inu, dlġ‑k s‑ufus‑inu ard zriġ.

²³ kksġ ilmma afus‑inu, tẓrt amalu‑nu. imma udm‑inu ur‑ra‑t‑iẓr yan.»