ufuġ 24 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

lɛhd lli‑iskr rbbi d‑ayt‑israyil

¹ yini ilmma sidi rbbi i‑musa: «ġli‑d s‑dari, kiyi d‑harun d‑nadab d‑abihu [lli‑igan tarwa n‑harun] d‑ssa n‑id‑mraw (70) ġ‑imġarn n‑ayt‑israyil, tknum ġ‑tuggugt.

² takmurt‑d ilmma kiyi waḥduk s‑dar wad bdda illan. a‑ur‑d‑akmurn wiyyaḍ, wala ġlin‑d dik mddn yaḍni.»

³ iddu musa ġakudan s‑dar mddn, iml‑asn kullu iwaliwn n‑rbbi da‑bdda‑illan ula tinbaḍin‑ns kullutnt. sawln‑d mddn kullutn ġakudan s‑yan‑wawal inin: «kullu iwaliwn lli‑s‑inna sidi rbbi, ra‑srsn‑nskar.»

⁴ yara musa kullu iwaliwn n‑sidi rbbi. inkr‑d ilmma zikk ṣbaḥ, ibnu yan‑ukrkur ġ‑tama n‑udrar, issbidd sin d‑mraw (12) n‑ifir s‑unšk lli‑gant snat d‑mrawt n‑tqbilt n‑ayt‑israyil.

⁵ yazn kra n‑iɛyyaln n‑ayt‑israyil, ssattuyn tiġrṣiw jdrnin, ġrṣn daġ i‑imugayn ad‑gn ‹tiwafkiw n‑sslamt› i‑sidi rbbi.

⁶ yasi‑d musa mnaṣṣ n‑idammn‑nsnt, ig‑t‑in ġ‑imkiln. d‑mnaṣṣ yaḍni, iffi‑t‑in f‑ukrkur n‑tġrṣi.

⁷ yasi‑d arra n‑lɛhd, iġr‑t f‑mddn. inin‑as daġ: «kullu ma‑s‑inna sidi rbbi, ra‑t‑nskar.»

⁸ yasi‑d musa idammn‑lli, irušš srsn mddn, yini: «ha idammn n‑lɛhd lli‑diwn‑iskr sidi rbbi mklli‑awn‑imla s‑iwaliwn‑an.»

⁹ yawn ilmma musa d‑harun d‑nadab d‑abihu d‑ssa n‑id‑mraw (70) n‑umġar n‑ayt‑israyil,

¹⁰ s‑n‑ẓran rbbi n‑israyil. yili ġ‑ddu iḍarn‑ns kra irwasn ifir n‑uẓru izgzawn iṣfan zund ignwan.

¹¹ ur‑d‑yut‑ufus‑ns imġarn‑an n‑ayt‑israyil, wah̬h̬a‑t‑ẓran, ššn sun kullu ġ‑dars.

¹² yini ilmma sidi rbbi i‑musa: «ġli‑d s‑dari ġ‑iggi n‑udrar tqamat gis. rad‑ak‑fkġ tilwaḥ n‑uẓru lli‑f‑uriġ ilmmudn d‑luṣiyat baš a‑tn‑issann mddn.»

¹³ inkr musa yawi dids amqasa‑ns yahušuɛ, iġli musa s‑iggi n‑udrar n‑rbbi.

¹⁴ inna ntta i‑imġarn: «qlat ġid ard‑d‑darun‑nwrri. ha harun d‑ḥur ġ‑gratun. wanna dar kra n‑ṭaẓit, isslkm‑asn‑tt.»

¹⁵ iġli musa ġakudan s‑iggi n‑udrar. idl‑kullu‑udrar s‑umdlu.

¹⁶ iggʷz‑d lmajd n‑sidi rbbi f‑udrar n‑sinay, idl‑t‑umdlu sḍis‑uwssan. wis ssa n‑uwssan iġr‑d i‑musa zġ‑wammas n‑umdlu.

¹⁷ mnadn‑in ayt‑israyil lmajd n‑sidi rbbi f‑ih̬f n‑udrar, irwas lɛafiyt ijddrn.

¹⁸ ikšm musa s‑umdlu, iġli s‑iggi n‑udrar. iqama‑n ġ‑udrar kkuẓ id‑mraw (40) n‑wass azal wala iḍ.