ufuġ 23 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

tamazirt lli‑s‑rad‑kšmn

²⁰ [yini sidi rbbi i‑musa:] «ha‑yyi ra‑n‑aznġ yan lmalak ad‑awn‑izwur, igabl‑kʷn ġ‑uġaras ard‑kʷn‑isslkm s‑tmazirt lli‑awn‑jjujadġ.

²¹ awyat‑stt bdda ġ‑lmalak‑an ar‑srs‑tsflidm. a‑ur‑as‑tti‑tssṭiyarm. ašku yusi nttan ism‑inu, d‑ur‑rad‑awn‑iṣamḥ iġ‑ti‑tɛṣam.

²² iġ‑a‑srs‑tsflidm ar‑tskarm s‑kullu ma‑yawn‑ttiniġ, rad‑gġ nkki anuwwaš i‑inuwwašn‑nun, gġ amḍaḍḍ i‑imḍaḍḍn‑nun.

²³ «lliġ‑awn‑izwur lmalak‑inu, isslkm‑kʷn s‑dar ayt‑amur d‑ayt‑ḥit d‑ayt‑fariz d‑ayt‑kanɛan d‑ayt‑ḥiwi d‑ayt‑yabus, fnuġ‑tn kullu,

²⁴ a‑ur‑tknum ġ‑lgddam n‑id‑rbbi‑nsn, wala da‑tn‑ttqasam, wala tsalam iskkirn‑nsn. h̬lwat kullu mad‑tɛbadn ntni, trẓm kullu ifariwn‑nsn.

²⁵ ra‑yyi‑ttqasam nkki‑ad igan rbbi siditun, s‑awn‑barkġ ġ‑ma‑tšttam ula ma‑tssam, ssanfġ‑awn kullu ma‑isshrašn.

²⁶ ur‑ra‑tili yat isrgn ula yat ur‑irbbun ġ‑tmazirt‑nun. rad‑awn‑ssafuġ ussan n‑tudrt‑nun.

²⁷ «ra‑n‑aznġ tawda‑nu issġuwḍn ġ‑lgddam‑nun, ssduyyġ kullu iqbiln lli‑ra‑tlkmm, rarġ inuwwašn‑nun ad‑kullu‑zġ‑giwn‑rwln.

²⁸ ra‑n‑aznġ id‑warẓẓan mqqurnin ġ‑lgddam‑nun, ad‑ssrwln ayt‑ḥiwi d‑ayt‑kanɛan d‑ayt‑ḥit.

²⁹ urd yan‑usggʷas a‑ġ‑ra‑tn‑kullu‑ṭṭayġ, a‑ur‑imil ih̬wu‑wakal ar‑gis‑ttigatn luḥuš.

³⁰ walaynni ra‑tn‑ṭṭayġ imikk s‑imikk ġ‑lgddam‑nun ard tigatm tɛmmrm tamazirt.

³¹ «ra‑n‑gġ iwtta‑nun zġ‑umda azggʷaġ ar amda n‑ayt‑filisṭin, zġ‑lh̬la imqqurn ar asif n‑furat. rad‑gġ imzdġn n‑wakal‑an ġ‑ufus‑nun, teṭṭaym‑tn ġ‑lgddam‑nun.

³² a‑ur‑didsn‑tskrm kra n‑lɛhd ntni ula id‑rbbi‑nsn.

³³ ur‑rad‑zdġn ntni ġ‑tmazirt‑nun, a‑ur‑imil jlun‑kʷn flla. ašku iġ‑tddam ard a‑ttqasam id‑rbbi‑nsn, s‑ṣṣaḥt ra‑ttyamaẓm ġ‑tẓqqurt.»