ufuġ 20 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

mrawt luṣiyat n‑sidi rbbi

¹ isawl‑d rbbi s‑kullu iwaliwn‑ad yini:

² «nkki a‑igan wad bdda illan, gġ rbbi‑nk lli‑k‑id‑issufġn zġ‑miṣr, zġ‑wakal n‑tsmugit.

³ «a‑ur‑sar‑ak‑yili kra n‑rbbi yaḍni bla nkki.

⁴ «a‑ur‑sar‑tskrt i‑ih̬f‑nk kra n‑ṣṣurt inqšn, nġd kra n‑ikʷlan irwasn kra illan ġ‑ignwan ula kra illan ġ‑wakal ula kra illan ġ‑waman n‑gr ikalln,

⁵ baš ad‑as‑tknnut ar‑ti‑ttqasat. ašku nkki da‑igan rbbi sidik, giġ wad išqan f‑ma‑igan winu. winna‑yyi‑kurhanin, ar‑traraġ i‑tarwa‑nsn f‑lh̬ʷšant n‑ayddarsn ar tis kraṭṭ ula tis kkuẓṭ tasutin.

⁶ walaynni ar‑ssafawġ lḥnant‑inu izgan i‑wafḍan n‑willi‑yyi‑ittirin ar‑tti‑tawin ġ‑luṣiyat‑inu.

⁷ «a‑ur‑sar‑tbdrt ġ‑wawal ih̬wan ism n‑‹wad bdda illan› ig rbbi‑nk. ašku wanna ibdrn ism n‑rbbi da‑bdda‑illan ġ‑wawal ih̬wan, ur‑ra‑t‑adjġ bla lɛqubit.

⁸ «swingim‑d bdda wis ssa‑uwssan ad‑dark‑itgga ass amẓlay.

⁹ sḍis‑uwssan a‑ra‑tth̬damt ar‑ttqasat kullu tawuri‑nk,

¹⁰ imma wis ssa‑uwssan ar‑itgga ass n‑usunfu, ityawẓlay i‑wad bdda illan ig rbbi‑nk. a‑ur‑gis‑tskrt kra n‑twuri kiyi ula yuk ula illik ula amqasa‑nk ula tamqasat‑nk ula lksibt‑nk ula abrrani nna‑dark‑igawrn.

¹¹ ašku nkki‑ad igan wad bdda illan, sḍis‑uwssan a‑ġ‑skrġ ignna d‑wakal d‑umda ula kullu ma‑gisn‑illan, imma wis ssa‑uwssan sunfiġ. mayan a‑f‑barkġ nkki‑ad bdda illan ġ‑wis ssa‑uwssan, gġ‑t d‑wass amẓlay.

¹² «tawit‑stt bdda ġ‑babak d‑innak, f‑ad‑igatn isggʷasn‑nk ġ‑wakal lli‑ak‑ifka rbbi‑nk da‑bdda‑illan.

¹³ «a‑ur‑tnġt.

¹⁴ a‑ur‑tznut.

¹⁵ a‑ur‑takʷrt.

¹⁶ a‑ur‑tinit tuggʷa n‑tkrkas f‑wadjar‑nk.

¹⁷ «a‑ur‑tirit i‑ih̬f‑nk tigmmi n‑wadjar‑nk. a‑ur‑tirit tamġart n‑wadjar‑nk ula amqasa‑ns ula tamqasat‑ns ula amugay‑ns ula aġyul‑ns ula kra yaḍni igan win‑wadjar‑nk.»

ksuḍn mddn zġ‑rbbi bahra

¹⁸ ar‑kullu‑tmnadn mddn usmann d‑wawwu lli‑idln adrar, ar‑sflidn i‑iggign d‑ijjij n‑nnffar itjhhdn. hatni ġuwḍn bahra ar‑trgigiyn, biddn‑in kullu ġ‑tuggugt.

¹⁹ ḍalbn i‑musa inin: «sawl‑d kiyi srnġ, s‑ak‑nsfld. a‑ur‑d‑srnġ‑isawl rbbi a‑ur‑imil nmmt.»

²⁰ yini musa i‑mddn‑an: «ad‑ur‑tġuwḍm. hati yuška‑d rbbi a‑kʷn‑yarm baš a‑d‑bdda‑tswingimm ġ‑tksaḍ‑ns d‑a‑ur‑sar‑tjlum zġ‑uġaras‑ns.»

²¹ biddn‑in sul mddn ġ‑tuggugt, imma musa izuyd yakmur‑n s‑dar‑umdlu iḍlan lli‑ġ‑illa rbbi.

²² isawl‑d wad bdda illan s‑musa yini: «ha ma‑ra‑tinit i‑ayt‑israyil: ‹tẓram s‑walln‑nun mamnk a‑d‑srun‑sawlġ zġ‑ignwan.

²³ a‑ur‑tskrm id‑rbbi n‑nnʷqrt tgm‑tn‑d didi. wala id‑rbbi n‑uwrġ, a‑ur‑tn‑tskrm i‑ih̬f‑nun.›

²⁴ bnu‑iyi akrkur n‑wakal, tġrṣt fllas i‑tġrṣiw‑nk jdrnin d‑twafkiw n‑sslamt, tġrṣt fllas i‑uwlli‑nk d‑imugayn‑nk. kraygatt maniġ ittrs ism‑inu, ra‑n‑dark‑aškiġ a‑k‑barkġ ġin.»