ufuġ 2 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

talalit n‑musa

¹ ġ‑uwssan‑an inkr yan zġ‑tqbilt n‑ayt‑lawi, yawi taslit zġ‑ist‑lawi.

² tffuġ nttat ar‑trbbu, taru yan‑warraw. lliġ‑ti‑tẓra ifulki, tssrgs‑t kraḍ‑iyrn,

³ aylliġ ur‑sul‑tẓḍar a‑ti‑tḥḍu. tasi‑d yat‑tryalt ttyawskar zġ‑waẓẓmay, tġm‑as zzft d‑tfiẓẓa, tg gis arraw, tsrs‑tt‑in ġ‑gr‑waẓẓmay n‑wasif.

⁴ ulltmas n‑warraw tbidd‑n ġ‑tuggugt a‑tẓr ma‑rad‑as‑ijru.

⁵ imikk s‑di‑thuwwd illis n‑firɛawn s‑wasif a‑tsird, ar‑fttunt‑tmqasatin‑ns ġ‑tama n‑wasif. tẓr‑n taryalt ġ‑gr‑waẓẓmay, tazn tamqasat‑ns a‑stti‑di‑tawi.

⁶ trẓm‑tt s‑a‑gis‑ttmnad arraw, d‑ntta hati ar‑yalla. tḥnnu gis tini: «yan ġ‑tarwa n‑ayt‑ɛibr ayad.»

⁷ tsawl‑d‑uwlltmas n‑warraw ġakudan i‑illis n‑firɛawn tini: «is‑ad‑dduġ ad‑am‑d‑ġrġ i‑yat ġ‑ist‑ɛibr ma‑ym‑issngayn arraw‑ad?»

⁸ tini‑as illis n‑firɛawn: «zayd.» tddu‑tfruh̬t tġr‑d i‑innas n‑warraw.

⁹ tsawl‑as illis n‑firɛawn tini‑as: «awi arraw‑ad ar‑iyi‑ti‑tssngayt. ra‑ym‑akkaġ tiġrad‑nm.» tawi‑d‑tmġart arraw ar‑ti‑tssngay.

¹⁰ lliġ imqqur‑uḥšmi, tawi‑t s‑dar illis n‑firɛawn, tg‑t nttat d‑yus. tg‑as ism musa [tga lmɛna‑ns ‹ityawldday‑d›], ašku tnna d‑ih̬f‑ns: «ldiġ‑t‑id zġ‑waman.»

irwl musa s‑midyan

¹¹ lliġ imqqur musa, iffuġ yan‑wass s‑dar mddn‑ns, iẓr anhataf iẓẓayn lli‑fllasn‑illan. imnad yan gu‑miṣr ar‑ikkat yan gu‑ɛibr lli‑igan zġ‑mddn‑ns.

¹² igrawl ġmk d‑ġmk, ur‑iẓri yan, yut gu‑miṣr‑an iḥḍu‑t ġ‑umlal.

¹³ ndid azkka iffuġ daġ, yaf‑n sin ġ‑ayt‑ɛibr mmaġn i‑ngratsn. isawl musa i‑walli itɛddan f‑wayya yini‑as: «mah̬ a‑tkkatt gʷmak?»

¹⁴ irar‑as‑d nttan: «ma‑k‑igan d‑uriyas ula lḥakm fllanġ? is‑trit a‑yyi‑tnġt ġmklli tnġit gu‑miṣr‑an?» yiksaḍ musa ġakudan, yini d‑ih̬f‑ns: «aḥḥ, wrrin ssnn mddn mad‑skrġ.»

¹⁵ lliġ isfld firɛawn i‑ma ijran, iskr f‑a‑inġ musa. walaynni musa irwl zġ‑dar firɛawn, iddu igawr ġ‑tmazirt n‑midyan. iskiws musa ġ‑tama n‑yan‑wanu.

¹⁶ ġwalli igan amsakmur ġ‑gr mddn d‑rbbi ġ‑tmazirt n‑midyan, hati iṭṭaf ssa n‑istis. aškint‑d ntnti ar‑tagʷmnt, ɛmmrnt ifraḍn ad‑ssunt‑uwlli n‑babatsnt.

¹⁷ aškin‑d kra n‑imksawn ṭṭayn‑tnt. inkr musa ġakudan ifukku‑tnt, izayd issu ulli‑nsnt.

¹⁸ lliġ‑n‑kšmnt s‑dar babatsnt raɛwil, isqsa‑tnt: «ma‑ijran aylliġ ur‑n‑tmaṭlmt ġassad?»

¹⁹ inint‑as: «ifukka‑yaġ yan gu‑miṣr zġ‑imksawn, yagʷm issu ulli‑nġ.»

²⁰ yini raɛwil i‑istis: «maniġ illa? mah̬ aylliġ‑t‑in‑tflmt? ġramt‑as‑d a‑didnġ‑išš.»

²¹ irḍu musa a‑igawr ġ‑dar‑urgaz‑an. ifk ilmma i‑musa illis ṣifura,

²² taru‑as yan‑warraw. ig‑as ism giršum [tga lmɛna‑ns ‹abrrani›], ašku inna: «giġ abrrani ġ‑tmazirt n‑iġribn.»

isfld rbbi i‑twaġra n‑mddn‑ns

²³ zrin isggʷasn immt‑ugllid n‑miṣr. imma ayt‑israyil ar‑ukan‑sul‑nddrn s‑tkrrayt n‑tsmugit, ar‑ssmummuyn ar‑aqran i‑ma‑tn‑itɛawan, tlkm‑twaġra‑nsn rbbi.

²⁴ isfld rbbi i‑tndra‑nsn, iswangm lɛhd lli‑iskr d‑ibrahim d‑isḥaq d‑yaɛqub.

²⁵ imnad rbbi ġ‑ayt‑israyil, yissan mad‑darsn‑illan.