ufuġ 19 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

ayt‑israyil ġ‑dar‑udrar n‑sinay

¹ lkmn ayt‑israyil lh̬la n‑sinay ġ‑wass izwarn n‑wis kraḍ‑iyrn tigira n‑ma‑d‑ffuġn zġ‑wakal n‑miṣr.

² lliġ muddan ayt‑israyil zġ‑rafidim, kšmn s‑lh̬la n‑sinay, srsn ġ‑lh̬la‑yan ġ‑tama n‑udrar.

³ iġli musa ġakudan a‑n‑yakmur s‑rbbi. iġr‑as‑d sidi rbbi zġ‑iggi n‑udrar yini‑as: «ha ma‑ra‑tinit i‑ayt‑yaɛqub, tmlt‑t i‑ayt‑israyil:

⁴ ‹tẓram mad‑skrġ i‑ayt‑miṣr, tẓrm mamnk a‑kʷn‑d‑usiġ zund iġ‑tllam f‑tfrawin n‑igidr, awiġ‑kʷn‑d s‑dari.

⁵ ġilad tasawnt, iġ‑a‑tsflidm s‑wawal‑inu, tzgam ġ‑lɛhd‑inu, ra‑tgm mddn‑inu lli‑ẓliġ zġ‑gr kullu ayt‑tmizar ad‑gn winu. ddunit kullutt tinu a‑tga,

⁶ imma kunni ra‑tgm ayt‑tgldit‑inu, tgm imsakmurn‑inu, tgm aqbil‑inu amẓlay.› ġmkad ad‑gan iwaliwn lli‑s‑ra‑tinit i‑ayt‑israyil.»

⁷ yašk‑id musa iġr‑d i‑imġarn n‑ayt‑israyil, iml‑asn kullu iwaliwn lli‑f‑t‑yuṣṣa sidi rbbi.

⁸ sawln‑d mddn kullutn inin‑as: «kullu ma‑s‑inna sidi rbbi, ra‑t‑nskr.» iddu musa a‑irar awal‑nsn i‑sidi rbbi.

⁹ yini sidi rbbi i‑musa: «ha‑yyi ra‑n‑dark‑aškiġ ġ‑umdlu iẓẓayn, baš ad‑sfldn mddn mamnk a‑srk‑sawalġ, amnn gik ġilad ula bdda.» yini‑as musa ġakudan iwaliwn lli‑s‑as‑nnan mddn.

¹⁰ yini sidi rbbi i‑musa: «zayd s‑dar mddn, tinit‑asn ad‑ssġusn ih̬fawn‑nsn ġassad d‑uzkka, sirdn ula timlsa‑nsn,

¹¹ f‑ad‑ḥiyyln i‑wis kraḍ‑uwssan. ašku wis kraḍ‑uwssan rbbi da‑bdda‑illan ra‑n‑igguz f‑udrar n‑sinay ġ‑iẓri n‑mddn kullutn.

¹² skr awttu a‑isutl i‑udrar, tinit i‑mddn‑an: ‹ad‑ur‑tawnm i‑udrar ula tggrm i‑tama‑ns. wanna iggrn i‑udrar, iqqan‑t‑id a‑immt.

¹³ utat‑t s‑iẓran nġd s‑iẓḍkan a‑immt bla‑t‑isli yan s‑ufus, ig‑iyt lbhimt nġd bnadm, ur‑ra‑iddr.› ini i‑mddn ad‑qln ard sfldn i‑ijjij n‑nnffar itjhhdn, awnn‑d tizi‑an i‑udrar.»

¹⁴ iggʷz‑d musa ġakudan zġ‑udrar s‑dar mddn, yini‑asn ad‑ssġusn ih̬f‑nsn, sirdn ula timlsa‑nsn.

¹⁵ yini‑asn: «a‑ur‑ilkm yan tamġart‑ns, tḥiyylm i‑wis kraḍ‑uwssan.»

¹⁶ zikk ṣbaḥ n‑wis kraḍ‑uwssan, yili iggig d‑uwsman d‑umdlu iẓẓayn f‑iggi n‑udrar, yili ijjij n‑nnffar bahra itjhhdn, aylliġ a‑kullu‑trgigiyn mddn ġ‑udġar lli‑ġ‑srsn.

¹⁷ inkr musa issufġ‑d mddn zġ‑usras f‑a‑n‑mnaggarn d‑rbbi. biddn kullu ġ‑tama n‑udrar.

¹⁸ idl‑wawwu kullu adrar n‑sinay, ašku igguz‑d fllas sidi rbbi s‑lɛafiyt. ar‑yaqlay‑wawwu zund awwu n‑lkušt, indudi‑kullu‑udrar.

¹⁹ han ijjij n‑nnffar ar‑d‑itzayad s‑uggʷar. ġakudan isawl musa s‑as‑d‑ijawb rbbi s‑iggig.

²⁰ igguz‑d sidi rbbi f‑ih̬f n‑udrar n‑sinay, iġr‑d i‑musa a‑iġli s‑ih̬f n‑udrar, iġli musa.

²¹ yini‑as sidi rbbi: «gguz tɛlmt mddn a‑ur‑irin ad‑ssurfn awttu baš ad‑ẓrn wad bdda illan, a‑ur‑gisn‑itthlk ma‑iggutn.

²² ula imsakmurn lli‑d‑itakmurn s‑wad bdda illan, ini‑asn ad‑ssġusn ih̬fawn‑nsn, a‑ur‑tn‑yut wad bdda illan s‑lhalak.»

²³ yini musa i‑sidi rbbi: «han ur‑rad‑iẓḍarn mddn ad‑awnn s‑udrar n‑sinay, ašku tɛlmt‑aġ tinit: ‹skr awttu i‑udrar› a‑ur‑d‑yakmur yan s‑dark.»

²⁴ irar‑as‑d sidi rbbi: «gguz ġilad, tawit‑d dik harun tġlim‑d. walaynni a‑ur‑tadjt imsakmurn d‑mddn yaḍni ad‑d‑ssurfn awttu baš ad‑d‑ġlin s‑dar wad bdda illan, a‑ur‑tn‑utġ s‑lhalak.»

²⁵ igguz musa ġakudan s‑dar mddn yini‑asn mayan.