ufuġ 18 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

išawr musa d‑uḍggʷal‑ns yatru

¹ babas n‑tmġart n‑musa, iga ism‑ns yatru, ig amsakmur ġ‑gr mddn d‑rbbi ġ‑tmazirt n‑midyan. isfld f‑kullu ma‑iskr rbbi f‑ssibt n‑musa d‑mddn‑ns n‑ayt‑israyil, ula f‑mamnk a‑tn‑d‑issufġ sidi rbbi zġ‑miṣr.

² yatru lli‑igan aḍggʷal n‑musa, tlla dars illis ṣifura tamġart n‑musa, ašku ikka‑ttin musa isafḍ‑stt s‑dar ayt‑dars

³ nttat d‑sin tarwa‑ns. yan gisn iga ism‑ns giršum, ašku inna musa: «giġ abrrani ġ‑tmazirt n‑iġribn.»

⁴ ig ism i‑wayyaḍ aliɛazr, ašku inna: «iɛawn‑iyi rbbi n‑baba, ifukku‑yyi‑d zġ‑uwzzal n‑firɛawn.»

⁵ yašk‑id yatru lli‑igan aḍggʷal n‑musa, yawi‑d tamġart n‑musa d‑tarwa‑ns s‑illiġ isrs ġ‑lh̬la ġ‑tama n‑udrar n‑rbbi.

⁶ yazn awal i‑musa yini: «ha nkki aḍggʷal‑nk yatru uškiġ‑d s‑dark, awiġ‑d tamġart‑nk d‑tarwa‑ns s‑sin.»

⁷ iddu musa ġakudan a‑n‑imnaggar d‑uḍggʷal‑ns, iknu ġ‑umnid‑ns issudn‑t, ssmqsan f‑ṣṣaḥt ula lhna, kšmn ilmma s‑uh̬iyyam.

⁸ iɛawd musa i‑uḍggʷal‑ns f‑kullu ma‑iskr sidi rbbi i‑firɛawn d‑ayt‑miṣr f‑ssibt n‑ayt‑israyil, iɛawd‑as f‑tmmariw lli‑zzrin ġ‑uġaras ula mamnk a‑tn‑ijjnjm sidi rbbi.

⁹ ifrḥ yatru s‑ifulkitn lli‑iskr sidi rbbi ġ‑ayt‑israyil lliġ‑tn‑ifukka zġ‑gr ifassn n‑ayt‑miṣr.

^10-11 yini yatru ġakudan: «a‑nškr sidi rbbi lli‑kʷn‑d‑ifukkan zġ‑gr ifassn n‑ayt‑miṣr d‑ifassn n‑firɛawn. ssnġ ġilad is‑yugʷr wad bdda illan kullu id‑rbbi yaḍni, ašku ijjnjm‑d mddn‑ad zġ‑ddu‑ufus n‑ayt‑miṣr, inru willi fllasn tɛddanin.»

¹² izayd yatru lli‑igan aḍggʷal n‑musa issattuy tiġrṣi ijdrn i‑rbbi, izayd tiġrṣiw yaḍni. imun‑d ula harun d‑imġarn n‑ayt‑israyil kullutn ad‑ššn d‑uḍggʷal n‑musa ġ‑umnid n‑rbbi.

¹³ ndid azkka iskiws musa a‑issnfaṣal mddn, biddn dars zġ‑zikk ṣbaḥ ar tadggʷat.

¹⁴ lliġ iẓra‑uḍggʷal‑ns kullu ma‑iskar f‑ssibt n‑mddn‑an yini‑as: «matta ġmkad tskart f‑mddn? mah̬ aylliġ a‑ysn‑tsflidt waḥduk, biddn kullu dark zġ‑zikk ṣbaḥ ar tadggʷat?»

¹⁵ irar‑as musa: «ašku ar‑d‑dari‑ttaškin mddn ar‑siggiln s‑rbbi.

¹⁶ ġakud nna‑tlla kra n‑ṭaẓit ġ‑gratsn, ar‑d‑dari‑ttaškin ad‑ssnfaṣalġ ġ‑gr‑urgaz d‑wadjar‑ns, ar‑asn‑malaġ tinbaḍin n‑rbbi d‑ulmmud‑ns.»

¹⁷ yini‑as yatru: «ur‑iṣliḥ ġmklli tskart.

¹⁸ ašku ra‑tssrmit ih̬f‑nk, tssrmit ula mddn‑ad‑d‑dark‑ittaškin. hati iẓẓay fllak, ur‑ra‑tiẓḍart a‑ti‑tskart waḥduk.

¹⁹ sfld‑iyi ġilad, mlġ‑ak ma‑tskart, iɛawn‑k srs rbbi. kiyi a‑ra‑n‑ibidd d‑mddn ġ‑umnid n‑rbbi, ar‑tssaqlayt iṣraḍ‑nsn s‑dar rbbi,

²⁰ ar‑asn‑tsslmadt tinbaḍin d‑ulmmud, ar‑asn‑tmalat aġaras lli‑ġ‑rad‑fttun ula iskkirn lli‑ra‑tsalan.

²¹ walaynni zayd sti kra n‑irgazn ḥaršnin zġ‑gr mddn‑nk. ad‑gn wid ituqqarn rbbi, zgan ġ‑wawal‑nsn, ur‑ḥmiln rršwa. tgt‑tn d‑iriyasn f‑mddn, a‑yili kra f‑walf, d‑kra f‑miyya, d‑kra f‑smmus id‑mraw, d‑kra f‑mraw.

²² tadjt‑tn ad‑bdda‑ssnfaṣaln ġ‑gr mddn. tamukrist nna‑išqan, rad‑ak‑tt‑id‑awin, imma tanna irh̬an, ra‑stt‑fssin ntni. ġmkan a‑s‑rad‑fllak‑ssifsisn, asin ntni dik kra ġ‑taẓẓayt‑an.

²³ iġ‑tskrt ġmkan, yamr‑ak srs rbbi, rad‑wrrin kullu mddn‑an ġ‑sslamt s‑dar takat‑nsn, tqamat tdust ula kiyi.»

²⁴ isfld musa s‑uḍggʷal‑ns, iskr kullu ma‑s‑as‑inna.

²⁵ isti musa irgazn ḥaršnin zġ‑kullu ayt‑israyil, ig‑tn d‑iriyasn f‑mddn, ig kra f‑walf, d‑kra f‑miyya, d‑kra f‑smmus id‑mraw, d‑kra f‑mraw.

²⁶ wrrin ntni ar‑bdda‑ssnfaṣaln ġ‑gr mddn. ar‑di‑tawin timukrisin šqanin i‑musa, imma tilli rh̬anin ar‑tnt‑fssin ntni.

²⁷ imsafaḍ ilmma musa d‑uḍggʷal‑ns, iftu yatru s‑tmazirt‑ns.