ufuġ 17 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

ingmugn ġ‑massa ula mariba

¹ tftu ilmma tamunt n‑ayt‑israyil kullutt, ffuġn zġ‑lh̬la n‑siyn. ar‑tmuddun ass f‑wass ġmklli‑asn‑imala sidi rbbi, aylliġ lkmn rafidim srsn gis. walaynni ur‑gis aman mad‑ssan.

² nkrn ar‑tẓin musa inin‑as: «fk‑aġ aman a‑nsu.» irar‑asn musa: «mah̬ a‑yyi‑ttẓim? mah̬ aylliġ a‑ttarmm sidi rbbi?»

³ walaynni mddn‑an, yaġ‑tn irifi irin aman. zaydn ar‑tngmugn f‑musa inin‑as: «ma‑f‑aġ‑di‑tssiwnt zġ‑miṣr? izd f‑ad‑aġ‑tnġt nkkʷni d‑tarwa‑nġ d‑lksibt‑nġ s‑irifi?»

⁴ ar‑yaqra musa ġakudan s‑sidi rbbi yini: «ma‑rad‑skrġ i‑mddn‑ad? hati yakmur a‑yyi‑kkatn s‑iẓran.»

⁵ yini sidi rbbi i‑musa: «zri s‑lgddam n‑mddn, tawit didk kra ġ‑imġarn n‑ayt‑israyil, tasit ġ‑ufus‑nk aɛmud lli‑s‑tutt ġ‑wasif n‑nnil, tftut.

⁶ ha‑yyi rad‑biddġ ġ‑lgddam‑nk f‑uẓru imqqurn ġ‑ḥurib, tutt aẓru ġakudan, ffuġn‑d‑zġ‑gis‑waman f‑ad‑sun mddn.» iskr musa ġmkan ġ‑iẓri n‑imġarn n‑ayt‑israyil.

⁷ ig ilmma ism i‑udġar‑an ‹massa› ula ‹mariba› [tga lmɛna‑nsn ‹ityaram› ula ‹ṭaẓit›], ašku ġ‑udġar‑an a‑ġ‑ẓin ayt‑israyil d‑rbbi da‑illan armn‑t, ar‑ttinin: «is‑didnġ‑illa sidi rbbi nġd uhu?»

imiġ d‑ayt‑ɛamaliq

⁸ ġakudan ad‑d‑uškan ayt‑ɛamaliq, akʷin‑d f‑ayt‑israyil ġ‑rafidim.

⁹ yini musa i‑yahušuɛ: «sti‑aġ kra n‑irgazn, tffuġm a‑tmmaġm d‑ayt‑ɛamaliq. azkka rad‑biddġ nkki ġ‑iggi n‑tuwrirt d‑uɛmud n‑rbbi ġ‑ufus‑inu.»

¹⁰ iskr yahušuɛ ġmklli‑s‑as‑inna musa, immaġ d‑ayt‑ɛamaliq. yawn musa d‑harun d‑ḥur s‑iggi n‑tuwrirt.

¹¹ ġakud nna‑yull musa afus‑ns, ar‑tnrun ayt‑israyil. ġakud nna‑yudr i‑ufus‑ns, ar‑tnrun ayt‑ɛamaliq.

¹² walaynni wrrin ifassn n‑musa ar‑di‑trmayn. asin‑d yan‑uẓru ġakudan, srsn‑t ġin iskiws fllas. yall‑as harun d‑ḥur ifassn, yan ġ‑tsga‑yad d‑yan ġ‑tsga yaḍni. zzgan ifassn‑ns ġmkan aylliġ‑n‑tḍr tafukt.

¹³ ha yahušuɛ imgr ayt‑ɛamaliq s‑uwzzal ifrsn.

¹⁴ yini sidi rbbi i‑musa: «ara awal‑ad ġ‑yan‑warra n‑ukttay, tġrt‑t ad‑as‑isfld yahušuɛ: ‹hatin rad‑sfiḍġ ayt‑ɛamaliq zġ‑ddu ignwan, laḥ‑tn ur‑sar‑ra‑tn‑ibdr yan.› »

¹⁵ ibnu musa yan‑ukrkur n‑tġrṣi, ig‑as ism ‹rbbi da‑illan iga rraya‑nu,›

¹⁶ yini: «ašku tyalaln ifassn aylliġ lkmn lɛrš n‑rbbi da‑illan. han ra‑itmmaġ sidi rbbi d‑ayt‑ɛamaliq zġ‑tasut ar tasut.»