ufuġ 16 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

aġrum zġ‑ignna

¹ muddun ilmma zġ‑ilim aylliġ tlkm kullu tamunt n‑israyil s‑lh̬la n‑siyn lli‑illan ġ‑gr ilim d‑sinay. ass wis smmus d‑mraw (15) n‑wayyur wis sin tigira n‑mad‑ffuġn zġ‑miṣr a‑ġ‑srs‑lkmn.

² imma tamunt n‑ayt‑israyil ar‑kullu‑tngmugn f‑musa d‑harun ġ‑lh̬la‑yan

³ ar‑asn‑ttinin: «mra is‑nmmut f‑ufus n‑sidi rbbi ġ‑miṣr, ġ‑illiġ a‑ntgawar ġ‑tama n‑tkinin n‑tfiyi ar‑ntšbaɛ aġrum. imma kunni tiwim‑aġ‑d s‑lh̬la‑yad a‑tnġm kullu aqbil‑nġ s‑laẓ.»

⁴ yini sidi rbbi ġakudan i‑musa: «ha‑yyi ra‑n‑fllawn‑tffiġ aġrum zund anẓar zġ‑ignwan. illa f‑mddn ad‑tffuġn kraygatt ass ar‑d‑ssmunun unšk nna‑f‑lkmn i‑wass‑an. ġmkad a‑s‑ra‑tn‑armġ, ẓrġ is‑rad‑skarn s‑tnbaṭṭ‑inu nġd uhu.

⁵ wis sḍis‑uwssan ġakud lliġ a‑tnawaln maylli‑d‑ssmunn, ra‑n‑afn is‑iggut s‑snat‑twal f‑maylli‑d‑ssmunun ġ‑uwssan yaḍni.»

⁶ yini ilmma musa d‑harun i‑ayt‑israyil kullutn: «tadggʷat‑ad ra‑tissanm izd rbbi da‑bdda‑illan a‑kʷn‑d‑issufġn zġ‑wakal n‑miṣr.

⁷ ula zikk ṣbaḥ ra‑tẓrm lmajd n‑rbbi da‑illan, ašku isfld‑awn yissan izd nttan a‑f‑a‑ttngmugm, ašku ma‑nga nkkʷni aylliġ a‑fllanġ‑tngmugm?»

⁸ izayd musa yini‑asn: «ra‑tissanm is‑isfld sidi rbbi i‑ingmugn‑nun, iġ‑awn‑d‑ifka tifiyi ma‑tšttam ġ‑tdggʷat, ifk‑awn‑d aġrum ard tšbɛm zikk ṣbaḥ. ašku ma‑nga nkkʷni? urd nkkʷni a‑f‑a‑ttngmugm, walaynni ar‑ttngmugm f‑rbbi da‑bdda‑illan.»

⁹ yini musa ġakudan i‑harun: «sawl s‑kullu tamunt n‑israyil tinit‑asn: ‹akmurat‑d s‑umnid n‑sidi rbbi, ašku han isfld i‑ingmugn‑nun.› »

¹⁰ sul a‑isawal harun s‑tamunt n‑ayt‑israyil, s‑grawln kullu s‑tsga n‑lh̬la. han iban‑d lmajd n‑sidi rbbi ġ‑umdlu.

¹¹ isawl‑d sidi rbbi s‑musa yini‑as:

¹² «sfldġ i‑ingmugn n‑ayt‑israyil. sawl srsn tinit‑asn: ‹tadggʷat ra‑tššm tifiyi, ula zikk ṣbaḥ ra‑tšbɛm aġrum, tissanm ġakudan is‑giġ rbbi da‑bdda‑illan, gġ rbbi‑nun.› »

¹³ lliġ tlkm‑tdggʷat aškint‑d‑tskʷrin n‑igran, ɛmmrnt akal n‑usras kullut. zikk ṣbaḥ tili‑tġli iggutn f‑wakal n‑lh̬la lli‑isutln i‑usras.

¹⁴ imikk s‑tzwa‑tġli, s‑illa kra irwasn ilmšan sdidnin, idl udm n‑wakal, isdid zund agris f‑iggi n‑wakal.

¹⁵ lliġ‑t‑ẓran ayt‑israyil, ar‑smqsan i‑ngratsn: «ma‑iga mayad?» ašku ur‑ssinn ma‑iga. yini‑asn‑d musa: «aġrum lli‑awn‑d‑ifka sidi rbbi i‑umššu ayad.

¹⁶ ha luṣiyt n‑sidi rbbi inna‑yawn: ‹ssmunat‑d zġ‑gis, kraygatt yan giwn, unšk nna‑ra‑išš. tasim‑d yan‑uṣaḍr [sin id‑litru] i‑kud yan darun illan ġ‑uh̬iyyam‑nun.› »

¹⁷ nkrn ayt‑israyil skrn ġmkan. kra gisn issmunn imikk, kra issmunn kigan.

¹⁸ lliġ‑t‑ɛbbrn s‑uṣaḍr, afn‑in wanna‑d‑issmunn kigan ur‑as‑d‑išaḍ yat, wanna‑d‑issmunn imikk ur‑t‑ih̬ṣṣa yat. kraygatt yan, hati issmun‑d unšk lli‑ra‑išš.

¹⁹ yini‑asn musa: «han a‑ur‑zġ‑gis‑tssnsm yat i‑ṣbaḥ.»

²⁰ imma ntni, kra gisn ur‑isfld s‑musa. ssnsn zġ‑gis kra i‑ṣbaḥ. faw‑t‑id iɛmmr s‑tuwkka iȷ̈̇ȷ̈̇u. musa, ṭiyr‑as f‑mddn‑an.

²¹ zaydn ġmkan ass f‑wass ar‑t‑id‑ssmunun zikk ṣbaḥ, kraygatt yan d‑unšk lli‑ra‑išš, ard‑di‑trqqa tafukt, ar‑ifssi.

²² imma wis sḍis‑uwssan ssmunn‑d win snat‑twal, ig sin iṣuḍar [kkuẓ id‑litru] i‑yan. munn‑d ilmma kullu imġarn n‑tamunt s‑dar musa inin‑as fllas.

²³ yini‑asn: «ha luṣiyt n‑sidi rbbi inna‑yawn: ‹azkka ra‑ig ass n‑rraḥt ikmmln, ig ass n‑usunfu lli‑ityawẓlayn i‑sidi rbbi.› ssnwat ġassad maylli tram a‑ti‑tssnum, tssiyysm maylli tram a‑ti‑tssiyysm, tḥḍum aynna ur‑tššim ar azkka.»

²⁴ skrn ntni ġmklli‑s‑asn‑inna musa, ḥḍun kra ar azkka, afn‑t‑in ilmma ur‑iȷ̈̇ȷ̈̇i wala tlla‑gis‑tuwkka.

²⁵ yini‑asn musa: «iššayt gis ġassad, ašku iga ass n‑usunfu ityawẓlayn i‑sidi rbbi. ġassad ur‑ra‑ti‑n‑tafm f‑wakal.

²⁶ sḍis‑uwssan a‑ra‑t‑id‑tssmunum, imma wis ssa n‑uwssan ar‑itgga ass n‑usunfu, ur‑ra‑ittili ġassan.»

²⁷ iffuġ kra ġ‑mddn a‑t‑id‑ssmunn ġ‑wis ssa‑uwssan, ur‑t‑in‑ufin.

²⁸ yini sidi rbbi ġakudan i‑musa: «mnšk a‑rad‑sul‑ttagʷim a‑stti‑ttawim ġ‑luṣiyat‑inu d‑ilmmudn‑inu?

²⁹ ẓrat, ar‑awn‑itsunfu rbbi siditun ġ‑wis ssa‑uwssan. mayan a‑f‑a‑ywn‑akkaġ ġ‑wass wis sḍis amššu i‑sin‑uwssan. gawrat ass wis ssa, kraygatt yan ġ‑illiġ illa. a‑ur‑iffuġ yan zġ‑illiġ illa ġ‑wis ssa‑uwssan.»

³⁰ sunfun mddn ġakudan ġ‑wis ssa‑uwssan.

³¹ amššu‑an, gan‑as ayt‑israyil ism ‹man›. irwas amud n‑lqzbur, imllul imim zund brkuks ilan tammnt.

³² isawl‑d musa yini: «ha luṣiyt n‑sidi rbbi inna‑yawn: ‹ḥḍwat zġ‑gis yan‑uṣaḍr, ad‑bdda‑iqama ġ‑dar kraygatt tasut n‑tasutin, f‑ad‑ẓrn aġrum lli‑s‑kʷn‑ššušiġ ġ‑lh̬la tigira n‑ma‑kʷn‑d‑ssufġġ zġ‑miṣr.› »

³³ yini ilmma musa i‑harun: «asi‑d yan‑ubuqqal, tgt gis yan‑uṣaḍr n‑‹man›. tsrst‑t‑in ġ‑umnid n‑sidi rbbi, a‑iqama i‑kullu tasutin lli‑ra‑d‑yašk.»

³⁴ iskr harun ġmklli‑s‑inna sidi rbbi i‑musa, isrs‑t‑in ġ‑udġar n‑tuggʷa ad‑bdda‑iqama.

³⁵ kkuẓ id‑mraw (40) n‑usggʷas ad‑šttan ayt‑israyil ‹man›, aylliġ lkmn akal issmġayn. ar‑šttan ‹man› aylliġ lkmn tama n‑wakal n‑kanɛan.

³⁶ (mraw n‑uṣaḍr‑an ra‑ig lɛbrt.)