ufuġ 14 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

ayt‑israyil bbin amda azggʷaġ

¹ yini sidi rbbi ġakudan i‑musa:

² «ini i‑ayt‑israyil ad‑grawln wrrin s‑tsga n‑imi n‑ḥirut, srsn ġ‑gr migdul d‑umda, ġ‑tama n‑baɛl‑ṣafun. tasga‑yan a‑ġ‑rad‑srsn ġ‑tama n‑umda.

³ ašku ra‑yini firɛawn f‑ayt‑israyil: ‹han mddn‑an ar‑tlulliyn ġ‑wakal, iġwi‑tn lh̬la.›

⁴ ġakudan a‑rad‑ssiqarġ ul n‑firɛawn, iffuġ‑d nttan iẓẓu giwn. rad‑nruġ firɛawn ula kullu ikabarn‑ns, issann ayt‑miṣr is‑giġ rbbi da‑bdda‑illan.» ftun ayt‑israyil skrn ġmkan.

⁵ lliġ isfld‑ugllid n‑miṣr is‑kullu‑rwln ayt‑israyil, igllb‑uwl‑ns nttan d‑imɛawann‑ns, inin i‑ngratsn: «matta h̬tad nskr aylliġ nrẓm i‑ismgan‑nġ n‑ayt‑israyil?»

⁶ iqqn firɛawn lkurriṣa‑ns issmun‑d irgazn‑ns.

⁷ yawi dids sḍist id‑miyya (600) n‑lkurriṣa iṣḥan, yawi ula kullu lkrarṣ n‑miṣr, kud yat s‑umnay‑ns.

⁸ ftun ayt‑israyil s‑nniyt izgan, walaynni sidi rbbi issiqar ul n‑firɛawn agllid n‑miṣr aylliġ‑d‑iffuġ iẓẓu ġ‑ayt‑israyil.

⁹ ẓẓun gisn ayt‑miṣr s‑iysan n‑firɛawn d‑lkrarṣ d‑imnayn d‑inmmaġn‑ns kullutn, lkmn‑tn s‑illiġ srsn ġ‑tama n‑umda ġ‑imi n‑ḥirut ġ‑tama n‑baɛl‑ṣafun.

¹⁰ lliġ‑n‑ilkm firɛawn, alln ayt‑israyil alln‑nsn s‑a‑n‑tmnadn ayt‑miṣr ftan‑d srsn, iksaḍn bahra. ar‑aqran ayt‑israyil s‑sidi rbbi.

¹¹ inin ntni i‑musa: «is‑ur‑llin ismḍal ġ‑miṣr aylliġ‑aġ‑di‑tiwit a‑nmmt ġ‑lh̬la‑yad? mayd‑aġ‑tskrt? mah̬ aylliġ‑aġ‑di‑tssufġt zġ‑miṣr?

¹² is‑ur‑ak‑nenni ġ‑miṣr: ‹fssa fllanġ, tadjt‑aġ a‑ntqasa ayt‑miṣr›? ašku yuf‑aġ a‑ntqasa ayt‑miṣr ula nmmut ġ‑lh̬la‑yad.»

¹³ isawl‑d musa s‑mddn yini‑asn: «ad‑ur‑tiksaḍm. biddat tzgam, tẓrm ġassad mamnk a‑ra‑kʷn‑ijjnjm sidi rbbi. han ayt‑miṣr lli‑tẓram ġassad, ur‑sar‑ra‑tn‑sul‑tẓrm.

¹⁴ ġir thnnayat s‑fllawn‑immaġ sidi rbbi.»

¹⁵ yini ilmma sidi rbbi i‑musa: «mah̬ ad‑sri‑taqrat? ini i‑ayt‑israyil ad‑zaydn.

¹⁶ all aɛmud‑nk, tmdit‑n afus‑nk s‑umda, tbḍut aman f‑sin. rad‑ftun ayt‑israyil f‑taġart ġ‑wammas n‑umda.

¹⁷ rad‑ssiqarġ ulawn n‑ayt‑miṣr f‑ad‑kšmn ula ntni tigira‑nun. hati rad‑nruġ firɛawn ula kullu inmmaġn‑ns ula lkrarṣ d‑imnayn‑ns.

¹⁸ rad‑issann ayt‑miṣr is‑giġ rbbi da‑bdda‑illan lliġ nriġ firɛawn d‑lkrarṣ d‑imnayn‑ns.»

¹⁹ imatti ilmma lmalak n‑rbbi lli‑izggurun i‑ukabar n‑ayt‑israyil, iwrri s‑tġurdin‑nsn. tmatti ula tannalt n‑umdlu lli‑asn‑izggurun, tbidd ġ‑tġurdin,

²⁰ tg awttu ibḍan gr‑ukabar n‑ayt‑miṣr d‑win ayt‑israyil. illas‑umdlu f‑yat‑tsga, yisfiw i‑ṭayyaḍ iḍ kullut. ur‑ilkim‑ukabar wayya.

²¹ imdi‑n musa afus‑ns ġakudan s‑umda, yawi‑d sidi rbbi aḍu itjhhdn zġ‑usġlay n‑tafukt, ar‑idḥḥi aman iḍ‑an kullut, ibḍu aman f‑sin aylliġ‑di‑tban taġart.

²² kšmn ayt‑israyil ġakudan s‑wammas n‑umda, ftun f‑wakal iqqurn, ilin‑waman zund agadir f‑ufasi‑nsn ula f‑uẓlmaḍ‑nsn.

²³ ẓẓun gisn ayt‑miṣr, zaydn‑iysan n‑firɛawn d‑lkrarṣ d‑imnayn‑ns kullutn, kšmn ġ‑taġart s‑wammas n‑umda tiġurdin‑nsn.

^24-25 ġakudan ur‑ta‑d‑ifaw‑wass, yaggʷ‑n sidi rbbi s‑ukabar n‑ayt‑miṣr zġ‑tannalt n‑lɛafiyt d‑umdlu. issġẓẓ rrwayḍ n‑lkrarṣ aylliġ ẓẓaynt bahra. iduyy‑kullu‑ukabar n‑ayt‑miṣr ar‑ssġuyyun: «wrryat zġ‑ayt‑israyil trwlm, ašku ibidd didsn rbbi da‑bdda‑illan, immaġ d‑ayt‑miṣr.»

²⁶ yini sidi rbbi ġakudan i‑musa: «mdi‑n afus‑nk f‑umda f‑ad‑wrrin‑waman f‑ayt‑miṣr ula lkrarṣ d‑imnayn‑nsn.»

²⁷ imdi‑n musa afus‑ns f‑umda. ġmklli‑d‑itfaw‑wass, ar‑d‑itwrri‑umda s‑illiġ yadlli illa. rwln ayt‑miṣr afn‑in aman ġ‑lgddam‑nsn, issayk fllasn sidi rbbi s‑unggay n‑umda.

²⁸ wrrin‑waman dln lkrarṣ d‑imnayn ula kullu ikabarn n‑firɛawn lli‑tn‑ḍfurnin s‑wammas n‑umda. ur‑d‑gisn‑iqama ḥtta yan.

²⁹ imma ayt‑israyil ftan f‑taġart ġ‑wammas n‑umda, gn‑asn‑waman zund agadir f‑ufasi ula f‑uẓlmaḍ.

³⁰ ġassan a‑ijjnjm sidi rbbi ayt‑israyil zġ‑ufus n‑ayt‑miṣr. ẓrn ayt‑israyil kullu ayt‑miṣr lli‑mmutnin, ilin ġ‑tamiw n‑umda.

³¹ lliġ ẓran ayt‑israyil mnšk a‑itjhhd‑ufus n‑sidi rbbi f‑ayt‑miṣr, iksaḍn zġ‑gis bahra. amnn bahra s‑rbbi da‑illan ula s‑uh̬ddam‑ns musa.