ufuġ 13 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

akttay f‑lɛjayb lli‑iskr rbbi

¹ yini sidi rbbi i‑musa:

² «ẓli‑yyi kullu ifh̬dditn ġ‑dar ayt‑israyil. kullu wanna‑d‑izwurn zġ‑waḥlig ġ‑mddn ula lbhaym, han winu a‑iga.»

³ yini musa i‑kullu mddn‑an: «swingimat‑d bdda ġassad lli‑ġ‑di‑tffuġm zġ‑miṣr, zġ‑wakal n‑tsmugit. yiwi‑kʷn‑d zġ‑gis sidi rbbi s‑ufus itjhhdn. swingimat‑t‑id a‑ur‑sar‑gis‑tššm kra iktin.

⁴ ġassad ġ‑wayyur n‑‹abib› ayd tffuġm.

⁵ kraygatt imal ayyur‑ad a‑ra‑ttqasam lɛid, ġakud nna‑kʷn‑išškšm sidi rbbi s‑wakal n‑ayt‑kanɛan d‑ayt‑ḥit d‑ayt‑amur d‑ayt‑ḥiwi d‑ayt‑yabus, a‑t‑igan d‑wakal lli‑f‑iggulla i‑id‑babatun ad‑awn‑t‑ifk, ig akal lli‑ġ‑ingi‑ugʷfay d‑tammnt.

⁶ ssa n‑uwssan a‑ra‑tšttam arh̬ṣiṣ, d‑wis ssa n‑uwssan‑an a‑ra‑tskrm lɛid i‑sidi rbbi.

⁷ arh̬ṣiṣ a‑ra‑tšttat ssa n‑uwssan‑an. ur‑ra‑darun‑yili kra iktin ula kra n‑th̬mirt ġ‑kullu akal‑nun.

⁸ ini ġassan i‑yuk: ‹ar‑skarġ ġmkad ašku swangimġ‑d maylli flla iskr sidi rbbi ġakud lliġ‑d‑ffuġġ zġ‑miṣr.›

⁹ rad‑ak‑ig mayan zund tamatart ġ‑tmšt n‑ufus‑nk, ula akttay ġ‑gr‑walln‑nk, f‑ad‑bdda‑tswingimt ġ‑ulmmud n‑sidi rbbi ar‑fllas‑tsawalt. ašku s‑ufus itjhhdn a‑s‑k‑id‑issufġ zġ‑miṣr.

¹⁰ kraygatt asggʷas a‑ra‑tskart lɛid‑ad ġ‑uzmz‑ns.

¹¹ «ġakud nna‑kʷn‑išškšm sidi rbbi s‑wakal n‑ayt‑kanɛan, ifk‑awn‑t ġmklli‑s‑awn‑iggulla kunni d‑id‑babatun,

¹² akkayat i‑sidi rbbi kraygatt awtm nna‑d‑izwurn zġ‑waḥlig. ašku kullu ifh̬dditn ġ‑lksibt‑nun, win sidi rbbi ad‑gan.

¹³ imma kraygatt ifh̬ddi ġ‑iġʷyal, a‑ti‑tfrut s‑yan‑ulqqaġ. iġ‑ur‑ti‑tfrit, trẓt amggrḍ‑ns. kraygatt ifh̬ddi ġ‑tarwa n‑bnadm, a‑ti‑tfrut.

¹⁴ ġilad s‑uflla iġ‑k‑isqsa yuk: ‹ma‑tga lmɛna n‑mayad?› tinit‑as: ‹s‑ufus itjhhdn a‑s‑aġ‑d‑issufġ sidi rbbi zġ‑miṣr, zġ‑wakal n‑tsmugit.

¹⁵ lliġ issiqar firɛawn ih̬f‑ns yagʷi ad‑aġ‑d‑irẓm, inġ sidi rbbi kraygatt ifh̬ddi ġ‑wakal n‑miṣr, ifh̬dditn n‑mddn ula win lbhaym. mayan a‑f‑a‑qqrṣġ i‑kraygatt awtm nna‑d‑izwurn zġ‑waḥlig, fkġ‑t i‑sidi rbbi. imma ifh̬dditn ġ‑tarwa‑nu, ar‑tn‑frruġ.

¹⁶ rad‑ak‑ig mayan zund tamatart ġ‑tmšt n‑ufus‑nk ula lyamart ġ‑gr‑walln‑nk. ašku s‑ufus itjhhdn a‑s‑aġ‑d‑issufġ sidi rbbi zġ‑miṣr.› »

tannalt n‑lɛafiyt d‑umdlu

¹⁷ lliġ‑d‑irẓm firɛawn i‑mddn ad‑ddun, ur‑tn‑issayk rbbi akal n‑ayt‑filisṭin, wah̬h̬a‑d‑srsn‑yakmur. ašku inna rbbi: «a‑ur‑imil tʷgraẓ mddn iġ‑ftan mnaggarn‑in d‑imiġ, skrn f‑ad‑wrrin s‑miṣr.»

¹⁸ yawi‑tn‑d rbbi s‑lh̬la, isslulliy‑tn s‑tsga n‑umda azggʷaġ. ġmkan a‑s‑d‑iwnn ayt‑israyil s‑ikabarn‑nsn zġ‑wakal n‑miṣr.

¹⁹ musa yusi dids ih̬ṣan n‑yusf, ašku yusf issgulla tarwa n‑israyil yini‑asn: «s‑ṣṣaḥt ra‑d‑srun‑yakmur rbbi, tssawnm didun ih̬ṣan‑inu zġ‑ġid.»

²⁰ muddun mddn zġ‑ṣukkut, srsn ġ‑itam lli‑iwalan n‑lh̬la.

²¹ izwur‑asn sidi rbbi ġ‑tannalt n‑umdlu ad‑asn‑iml aġaras ġ‑uzal, izwur‑asn ġ‑tannalt n‑lɛafiyt ad‑asn‑isufu d‑iyḍ. ġmkan a‑s‑a‑fttun ġ‑uzal ula iḍ.

²² ur‑a‑ttitti tannalt n‑umdlu ġ‑uzal ula tin lɛafiyt ġ‑iyḍ, hatti tzwur bdda i‑mddn.