ufuġ 12 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

idammn n‑ilqqaġn

¹ isawl‑d sidi rbbi s‑musa d‑harun ġ‑tmazirt n‑miṣr yini‑asn:

² «ayyur‑ad a‑ra‑ig ayyur amzwaru ġ‑darun, ig ih̬f n‑usggʷas.

³ sawlat s‑kullu tamunt n‑ayt‑israyil, tinim‑asn: ‹wis mraw‑uwssan ġ‑wayyur‑ad, illa f‑kraygatt argaz bu‑tgmmi a‑d‑yawi yan‑ulqqaġ, yili‑ulqqaġ i‑takat.

⁴ iġ‑drusn ayt‑tgmmi ur‑ẓḍarn i‑ulqqaġ kullut, imšaška‑d‑urgaz d‑wadjar‑ns f‑ad‑bḍun alqqaġ f‑tġamatin, ġunšk nna‑gan ntni nġd ġunšk lli‑mi‑iẓḍar kud yan a‑t‑išš.

⁵ kraygatt alqqaġ a‑ur‑gis‑yili kra n‑lɛib, ig awtm ikkan asggʷas, tstim‑t‑id zġ‑gr ihray nġd aġaḍn.

⁶ tgablm‑t ar ass wis kkuẓ d‑mraw (14) ġ‑wayyur‑ad, f‑ad‑asn‑kullu‑ġrṣn mddn n‑tamunt n‑ayt‑israyil ġ‑takʷya n‑tafukt.

⁷ asin ilmma kra ġ‑idammn, ġʷmn srsn tigʷmma lli‑ġ‑rad‑ššn f‑snat‑tsgiw n‑imi d‑iggi‑ns.

⁸ ġ‑iḍ‑an rad‑ššn tifiyi išwin f‑lɛafiyt d‑urh̬ṣiṣ d‑ifskan ssmumnin.

⁹ ih̬ṣṣa‑tt a‑tšwi f‑lɛafiyt. a‑ur‑zġ‑gis‑tššm kra ur‑inwin, ula tssnwam‑t ġ‑waman. zaydat tššm ih̬f ula ifnza ula ilawan.

¹⁰ a‑ur‑tflm kra ar ṣbaḥ, d‑iġ‑awn‑iqama ar ṣbaḥ, tjdrm‑t s‑lɛafiyt.

¹¹ ġmkad a‑s‑ra‑stti‑tššm. s‑taggʷst ġ‑wammas‑nun, d‑turẓiyin ġ‑iḍarn‑nun, d‑uɛmud ġ‑ufus‑nun, tššm‑tt s‑zzrb. hati iga lɛid n‑usurf i‑rbbi da‑bdda‑illan.

¹² ašku ġ‑iḍ‑an a‑ġ‑rad‑kġ tamazirt n‑miṣr, nġġ kullu ifh̬dditn n‑mddn ula win lksibt, utġ lḥukm f‑kullu ma‑tɛbadn ayt‑miṣr. nkki a‑igan wad bdda illan.

¹³ imma kunni, idammn‑an a‑rad‑awn‑ig tamatart f‑tgʷmma lli‑ġ‑tllam. tigmmi nna‑f‑ẓriġ idammn, ra‑stt‑ssurfġ. ur‑ra‑n‑darun‑tkšm tagat inqqan lli‑s‑rad‑utġ tamazirt n‑miṣr.

tinbaḍin n‑lɛid n‑usurf

¹⁴ « ‹kttyat‑d ass‑ad asggʷas ar asggʷas, kullu mayd iftan ġ‑kraygatt tasut n‑tasutin, a‑darun‑ig lɛid n‑rbbi da‑bdda‑illan.

¹⁵ ssa n‑uwssan n‑lɛid ra‑tšttam arh̬ṣiṣ. sittyat tah̬mirt zġ‑tgʷmma‑nun ass amzwaru, ašku zġ‑wass izwarn ar wis ssa‑uwssan, wanna iššan kra iktin, ra‑ityawkkas zġ‑gr ayt‑israyil.

¹⁶ ass amzwaru ra‑ig win‑umnaggar f‑rbbi, ula wis ssa n‑uwssan ra‑ig win‑umnaggar f‑rbbi. a‑ur‑ttsalam kra n‑twuri ġ‑sin‑uwssan‑an, abla a‑tjjujadm tirmt lli‑rad‑kullu‑tššm.

¹⁷ ġmkan a‑s‑ra‑tskarm lɛid n‑urh̬ṣiṣ, ašku ġ‑wass‑ad a‑ġ‑d‑ssufġġ ikabarn‑nun zġ‑wakal n‑miṣr. f‑mayan a‑f‑rad‑bdda‑tskarm lɛid ġ‑wass‑ad, kullu mayd iftan ġ‑kraygatt tasut n‑tasutin.

¹⁸ arh̬ṣiṣ a‑ra‑tšttam ġ‑tdggʷat n‑wass wis kkuẓ d‑mraw (14) ġ‑wayyur izwarn, ar tadggʷat n‑wass wis sin id‑mraw d‑yan (21).

¹⁹ a‑ur‑tflm kra iktin ġ‑tgʷmma‑nun ssa n‑uwssan‑an. ašku wanna iššan ma‑iktin, han ra‑ityawkkas zġ‑gr tamunt n‑ayt‑israyil, ig‑iyt abrrani nġd gu‑darun.

²⁰ innaġ tzdġm a‑ur‑tššm kra iktin. arh̬ṣiṣ a‑ra‑tšttam.› »

²¹ iġr‑d ilmma musa i‑kullu imġarn n‑ayt‑israyil yini‑asn: «styayt ilqqaġn‑nun, a‑iġrṣ kraygatt bu‑takat i‑ulqqaġ n‑usurf,

²² yasi‑d ilmma yat‑tfust n‑uzukkʷni, issayk‑tt‑id ġ‑idammn ġ‑uruku, iġʷm srsn tisgiw n‑imi d‑iggi‑ns, tqamam kullu ġ‑tgmmi. a‑ur‑d‑iffuġ yan zġ‑imi n‑tgmmi‑ns ar ṣbaḥ.

²³ ašku ra‑izri sidi rbbi a‑yut ayt‑miṣr. tigmmi nna‑ġ‑iẓra idammn ġ‑tsgiw n‑imi d‑iggi‑ns, ra‑issurf imi‑an. ur‑ra‑yadj lmalak n‑lfna a‑ikšm s‑tgʷmma‑nun a‑kʷn‑yut.

²⁴ «ġmkan a‑ra‑tskarm ġ‑lɛid‑nun, kud yan giwn ula tarwa‑nun kullu mayd iftan,

²⁵ ar‑ttqasam tanbaṭṭ‑an ġakud nna‑truḥm akal lli‑rad‑awn‑ifk sidi rbbi ġmklli‑s‑awn‑inna.

²⁶ iġ‑kʷn‑sqsan tarwa‑nun: ‹mah̬ a‑ttqasam tinbaḍin‑ad?›

²⁷ tinim‑asn: ‹iga tiġrṣi n‑usurf n‑rbbi da‑bdda‑illan. ašku issurf tigʷmma n‑ayt‑israyil ġ‑miṣr. yut ayt‑miṣr, ifl tigʷmma‑nġ.› » knun mddn ġakudan sjdn i‑rbbi.

²⁸ nkrn ilmma ayt‑israyil skrn ġmklli‑f‑yuṣṣa sidi rbbi musa d‑harun. ġmkan ad‑skrn.

lmut n‑ifh̬dditn

²⁹ tuẓẓunt n‑iḍ‑an yut sidi rbbi kullu ifh̬dditn ġ‑tmazirt n‑miṣr, zġ‑ifh̬ddi n‑firɛawn lli‑iskiwsn f‑lɛrš ar ifh̬ddi n‑unkraf lli‑igawrn ġ‑usraf. yut ula kraygatt ifh̬ddi ġ‑lbhaym.

³⁰ inkr firɛawn ġ‑iḍ‑an ntta d‑imɛawann‑ns d‑ayt‑miṣr kullutn ar‑ssġuyyun ar‑allan, ašku ur‑tlli‑tgmmi ġ‑wakal n‑miṣr ġ‑ur‑immut kra n‑yan.

³¹ iġr‑d firɛawn i‑musa d‑harun ġ‑iḍ‑an yini‑asn: «nkrat tffuġm zġ‑gr mddn‑inu kunni d‑ayt‑israyil kullukʷn, tddum tqasam rbbi da‑illan ġmklli‑s‑tnnam.

³² awyat ula ulli‑nun d‑imugayn‑nun ġmklli‑s‑tnnam, tftum tdɛum‑iyi ula nkki s‑lbaraka.»

ufuġ n‑ayt‑israyil zġ‑miṣr

³³ nkrn ayt‑miṣr ġakudan ar‑zzrabn ayt‑israyil ad‑ffuġn zġ‑tmazirt ġil ġil a‑ur‑maṭln, ašku ar‑ttinin i‑ngratsn: «han rad‑kullu‑nmmt.»

³⁴ asin ayt‑israyil lɛjin‑nsn bla tah̬mirt, gn‑t ġ‑tqṣray, ssmuttln‑tnt ġ‑tmlsa‑nsn gn‑tnt f‑tġʷraḍ‑nsn.

³⁵ ḍalbn yadlli i‑ayt‑miṣr tiġawsiwin n‑nnʷqrt d‑win‑uwrġ ula timlsa, ġmklli‑s‑asn‑inna musa.

³⁶ ifk‑asn sidi rbbi rrḍa ġ‑dar ayt‑miṣr ġ‑mad‑asn‑ḍalbn. ġmkan a‑s‑ššan ayt‑miṣr.

³⁷ muddun ayt‑israyil ġakudan zġ‑raɛmsis s‑ṣukkut. yili ma‑itggan sḍis id‑miyya n‑walf (600 000) n‑urgaz ftun f‑uḍar, ilint‑ula‑tmġarin d‑tarwa mẓẓinin.

³⁸ awnn didsn ula yan mnnaw n‑iġribn ula tugtt n‑lksibt ġ‑uwlli d‑imugayn.

³⁹ ssnun lɛjin lli‑d‑didsn‑iwin zġ‑miṣr, skrn zġ‑gis tirh̬ṣiṣin lli‑ur‑iktin ašku ssmsrn‑tn ayt‑miṣr, ur‑tn‑udjin ad‑skrn tirmt i‑uġaras.

⁴⁰ kkuẓ id‑miyya d‑kraḍ id‑mraw (430) n‑usggʷas ad‑kkan ayt‑israyil ġ‑miṣr.

⁴¹ lliġ izri‑usggʷas wis kkuẓ id‑miyya d‑kraḍ id‑mraw (430), ġ‑wass amggʷaru n‑usggʷas‑an a‑ġ‑d‑kullu‑ffuġn ikabarn n‑mddn n‑sidi rbbi zġ‑wakal n‑miṣr.

⁴² iḍ‑an a‑yuwz sidi rbbi f‑a‑tn‑d‑issufġ zġ‑tmazirt n‑miṣr. f‑mayan a‑f‑a‑bdda‑tawzn ayt‑israyil ġ‑iḍ‑an f‑ism n‑rbbi da‑bdda‑illan, asggʷas ar asggʷas ġ‑kraygatt tasut n‑tasutin.

⁴³ isawl‑d sidi rbbi s‑musa d‑harun yini‑asn: «ġmkad ad‑gant‑tnbaḍin n‑tġrṣi n‑usurf. a‑ur‑zġ‑gis‑išš yan igan aġrib,

⁴⁴ walaynni ismg nna‑ittsġan s‑iqaridn, išš‑iyt zġ‑gis iġ‑as‑tẓẓullam i‑ddat‑ns.

⁴⁵ a‑ur‑zġ‑gis‑išš imkiri ula aġrib nna‑darun‑igan anbgi.

⁴⁶ d‑ugʷns n‑tgmmi a‑ġ‑ra‑stti‑tššm. a‑ur‑tasim kra ġ‑tfiyi s‑brra n‑tgmmi, ula trẓam ih̬ṣan‑ns.

⁴⁷ illa f‑tamunt n‑ayt‑israyil kullutt a‑tqasa lɛid.

⁴⁸ iġ‑igawr kra n‑ubrrani ġ‑darun, yiri a‑didun‑išš lɛid n‑usurf n‑rbbi da‑bdda‑illan, ih̬ṣṣa a‑izzri ntta ula kullu iwtman‑ns taẓallit i‑ddat. yakmur‑d ilmma a‑išš lɛid, tgm‑t ġakudan d‑gu‑darun. walaynni a‑ur‑zġ‑gis‑išš yan ur‑iẓẓullin i‑ddat‑ns.

⁴⁹ yat‑tnbaṭṭ a‑fllawn‑illan la kunni ula abrrani nna‑darun‑igawrn.»

⁵⁰ skrn kullu ayt‑israyil ġmklli‑f‑yuṣṣa sidi rbbi musa d‑harun. ġmkan ad‑skrn.

⁵¹ ass‑an a‑ġ‑d‑issufġ sidi rbbi ayt‑israyil akabar s‑ukabar zġ‑wakal n‑miṣr.