ufuġ 11 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

awal n‑rbbi f‑tagat tamggʷarut

¹ yini sidi rbbi i‑musa: «sul tqama yat tagat išqan a‑srs‑utġ firɛawn d‑ayt‑miṣr. tigira‑ns a‑ra‑kʷn‑yadj a‑tffuġm. s‑ṣṣaḥt ra‑kʷn‑iṭṭay kullukʷn zġ‑tmazirt.

² imma ġilad sawl s‑mddn‑nk tinit‑asn: ‹ḍalbat i‑ayt‑miṣr tiġawsiwin n‑nnʷqrt d‑uwrġ, kraygatt argaz i‑wadjar‑ns d‑kraygatt tamġart i‑tadjart‑ns.› »

³ ifk sidi rbbi ġakudan i‑mddn‑ns rrḍa ġ‑dar ayt‑miṣr. iga musa ula nttan argaz ihiyyan ġ‑tmazirt n‑miṣr, ġ‑dar imɛawann n‑firɛawn d‑mddn‑ns kullutn.

⁴ isawl musa yini: «ha ma‑inna rbbi da‑bdda‑illan: ‹tuẓẓunt n‑iyḍ ra‑n‑ffuġġ s‑wammas n‑miṣr,

⁵ mmtn kullu ifh̬dditn ġ‑wakal n‑miṣr, zġ‑ifh̬ddi n‑firɛawn lli‑igawrn f‑lɛrš, ar ifh̬ddi n‑tsmgt lli‑iẓẓaḍn ġ‑tama n‑uzrg, ula kraygatt ifh̬ddi ġ‑lbhaym.

⁶ rad‑ssġuyyun ar‑allan ġ‑tmazirt n‑miṣr kullutt. wan ġayan ur‑jji‑illi, ula ra‑sar‑yili.

⁷ imma ayt‑israyil ntni ula lksibt‑nsn, han aydi ur‑ra‑darsn‑issmass ils‑ns, f‑a‑tissanm is‑a‑iẓẓmẓlay rbbi da‑illan ġ‑gr ayt‑miṣr d‑ayt‑israyil.›

⁸ walaynni ra‑n‑dari‑kullu‑huwwdn imɛawann‑ad‑nk, knun ġ‑lgddam‑inu inin‑iyi: ‹ffuġ kiyi ula kullu mddn‑an n‑dar iḍarn‑nk.› tigira n‑mayan a‑rad‑dduġ.» iffuġ‑d musa ġakudan s‑lġaḍab irġan zġ‑dar firɛawn.

⁹ inna sidi rbbi i‑musa: «ur‑ra‑srun‑isflid firɛawn, baš ad‑igatnt lɛjayb‑inu ġ‑wakal n‑miṣr.»

¹⁰ iskr musa d‑harun kullu lɛjayb‑an ġ‑lgddam n‑firɛawn. walaynni issiqar sidi rbbi ul n‑firɛawn, yagʷi a‑irẓm i‑ayt‑israyil ad‑ffuġn tamazirt‑ns.