ufuġ 1 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

ar‑ttigatn ayt‑israyil ġ‑miṣr

¹ ġmkad ad‑gan ismawn n‑tarwa n‑israyil lli‑munnin d‑babatsn yaɛqub s‑tmazirt n‑miṣr, kud yan d‑tawjja‑ns:

² rawbin, šimɛun, lawi, yahuda,

³ yassakar, zabulun, bnyamin,

⁴ dan, naftali, gad, ašir.

⁵ imma yusf illa yadlli ġ‑miṣr. ssa n‑id mraw (70) ad‑gan kullu tarwa n‑tarwa n‑yaɛqub.

⁶ izri ma‑izrin immt yusf d‑aytmas kullutn ula kullu tasut‑an.

⁷ walaynni ayt‑israyil ar‑tarun ar‑tzayadn ar‑ttigatn ar‑tɛmmarn tamazirt.

⁸ zrin isggʷasn iġli‑d yan‑ugllid yaḍni ġ‑miṣr, ur‑issin yusf.

⁹ yini i‑mddn‑ns: «han ayt‑israyil wrrin ggutn. ġir yan kra s‑rad‑fllanġ‑tjhhdn.

¹⁰ nkrat a‑nẓr mamnk a‑ra‑gisn‑ntḥkam a‑ur‑sul‑tzayadn, a‑ur‑imil yili kra n‑imiġ ɛawnn inuwwašn‑nġ mmaġn didnġ, ffuġn ilmma zġ‑wakal‑nġ.»

firɛawn iqṣad a‑tn‑issdullu

¹¹ ġakudan a‑fllasn‑gan iriyasn n‑twizi, irin a‑tn‑ssknun s‑isittitn ẓẓaynin. rarn‑tn ar‑bnnun iġrm n‑fitum d‑win raɛmsis ma‑ġ‑a‑ith̬zan firɛawn.

¹² walaynni kra s‑a‑tn‑ssdullun ar‑ttigatn bahra, ɛmmrn akal. wrrin ayt‑miṣr ksuḍn zġ‑ayt‑israyil,

¹³ ar‑fllasn‑tšqun s‑uggʷar, rarn‑tn ad‑tnhatafn s‑tkrrayt zund ismgan.

¹⁴ ssḥrrun gisn ussan‑nsn s‑tsmugit. ar‑tqasan tallaġt d‑uṭṭibn ula kullu ma‑igan tawuri n‑ikalln. tammara išqan a‑ġ‑tn‑ssh̬dmn zund ismgan.

¹⁵ izayd‑ugllid n‑miṣr isawl s‑tilli ssarunin ist‑ɛibr [ist‑israyil], yat gisnt ism‑ns šifra, yat yaḍni ism‑ns fuɛa,

¹⁶ yini‑asnt: «ġakud nna‑ra‑tssarumt ist‑ɛibr, lkmnt tizi n‑tlalit, iġ‑darsnt‑ilul‑uḥšmi tnġmt‑t, iġ‑darsnt‑tlul‑tḥšmiyt tadjmt‑stt a‑tddr.»

¹⁷ walaynni tilli ssarunin ar‑tuqqarnt rbbi, ur‑skirnt s‑wawal n‑ugllid n‑miṣr, adjnt iḥšmiyn ad‑ddrn.

¹⁸ iġr‑d‑ilmma‑ugllid n‑miṣr i‑tilli ssarunin yini‑asnt: «mah̬ aylliġ tskrmt ġmkan tadjmt iḥšmiyn ad‑ddrn?»

¹⁹ sawlnt‑d tilli ssarunin inint i‑firɛawn: «han timġarin n‑ayt‑ɛibr ur‑gint zund ist‑miṣr. dusnt ntnti, ar‑ttarunt ur‑ta‑tnt‑in‑tlkim talli ra‑tnt‑issaru.»

²⁰ f‑mayan a‑f‑ibark rbbi ġ‑tilli ssarunin, zaydn ar‑ttigatn mddn‑an.

²¹ ula tilli ssarunin, lliġ uqqrnt rbbi, ifk‑asnt ula ntnti tarwa.

²² imma firɛawn izuyd yamr kullu mddn‑ns yini: «aḥšmi nna‑d‑iluln ġ‑dar ayt‑ɛibr, tluḥm‑t‑in ġ‑wasif n‑nnil, tadjm tiḥšmiyin ad‑ddrnt.»