tinbaḍin 9 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

rbbi ra‑ifnu iqbiln tjhhdnin

¹ «sfldat ay‑ayt‑israyil. ġilad a‑ra‑tbbim asif n‑urdun, tkšmm a‑teṭṭafm akal n‑iqbiln mqqurnin tjhhdn fllawn, teṭṭafm ula timdinin dusnin s‑igudar attuynin ar ignwan.

² han ayt‑tmazirt‑an dusn ġzzifn, gn tarwa n‑ɛanaq lli‑f‑a‑tsflidm ar‑fllasn‑ttinin: ‹ma‑iẓḍarn a‑ibidd ġ‑umnid n‑ayt‑ɛanaq?›

³ nniġ‑awn ġassad f‑a‑tissanm, ġwalli rad‑awn‑izwur zund lɛafiyt ifnnun, iga‑t rbbi siditun. nttan a‑ra‑tn‑ifnu, issknuki‑tn ġ‑lgddam‑nun, ard teṭṭafm akal‑nsn. ra‑tn‑laḥ ḥina, ġmklli‑s‑awn‑iqawl sidi rbbi.

⁴ «walaynni ġakud nna‑tn‑iṭṭay rbbi siditun ġ‑lgddam‑nun, a‑ur‑ttinim d‑ih̬f‑nun: ‹f‑ssibt n‑ma‑nga wid ṣlaḥnin a‑f‑aġ‑d‑išškšm sidi rbbi a‑nṭṭaf akal‑ad.› uhu, f‑ssibt n‑lh̬ʷšanat lli‑skarn iqbiln‑an a‑f‑a‑tn‑iṭṭay ġ‑lgddam‑nun.

⁵ urd f‑ssibt n‑is‑tṣlaḥm nġd ṣfan‑uwlawn‑nun a‑f‑ra‑n‑tkšmm teṭṭafm akal n‑iqbiln‑an, walaynni f‑lh̬ʷšant‑nsn a‑f‑a‑tn‑iṭṭay rbbi siditun ġ‑lgddam‑nun, issafu ula awal lli‑s‑iggulla i‑id‑babatun ibrahim d‑isḥaq d‑yaɛqub.

⁶ nniġ‑awn a‑tissanm, urd f‑ssibt n‑is‑tgam wid ṣlaḥnin a‑f‑rad‑awn‑ifk sidi rbbi akal‑ad ifulkin a‑ti‑teṭṭafm, ašku han tgam aqbil mi iqqur ih̬f.»