tinbaḍin 8 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

swangmat‑d lɛjayb n‑rbbi

¹ «rarat lɛaql a‑tskarm s‑kullu luṣiyat lli‑f‑kʷn‑uṣṣaġ ġassad, f‑a‑tddrm ar‑ttigatm, tkšmm akal lli‑f‑iggulla sidi rbbi i‑id‑babatun, teṭṭafm‑t.

² swangmat‑d kullu aġaras lli‑ġ‑awn‑izwur rbbi siditun kkuẓ id‑mraw (40) n‑usggʷas ġ‑lh̬la, baš a‑kʷn‑issdullu ar‑kʷn‑itarm f‑a‑yissan ma‑illan ġ‑uwlawn‑nun, is‑ra‑stti‑ttawim ġ‑luṣiyat‑ns nġd uhu.

³ s‑ṣṣaḥt issdulla‑kʷn ifl‑kʷn s‑laẓ, ifk‑awn ilmma a‑tššm ‹man› lli‑ur‑tssinm kunni wala ssnn‑t id‑babatun. ġmkan a‑s‑awn‑isslmd is‑urd aġrum ka‑s‑a‑itddr bnadm, walaynni ar‑itddr bnadm s‑kraygatt awal nna‑d‑ikkan imi n‑sidi rbbi.

⁴ kunni kkuẓ id‑mraw (40) n‑usggʷas ayad ur‑balant‑tmlsa‑nun wala bzgn iḍarn‑nun.

⁵ swangmat‑d ġilad tissanm ġ‑uwl‑nun izd ġmklli itšqu bnadm d‑tarwa‑ns f‑trbiyt, ġmkan a‑didun‑itšqu rbbi siditun f‑trbiyt‑nun.

⁶ «tawyat‑stt ġ‑kullu ma‑f‑kʷn‑yuṣṣa rbbi siditun, ar‑tfttum ġ‑iġarasn‑ns ar‑t‑bdda‑ttuqqarm.

⁷ ašku rbbi siditun ra‑kʷn‑išškšm s‑wakal ifulkin, ig akal lli‑ġ‑llant talatin n‑waman ula talɛinin d‑iġbula ftanin ġ‑izaġarn ula ġ‑iwrar.

⁸ ig akal lli‑ġ‑llan irdn d‑ṭmẓin d‑waḍil d‑tazart d‑rrmman, ig akal ula n‑zzit d‑tammnt.

⁹ ig akal lli‑ġ‑rad‑awn‑itšaḍ‑uġrum, d‑ur‑ra‑kʷn‑gis‑ih̬ṣṣa yat. ig akal lli‑mi‑gan ula iẓran‑ns uzzal, d‑ra‑tqazm anas ġ‑iwrar‑ns.

¹⁰ hati ra‑tšttam ar‑ttšbaɛm, ar‑ttalġm rbbi siditun f‑wakal ifulkin lli‑awn‑ifka.

¹¹ «rarat lɛaql a‑ur‑tettum rbbi siditun ard twrrim ur‑a‑stti‑ttawim ġ‑luṣiyat‑ns d‑lḥkamat‑ns d‑tnbaḍin‑ns lli‑f‑kʷn‑uṣṣaġ ġassad.

¹² ašku iġ‑tššam tšbɛm, tbnum tigʷmma fulkinin tzdġm gisnt,

¹³ igatn darun imugayn d‑uwlli, tigat darun nnʷqrt d‑uwrġ, yigat‑darun‑wayda bahra,

¹⁴ twrrim ar‑ttallm ih̬f‑nun ġakudan, tettum rbbi siditun lli‑kʷn‑d‑issufġn zġ‑wakal n‑miṣr zġ‑tmazirt n‑tsmugit,

¹⁵ izwur‑awn ġ‑lh̬la yusɛan išqan ġ‑gr ilgʷmaḍn d‑iġrdmiwn lli‑ġ‑illa ssmm d‑ikalln rufanin ġ‑ur‑llin‑waman, issufġ‑awn‑d aman zġ‑uẓru iqqurn,

¹⁶ iššuš‑awn ‹man› lli‑ur‑ssinn id‑babatun ġ‑lh̬la, baš a‑kʷn‑issdullu ar‑kʷn‑itarm f‑ad‑awn‑t‑issggru s‑lh̬ir,

¹⁷ han da‑ttinim d‑ih̬f‑nun: ‹han adwas‑nġ d‑jjhd n‑ufus‑nġ a‑s‑nwrri nṭṭaf ayda‑yad kullut.›

¹⁸ swangmat‑d rbbi siditun, ašku nttan ad‑awn‑ifkan adwas‑an a‑teṭṭafm ayda, baš a‑izzga lɛhd lli‑f‑iggulla i‑id‑babatun, ġmklli iskar sul s‑ġassad.

¹⁹ «walaynni iġ‑tddam ard tettum rbbi siditun, tḍfurm id‑rbbi yaḍni ar‑tn‑ttqasam ar‑asn‑tknnum, ha‑yyi ɛlmġ‑kʷn ġassad, ra‑kʷn‑ifnu laḥ‑kʷn.

²⁰ zund iqbiln lli‑ifna sidi rbbi ġ‑lgddam‑nun, ġmkan a‑ra‑kʷn‑ifnu ula kunni, ašku ur‑tti‑tiwim ġ‑wawal n‑rbbi siditun.»