tinbaḍin 7 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

a‑ur‑di‑tmšaškam d‑ayt‑lɛar

¹ «ha ma‑ra‑fllawn‑yili ġakud nna‑kʷn‑isslkm rbbi siditun s‑wakal lli‑s‑ra‑tkšmm a‑ti‑teṭṭafm, tigira n‑ma‑iṭṭay iqbiln‑ad ggutnin ġ‑lgddam‑nun. ayt‑ḥit d‑ayt‑gargaš d‑ayt‑amur d‑ayt‑kanɛan d‑ayt‑fariz d‑ayt‑ḥiwi d‑ayt‑yabus, ssa n‑iqbiln ad‑gan, mqqurn tjhhdn fllawn.

² ġakud nna‑yawn‑tn‑in‑isrs rbbi siditun tnrum‑tn, illa fllawn a‑tn‑kullu‑tfnum. a‑ur‑didsn‑tskrm lɛhd, wala tḥnnam fllasn.

³ a‑ur‑zġ‑darsn‑ttahalm. a‑ur‑takkam istitun i‑tarwa‑nsn, ula da‑di‑ttawim istitsn i‑tarwa‑nun,

⁴ a‑ur‑ssgrawln tarwa‑nun ard fln rbbi siditun, ddun ar‑tqasan id‑rbbi yaḍni, iznd fllawn lġaḍab n‑rbbi siditun, ifnu‑kʷn ġakudan.

⁵ uhu, ha ma‑fllawn‑illan ad‑asn‑ti‑tskrm. h̬lwat‑asn ikʷrkar lli‑f‑a‑tbh̬h̬arn, trẓm ula ifariwn lli‑mi‑knnun, tbbim tiggjda n‑‹ašrah›, tjdrm s‑lɛafiyt kullu ma‑igan ṣṣurt inqšn.

iẓli‑kʷn rbbi a‑tgm wins

⁶ «ašku aqbil amẓlay a‑tgam, iẓli‑kʷn rbbi siditun zġ‑gr kullu iqbiln n‑ddunit a‑tgm wins.

⁷ urd f‑ssibt n‑ma‑tggutm f‑iqbiln yaḍni a‑f‑kʷn‑ira sidi rbbi iẓli‑kʷn. s‑ṣṣaḥt han kunni a‑idrusn ġ‑iqbiln kullutn.

⁸ walaynni f‑ssibt n‑ma‑fllawn‑iḥnna sidi rbbi, yiri a‑issafu ula tagallit lli‑s‑iggulla i‑id‑babatun, mayan a‑f‑kʷn‑d‑issufġ s‑ufus itjhhdn, ifukku‑kʷn‑d zġ‑tmazirt n‑tsmugit, zġ‑ufus n‑firɛawn agllid n‑miṣr.

⁹ issanat ġilad izd rbbi siditun a‑igan rbbi n‑ṣṣaḥt, ig rbbi da‑izgan ġ‑wawal‑ns, ig wad issuwfan lɛhd ula tayri idumn i‑walf n‑tasut n‑willi dar iɛzza awin‑tt bdda ġ‑luṣiyat‑ns.

¹⁰ ig wad itraran i‑winna‑t‑kurhanin mad‑asn‑igan, ifnu‑tn. han ur‑ra‑irh̬u d‑wanna‑t‑ikurhan, rad‑as‑irar f‑mad‑as‑igan.

¹¹ rarat lɛaql ad‑bdda‑tskarm s‑luṣiyat d‑tnbaḍin d‑lḥkamat‑ad lli‑f‑kʷn‑uṣṣaġ ġassad.

¹² «iġ‑a‑tsflidm s‑lḥkamat‑ad, tzgam gisnt ar‑srsnti‑tskarm, ra‑iqama rbbi siditun ġ‑lɛhd‑ns ula tayri‑ns izgan lli‑s‑iqawl s‑tgallit i‑id‑babatun.

¹³ ra‑giwn‑iḥnnu, ibark giwn, issigat‑kʷn. ra‑ig lbaraka ġ‑lġllt n‑ddat‑nun ula tin‑wakal‑nun, ibark ġ‑irdn d‑waḍil d‑zzit, ibark ġ‑lġllt n‑lksibt‑nun ġ‑warrawn n‑imugayn ula win‑uwlli ġ‑wakal lli‑f‑iggulla i‑id‑babatun ad‑awn‑t‑ifk.

¹⁴ imbarkiyn a‑ra‑tgm uggʷar n‑kullu iqbiln. ur‑ra‑giwn‑yili kra n‑urgaz ula kra n‑tmġart ur‑iṭṭafn tarwa, ula illa ġ‑lksibt‑nun.

¹⁵ ra‑n‑fllawn‑issanf sidi rbbi kullu ma‑igan tamaḍunt. ḥtta yan ġ‑waṭṭann šqanin lli‑tẓram ġ‑miṣr ur‑ra‑t‑id‑fllawn‑isrs. walaynni ra‑tn‑in‑izzugz f‑kullu winna‑kʷn‑kurhanin.

¹⁶ illa fllawn a‑thlkm kullu iqbiln lli‑rad‑awn‑in‑isrs rbbi siditun. rarat lɛaql a‑ur‑gisn‑ttḥnnum wala da‑ttqasam id‑rbbi‑nsn, a‑ur‑kʷn‑in‑tġwi‑tẓqqurt‑nsn.

rbbi ra‑tn‑iṭṭay s‑warẓẓan

¹⁷ «iġ‑idda ard‑awn‑yini ih̬f‑nun: ‹iqbiln‑an tjhhdn fllanġ, mamnk a‑s‑ra‑namẓ akal‑nsn?›

¹⁸ a‑ur‑zġ‑gisn‑tiksaḍm. swangmat‑d maylli iskr rbbi siditun i‑firɛawn d‑kullu ayt‑miṣr.

¹⁹ swangmat‑d tassasin šqanin lli‑tẓram, ula timitar d‑lɛjayb lli‑s‑kʷn‑d‑issufġ rbbi siditun s‑uġruḍ itjhhdn d‑ufus imdin. ġmkan a‑ra‑iskr rbbi siditun i‑kullu iqbiln lli‑zġ‑tksuḍm.

²⁰ ašku rbbi siditun ra‑itazn id‑warẓẓan mqqurnin s‑wammas‑nsn, ard ifnu winna qamanin rgsn fllawn.

²¹ a‑ur‑zġ‑gisn‑tiksaḍm, ašku rbbi siditun illa ġ‑wammas‑nun, ig ntta rbbi imqqurn issiwidn.

²² imikk s‑imikk a‑s‑ra‑iṭṭay rbbi siditun iqbiln‑an ġ‑lgddam‑nun. ur‑ra‑tn‑thlkm ġ‑yat‑twal, a‑ur‑imil igatn fllawn luḥuš ġ‑wakal‑an.

²³ walaynni rbbi siditun ra‑tn‑issduyy s‑uduyy išqan, isrs‑awn‑tn‑in ġ‑lgddam‑nun ard‑tn‑laḥ.

²⁴ rad‑awn‑in‑isrs igldan‑nsn ġ‑ufus‑nun, tsfiḍm ismawn‑nsn zġ‑ddu ignwan. ur‑ra‑yiẓḍar yan a‑kʷn‑iḥṣar ard‑tn‑kullu‑tfnum.

²⁵ jdrat s‑lɛafiyt kullu ma‑igan ṣṣurt inqšn n‑id‑rbbi‑nsn, trarm lɛaql a‑ur‑tirim nnʷqrt ula urġ lli‑gisnt‑illan, wala tusim‑t i‑ih̬f‑nun, a‑ur‑kʷn‑in‑tġwi‑tẓqqurt‑nsnt. ašku tajlh̬it ad‑gant dar rbbi siditun.

²⁶ a‑ur‑tšškšmm kra ijlh̬n s‑tgmmi‑nun, a‑ur‑kʷn‑dids‑ih̬zu. krhwat‑t bahra tḥgrm‑t, ašku h̬ziyt a‑iga.»