tinbaḍin 6 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

rrḍa n‑rbbi

¹ «ġmkad ad‑gant luṣiyat d‑tnbaḍin d‑lḥkamat lli‑f‑iyi‑yuṣṣa rbbi siditun ad‑awn‑tnt‑sslmdġ, baš ad‑bdda‑srsnti‑tskarm ġ‑wakal lli‑s‑ra‑tbbim asif teṭṭafm‑t.

² ġmkad a‑s‑ra‑ttuqqarm rbbi siditun, iġ‑a‑stti‑ttawim ġ‑kullu tinbaḍin‑ns d‑luṣiyat‑ns lli‑f‑kʷn‑uṣṣaġ, kunni d‑tarwa‑nun ula tarwa n‑tarwa‑nun, kullu ussan n‑tudrt‑nun. d‑ġmkad a‑s‑rad‑igatn‑uwssan‑nun.

³ sfldat ay‑ayt‑israyil trarm lɛaql ad‑bdda‑srsnti‑tskarm, baš a‑tilim ġ‑lh̬ir, tigatm bahra ġ‑wakal lli‑ġ‑ingi‑ugʷfay d‑tammnt, ġmklli‑s‑awn‑iqawl rbbi da‑illan ig rbbi n‑id‑babatun.

⁴ «sfld a‑israyil. rbbi da‑bdda‑illan, nttan waḥdut a‑igan rbbi‑nġ.

⁵ a‑ttirit rbbi sidik zġ‑ttmi n‑ih̬f‑nk d‑ttmi n‑uwl‑nk d‑ttmi n‑tẓḍḍart‑nk.

⁶ iwaliwn‑ad lli‑f‑k‑uṣṣaġ ġassad, ḥḍu‑tn ġ‑uwl‑nk,

⁷ ar‑tn‑bdda‑tsslmadt i‑tarwa‑nk, ar‑tn‑taddrt ġakud nna‑tskiwst ġ‑tgmmi‑nk, d‑ġakud nna‑tftit ġ‑uġaras, d‑ġakud nna‑tgnt ula ġakud nna‑tnkrt.

⁸ krs‑tn ad‑gn tamatart ġ‑tmšt n‑ufus‑nk, gn lyamart ġ‑gr‑walln‑nk,

⁹ tarat‑tn f‑tsgiw n‑imi n‑tgmmi‑nk ula f‑win‑tmdint‑nk.

¹⁰ «ġakud nna‑kʷn‑išškšm rbbi siditun s‑wakal lli‑f‑iggulla i‑id‑babatun ibrahim d‑isḥaq d‑yaɛqub ad‑awn‑t‑ifk, ra‑n‑gis‑tafm timdinin mqqurnin fulkinin, urd kunni a‑tnt‑ibnan.

¹¹ tafm‑n gis tigʷmma ɛmmrnin s‑tmih̬ar, urd kunni a‑tnt‑iɛmmrn. tafm‑n una ttġzanin, urd kunni a‑tn‑iġzan. tafm‑n igran n‑waḍil d‑urtan n‑zzit, urd kunni a‑tn‑iẓẓan, rad‑zġ‑gisn‑tšttam ar‑ttšbaɛm.

¹² rarat lɛaql ġakudan, han da‑tettum rbbi siditun lli‑kʷn‑d‑issufġn zġ‑wakal n‑miṣr, zġ‑tmazirt n‑tsmugit.

¹³ wad bdda illan ig rbbi‑nun, nttan a‑ttuqqarm ar‑ti‑ttqasam ar‑ttgallam s‑ism‑ns.

¹⁴ «a‑ur‑tsiggilm s‑kra n‑id‑rbbi yaḍni ġ‑gr id‑rbbi n‑iqbiln lli‑awn‑sutlnin.

¹⁵ ašku rbbi siditun lli‑illan ġ‑wammas‑nun, hati iga wad išqan f‑ma‑igan wins. a‑ur‑fllawn‑iznd lġaḍab‑ns, ifnu‑kʷn zġ‑uwdm n‑wakal.

¹⁶ a‑ur‑ttarmm rbbi siditun ġmklli‑ti‑turmm ġ‑massa.

¹⁷ awyat‑stt bdda ġ‑luṣiyat n‑rbbi siditun, ar‑tzzgam tuggʷa‑ns d‑tnbaḍin‑ns lli‑f‑kʷn‑yuṣṣa.

¹⁸ skarat maylli iṣlaḥn d‑maylli ifulkin ġ‑iẓri n‑rbbi siditun, baš a‑tilim ġ‑lh̬ir, tkšmm akal ifulkin lli‑f‑iggulla a‑t‑ifk i‑id‑babatun, teṭṭafm‑t kunni,

¹⁹ tigira n‑ma‑iṭṭay rbbi siditun kullu inuwwašn‑nun ġ‑lgddam‑nun, ġmklli‑s‑inna s‑wawal izgan.

²⁰ «ġ‑mayd yuškan, iġ‑k‑isqsa yuk: ‹ha tuggʷa‑yad d‑tnbaḍin‑ad d‑lḥkamat‑ad, mah̬ aylliġ‑kʷn‑srsnt‑yuṣṣa rbbi siditnġ?›

²¹ tsawlt ġakudan tinit i‑yuk: ‹nkka‑tt‑in nga ismgan ġ‑dar firɛawn ġ‑miṣr. issufġ‑aġ‑d sidi rbbi zġ‑miṣr s‑ufus itjhhdn.

²² iskr sidi rbbi timitar d‑lɛjayb mqqurnin šqanin f‑miṣr ula f‑firɛawn d‑kullu ayt‑tgmmi‑ns, nẓra‑tnt nkkʷni.

²³ issufġ‑aġ‑d baš ad‑aġ‑d‑yawi s‑ġid, ifk‑aġ akal lli‑f‑iggulla i‑id‑babatnġ ad‑asn‑t‑ifk.

²⁴ yuṣṣa‑yaġ sidi rbbi a‑nskar s‑kullu tinbaḍin‑ad ar‑bdda‑ntuqqar rbbi siditnġ, baš a‑nili ġ‑lh̬ir kullu ussan‑nġ, ar‑itḥṣar f‑tudrt‑nġ. mayan a‑f‑nqama nlla sul s‑ġassad.

²⁵ rrḍa n‑rbbi siditnġ a‑rad‑aġ‑yili, iġ‑a‑bdda‑ntrara lɛaql ar‑nskar s‑kullu luṣiyat‑ad lli‑f‑aġ‑yuṣṣa.› »