tinbaḍin 4 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

awyat‑stt bdda ġ‑luṣiyat n‑rbbi

¹ «ġilad ay‑ayt‑israyil, sfldat s‑tnbaḍin ula lḥkamat lli‑rad‑awn‑sslmdġ, tzaydm ar‑srsnti‑tskarm. ġmkad a‑s‑ra‑tddrm, tkšmm teṭṭafm akal lli‑awn‑ifka rbbi da‑bdda‑illan ig rbbi n‑id‑babatun.

² awal‑ad‑s‑kʷn‑uṣṣaġ, a‑ur‑as‑tzaydm yat, ula tnaqṣm‑as yat, ad‑bdda‑stti‑ttawim ġ‑luṣiyat n‑rbbi siditun lli‑s‑kʷn‑uṣṣaġ.

³ «tẓram s‑walln‑nun maylli iskr rbbi siditun ġ‑uwrir n‑baɛl‑faġur, ġ‑lliġ ifna zġ‑gratun kullu willi itɛbadn ‹baɛl› lli‑igan rbbi n‑faġur.

⁴ imma willi giwn umẓnin ġ‑rbbi siditun, hati kullukʷn tddrm sul s‑ġassad.

⁵ «sslmdġ‑awn yad kullu tinbaḍin d‑lḥkamat lli‑s‑iyi‑yuṣṣa sidi rbbi‑nu, baš a‑tnti‑ttsalam ġ‑wakal lli‑s‑ra‑tkšmm a‑ti‑teṭṭafm.

⁶ awyat‑stt bdda gisn ar‑srsn‑tskarm. ġmkan a‑s‑rad‑ẓrn ayt‑tmizar yaḍni is‑darun lɛaql ula tafhimt. ġakud nna‑sfldn i‑tnbaḍin‑ad, ra‑ttinin: ‹s‑ṣṣaḥt ayt‑lɛaql ula tafhimt a‑iga‑uqbil‑ad ihiyyan.›

⁷ is‑illa kra n‑uqbil yaḍni ihiyya ġmka, yakmur srs rbbi‑ns ġmklli‑d‑srnġ‑yakmur rbbi siditnġ ġakud nna‑srs‑naqra?

⁸ is‑illa kra n‑uqbil ihiyya ġmka, iṭṭaf tinbaḍin d‑lḥkamat ṣlaḥnin zund almmud lli‑rad‑awn‑fkġ ġassad?

⁹ «walaynni rarat lɛaql ad‑bdda‑tgablm ul‑nun kullu ussan n‑tudrt‑nun, a‑ur‑imil tettum tiġawsiwin lli‑ẓrant‑walln‑nun, fiḍnt zġ‑lɛaql‑nun. zaydat ar‑tnti‑taddrm i‑tarwa‑nun d‑tarwa n‑tarwa‑nun.»

a‑ur‑ttqasam id‑rbbi yaḍni

²³ «rarat lɛaql a‑ur‑tettum lɛhd n‑rbbi siditun lli‑didun‑iskr. a‑ur‑tddum tskrm kra n‑ṣṣurt inqšn nġd kra n‑ikʷlan irwasn kra‑f‑kʷn‑yuṣṣa rbbi siditun a‑ur‑darun‑yili.

²⁴ ašku rbbi siditun iga zund lɛafiyt ifnnun, ig wad išqan f‑ma‑igan wins.

²⁵ tigira n‑ma‑turum tarwa ula tarwa n‑tarwa, tmyurm akal‑an, iġ‑tddam ard thlkm ih̬f‑nun, tskrm kra n‑ṣṣurt inqšn trwas kra illan, tsalam ma‑yʷh̬šnn ġ‑iẓri n‑rbbi siditun ard fllawn iġḍb,

²⁶ giġ fllawn ġassad ignna d‑wakal d‑inagan, ra‑kʷn‑ifnu ḥina ġ‑wakal‑an lli‑f‑ra‑tbbim asif n‑urdun a‑ti‑teṭṭafm. ur‑ra‑gis‑tmaṭlm, han ra‑kʷn‑gis‑ifnu laḥ‑kʷn.

²⁷ ra‑kʷn‑issukt sidi rbbi ġ‑gr iqbiln, twrrim tidrasm ġ‑gr ayt‑tmizar lli‑s‑kʷn‑iṭṭay,

²⁸ ar‑darsn‑ttqasam id‑rbbi n‑ukššuḍ d‑uẓru, tyawskarn s‑ifassn n‑bnadm, ur‑ẓḍarn ad‑ẓrran ula da‑sflidn ula da‑šttan ula da‑tkḍun.

²⁹ walaynni zġ‑ġin a‑zġ‑ra‑di‑tsiggilm rbbi siditun. s‑ṣṣaḥt ra‑ti‑tafm iġ‑a‑ti‑tsiggilm zġ‑ttmi n‑ih̬f‑nun d‑ttmi n‑uwl‑nun.

³⁰ ġ‑uwssan‑an ġ‑a‑tzraym ġ‑tnukmut, ijru‑awn kullu ġayan, ra‑di‑twrrim s‑rbbi siditun ar‑tsflidm s‑ma‑ittini.

³¹ ašku rbbi siditun iga wad itḥnnun, ur‑ra‑kʷn‑ifl ula ifna‑kʷn ula ittu lɛhd lli‑iskr s‑tgallit d‑id babatun.»