tinbaḍin 34 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

lmut n‑musa

¹ yawn musa zġ‑izaġarn n‑muwab s‑uwrir n‑nabu, iġli s‑ih̬f n‑bisgah lli‑ingabaln d‑ariḥa. iml‑as‑n sidi rbbi akal kullut zġ‑gilɛad ar dan,

² iml‑as‑n akal lli‑ra‑ig win ayt‑naftali d‑win ayt‑afraym d‑ayt‑manaššah, iml‑as kullu akal n‑yahuda ar amda imqqurn ġ‑tuggugt.

³ iml‑as lh̬la n‑nagab, iml‑as azaġar n‑ariḥa lli‑igan tamdint n‑tayniwin, ar tamdint n‑ṣuġar.

⁴ yini‑as sidi rbbi: «ġwad a‑igan akal lli‑f‑ggulliġ i‑ibrahim d‑isḥaq d‑yaɛqub a‑t‑fkġ i‑wamud‑nsn. ha‑yyi udjġ alln‑nk a‑t‑in‑ẓrnt, walaynni ur‑ra‑srs‑tbbit.»

⁵ ġmkan a‑s‑immut musa ah̬ddam n‑sidi rbbi ġ‑wakal n‑muwab, ġmklli fllas inna sidi rbbi.

⁶ imḍl‑t nttan ġ‑wakal n‑muwab, ġ‑talat lli‑ingabaln d‑bayt‑biyur, imma amḍḍal‑ns ur‑t‑issin yan sul s‑ġassad.

⁷ lliġ immut musa, illa dars miyya d‑sin id‑mraw (120) n‑usggʷas, ur‑inaqṣ iẓri‑ns ula rmin ifaddn‑ns.

⁸ kraḍ id‑mraw (30) n‑wass ad‑allan ayt‑israyil f‑musa ġ‑izaġarn n‑muwab, aylliġ kmmln‑uwssan n‑lɛzzat‑ns.

⁹ yahušuɛ yus n‑nuwn iɛmmr s‑rruḥ n‑tḥkimt, ašku isrs fllas musa ifassn‑ns. zaydn ayt‑israyil ar‑srs‑sflidn, ar‑skarn ġmklli‑f‑tn‑yuṣṣa sidi rbbi f‑imi n‑musa.

¹⁰ zġ‑uwssan‑an sul s‑ġassad ur‑jji‑d‑iban ġ‑ayt‑israyil kra n‑nnabi zund musa, issn‑t sidi rbbi udm s‑uwdm.

¹¹ ur‑jji‑illi wan nttan ġ‑lɛjayb d‑tmitar ggutnin lli‑s‑t‑yuzn sidi rbbi a‑tn‑iskar ġ‑wakal n‑miṣr, ġ‑dar firɛawn d‑imɛawann‑ns ula ġ‑tmazirt‑ns kullutt.

¹² ur‑jji‑illi yan zund musa lli‑iskarn s‑ufus itjhhdn ma‑imqqurn ar‑issiwid ġ‑iẓri n‑kullu ayt‑israyil.