tinbaḍin 31 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

musa izzɛam ayt‑israyil

¹ izayd musa isawl s‑kullu ayt‑israyil yini‑asn awal‑ad:

² «ha‑yyi kmmlġ miyya d‑sin id‑mraw (120) n‑usggʷas, ur‑sul‑ẓḍarġ a‑tffuġ ar‑kššmġ. inna‑yyi‑d sidi rbbi: ‹ur‑ra‑tbbit kiyi asif‑ad n‑urdun.›

³ walaynni rbbi siditun ra‑ibbi asif ġ‑lgddam‑nun, ifnu iqbiln‑an ġ‑lgddam‑nun f‑a‑teṭṭafm timizar‑nsn. yahušuɛ a‑rad‑awn‑izwur ġmklli inna sidi rbbi.

⁴ ra‑iskr sidi rbbi i‑iqbiln‑an ġmklli iskr i‑siḥun d‑ɛug igldan n‑ayt‑amur, ntni ula timizar‑nsn lli‑ifna.

⁵ rad‑awn‑tn‑in‑isrs sidi rbbi ġ‑lgddam‑nun f‑ad‑asn‑tskrm ġmklli gant kullu luṣiyat lli‑f‑kʷn‑uṣṣaġ.

⁶ gat‑n tiqqi tzɛmm. ad‑ur‑tġuwḍm ula tksuḍm zġ‑uwdmawn‑nsn, ašku rbbi siditun a‑ra‑didun‑imun. ur‑sar‑kʷn‑in‑ifl ula iwrri‑d fllawn.»

⁷ iġr musa i‑yahušuɛ s‑dars ġakudan, yini‑as ġ‑umnid n‑kullu ayt‑israyil: «g‑n tiqqi tzɛmt, ašku ra‑tkšmt kiyi d‑mddn‑ad s‑wakal lli‑f‑iggulla sidi rbbi i‑id‑babatsn ad‑asn‑t‑ifk, tbḍut‑asn‑t a‑t‑teṭṭafn.

⁸ sidi rbbi a‑rad‑ak‑izwur, yili dik. ur‑ra‑k‑in‑ifl ula iwrri‑d fllak. ad‑ur‑tiksaḍt ula tusit taġuft.»

⁹ yara musa kullu almmud‑ad, ifk arratn i‑imsakmurn n‑ayt‑lawi lli‑itasin ṣṣnduq n‑lɛhd n‑sidi rbbi, ula kullu imġarn n‑ayt‑israyil.

¹⁰ yuṣṣa‑tn musa yini: «kraygatt ssa n‑isggʷasn ġ‑tizi lli‑ġ‑a‑ttṣamaḥm f‑urṭṭal n‑gratun ġ‑lɛid n‑iḥšaš,

¹¹ lli‑ġ‑n‑munn kullu ayt‑israyil ad‑biddn ġ‑umnid n‑rbbi siditun ġ‑udġar lli‑ra‑iẓli nttan, ġrat almmud‑ad f‑ayt‑israyil baš ad‑as‑kullu‑sfldn.

¹² ssmunat‑d mddn kullutn, irgazn d‑tmġarin d‑tarwa mẓẓinin, ntni d‑ibrraniyn nna‑darun‑igawrn, tmlm‑asn‑t baš ad‑lmdn ad‑tuqqarn rbbi siditsn, rarn bdda lɛaql ad‑skarn s‑kullu iwaliwn n‑ulmmud‑ad.

¹³ a‑t‑issann ula tarwa‑nsn lli‑ur‑jji‑as‑isfldn, baš ad‑lmdn ula ntni ad‑tuqqarn rbbi siditun kullu ussan‑nun ġ‑wakal lli‑f‑ra‑tbbim asif n‑urdun a‑ti‑teṭṭafm.»