tinbaḍin 30 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

styat afulki urd lh̬ʷšant

¹¹ «han luṣiyt‑ad s‑kʷn‑uṣṣaġ ġassad, ur‑fllawn‑tšqi ula taggug fllawn.

¹² ur‑n‑tlli ġ‑ignna a‑tinim: ‹ma‑rad‑aġ‑iġli s‑ignna ad‑aġ‑tt‑id‑yawi f‑ad‑as‑nsfld ar‑srs‑nskar?›

¹³ ula tlla‑n ġ‑ttmi yaḍni n‑umda a‑tinim: ‹ma‑rad‑aġ‑ibbi amda ad‑aġ‑tt‑id‑yawi f‑ad‑as‑nsfld ar‑srs‑nskar?›

¹⁴ hay‑awal yakmur‑d srun. illa ġ‑imi‑nun, yili ġ‑uwl‑nun f‑a‑srs‑tskarm.

¹⁵ «ẓrat, srsġ ġassad ġ‑lgddam‑nun afulki d‑tudrt ula lh̬ʷšant d‑lmut.

¹⁶ iġ‑a‑tskarm s‑luṣiyat n‑rbbi siditun lli‑f‑kʷn‑uṣṣaġ ġassad, d‑iġ‑a‑ttirim rbbi siditun ar‑bdda‑ttmunum d‑iġarasn‑ns, ar‑tti‑ttawim ġ‑luṣiyat‑ns d‑tnbaḍin‑ns d‑lḥkamat‑ns, hati ra‑tddrm ar‑ttigatm, ibark‑kʷn rbbi siditun ġ‑wakal lli‑s‑ra‑tkšmm a‑ti‑teṭṭafm.

¹⁷ «walaynni iġ‑fllas‑tssgrawlm ul‑nun ur‑a‑srs‑tsflidm, ttyawlddaym‑n a‑tknnum i‑id‑rbbi yaḍni ar‑tn‑ttqasam,

¹⁸ ha‑yyi ɛlmġ‑kʷn ġassad, ra‑kʷn‑ifnu laḥ‑kʷn. akal lli‑f‑ra‑tbbim asif n‑urdun a‑srs‑tkšmm teṭṭafm‑t, ur‑ra‑n‑gis‑tmaṭlm.

¹⁹ «giġ fllawn ġassad ignna d‑wakal d‑inagan, srsġ ġ‑lgddam‑nun tudrt ula lmut, lbaraka ula nnɛlt. iniġ‑awn, styat tudrt f‑a‑tddrm kunni d‑wamud‑nun,

²⁰ ar‑bdda‑ttirim rbbi siditun, ar‑tsflidm s‑ma‑ittini, ttġwim bdda gis, ašku nttan a‑ġ‑tlla tudrt‑nun ula tugtt n‑uwssan‑nun, baš a‑tqamam ġ‑wakal lli‑f‑iggulla i‑id‑babatun ibrahim d‑isḥaq d‑yaɛqub ad‑asn‑t‑ifk.»