tinbaḍin 28 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

lbarakat i‑willi isflidn s‑wawal

¹ «iġ‑a‑bdda‑tsflidm s‑ma‑ittini rbbi siditun, tawim‑tt ġ‑kullu luṣiyat‑ns lli‑f‑kʷn‑uṣṣaġ ġassad, ra‑kʷn‑yall rbbi siditun f‑kullu iqbiln n‑ddunit.

² s‑ṣṣaḥt iġ‑a‑tsflidm s‑ma‑ittini rbbi siditun, rad‑awn‑ilint kullu lbarakat‑ad afunt‑awn.

³ imbarkiyn a‑ra‑tgm ġ‑tmdint, d‑imbarkiyn a‑ra‑tgm ġ‑igran.

⁴ tambarkit a‑ra‑tg lġllt n‑ddat‑nun ula tin wakal‑nun ula tin lksibt‑nun ġ‑imugayn ula ulli.

⁵ tambarkit a‑ra‑tg‑tsklt‑nun ula taqṣrit‑nun.

⁶ imbarkiyn a‑ra‑tgm ġakud nna‑tkšmm ula ġakud nna‑tffuġm.

⁷ «inuwwašn nna‑d‑srun‑nkrnin, ra‑tn‑irẓ sidi rbbi ġ‑umnid‑nun. ra‑d‑srun‑aškin zġ‑yat‑tsga, rwln zġ‑giwn s‑ssa n‑tsgiw.

⁸ ra‑fllawn‑yara sidi rbbi lbaraka ġ‑iḥuna n‑lh̬zin‑nun ula kullu ma‑ġ‑tgam ifassn‑nun, ibark‑kʷn ġ‑wakal lli‑rad‑awn‑ifk rbbi siditun.

⁹ ra‑kʷn‑ig sidi rbbi d‑uqbil lli‑d‑iẓli i‑ih̬f‑ns, ġmklli‑s‑awn‑iggulla, iġ‑a‑stti‑ttawim ġ‑luṣiyat n‑rbbi siditun tḍfurm aġaras‑ns.

¹⁰ ġakudan a‑rad‑kullu‑ẓrn ayt‑tmizar n‑ddunit is‑tusim ism n‑rbbi da‑bdda‑illan. rad‑wrrin ntni iksaḍn zġ‑giwn.

¹¹ sidi rbbi rad‑awn‑issigt lh̬ir ġ‑lġllt n‑ddat‑nun ula tin n‑lksibt‑nun ula tin‑wakal‑nun ġ‑tmazirt lli‑f‑iggulla i‑id‑babatun ad‑awn‑tt‑ifk.

¹² rad‑awn‑d‑irẓẓm sidi rbbi lh̬zin‑ns n‑ufulki zġ‑ignwan, ar‑d‑yakka anẓar ġ‑uzmz‑ns i‑wakal‑nun, ar‑itbarak ġ‑kullu tawuri n‑ifassn‑nun, ard teṭṭafm ma‑trṭṭlm i‑iqbiln ggutnin, d‑ur‑ra‑tlkmm f‑urṭṭal n‑yan.

¹³ ra‑kʷn‑yall sidi rbbi d‑ur‑ra‑kʷn‑izzugz, ig‑kʷn d‑ugayu urd aqzzib, iġ‑a‑stti‑ttawim ġ‑luṣiyat n‑rbbi siditun lli‑f‑kʷn‑uṣṣaġ ġassad, ar‑srsnti‑tskarm

¹⁴ wala da‑ttanfm s‑ufasi ula s‑uẓlmaḍ i‑iwaliwn‑ad‑s‑kʷn‑uṣṣaġ ġassad, wala tsigglm s‑kra n‑id‑rbbi yaḍni a‑tn‑ttqasam.

nnɛlat i‑willi ur‑isflidn s‑wawal

¹⁵ «walaynni iġ‑ur‑a‑tsflidm s‑wawal n‑rbbi siditun ula da‑ttraram lɛaql a‑tskarm s‑kullu luṣiyat‑ns d‑tnbaḍin‑ns lli‑f‑kʷn‑uṣṣaġ ġassad, rad‑fllawn‑ilint kullu nnɛlat‑ad afunt‑awn.

¹⁶ h̬ziyt a‑ra‑tgm ġ‑tmdint, d‑h̬ziyt a‑ra‑tgm ġ‑igran.

¹⁷ h̬ziyt a‑ra‑tg tisklt‑nun ula taqṣrit‑nun.

¹⁸ h̬ziyt a‑ra‑tg lġllt n‑ddat‑nun ula tin‑wakal‑nun ula tin lksibt‑nun ġ‑imugayn ula ulli.

¹⁹ h̬ziyt a‑ra‑tgm ġakud nna‑tkšmm ula ġakud nna‑tffuġm.»