tinbaḍin 22 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

luṣiyat yaḍni

¹ «iġ‑tẓrit amugay n‑gu‑darun nġd ahruy‑ns irwl‑as‑d, ad‑ur‑fllas‑taddrt i‑walln. illa fllak a‑ti‑trart i‑gu‑darun.

² iġ‑fllak‑yaggug bab‑ns nġd ur‑tssint win mit a‑iga, tadjt‑t ġ‑dark ġ‑tgmmi‑nk ard gis isqsa bab‑ns trart‑as‑t.

³ ġmkan a‑tskart i‑uġyul‑ns nġd malssa‑ns, nġd aynna ijlan i‑gu‑darun taft‑t. ur‑izri a‑fllas‑taddrt i‑walln.

⁴ «iġ‑tẓrit aġyul n‑gu‑darun nġd amugay‑ns iḍr ġ‑uġaras, a‑ur‑fllas‑taddrt i‑walln. illa fllak a‑tɛawnt gu‑darun a‑t‑yall tssbiddm‑t.

⁵ «ur‑izri i‑tmġart a‑tls timlsa n‑irgazn, wala izri i‑urgaz a‑ils timlsa n‑tmġarin. ašku wanna iskrn ġmkan, jjlih̬t a‑iga dar rbbi siditun.

⁶ «iġ‑n‑tufit kra n‑ugdf ġ‑tṣġart nġd f‑wakal, tili‑gis‑tgḍiṭṭ d‑tglay‑ns nġd tarwa‑ns tdl‑tn, ad‑ur‑tasit tagḍiṭṭ d‑warraw‑ns.

⁷ iġ‑di‑tusit tiglay nġd tarwa‑ns, adj innatsn f‑a‑tqamat ġ‑lh̬ir tiġzaf tudrt‑nk.

⁸ «iġ‑tbnit tigmmi n‑ljdid, sslulliy‑as aġʷrab i‑ukʷfaf‑ns, a‑ur‑n‑zġ‑gis‑iḍr yan, ilin idammn‑ns f‑tgmmi‑nk.

⁹ «a‑ur‑tkkrzt kra n‑wamud ġ‑igr‑nk n‑waḍil, a‑ur‑ttyawhlak ṣṣabt n‑yan d‑lġllt n‑wayya.

¹⁰ «a‑ur‑tssmunut amugay d‑uġyul ġ‑tyuga ġakud nna‑tkrzt.

¹¹ «a‑ur‑tlssat timlsit nna‑ġ‑th̬lḍ taḍut d‑lkttan.»