tinbaḍin 1 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

kšmat s‑wakal n‑kanɛan

¹ iwaliwn‑ad a‑s‑isawl musa s‑kullu ayt‑israyil ġ‑tsga yaḍni n‑wasif n‑urdun, ġakud lliġ llan ġ‑lh̬la n‑ɛaraba ġ‑tama n‑suf, ġ‑gr‑tmdint n‑faran d‑tmdinin n‑tufil d‑laban d‑ḥaṣirut d‑dizahab.

² tawada n‑yan d‑mraw (11) n‑wass a‑illan zġ‑ḥurib ar qadaš‑barniɛ ġ‑uġaras n‑iwrar n‑saɛir.

³ ġ‑usggʷas wis kkuẓ id‑mraw (40) [tigira n‑ufuġ zġ‑miṣr], ġ‑wass izwurn n‑wayyur wis yan d‑mraw (11), isawl musa s‑ayt‑israyil s‑kullu mad‑as‑d‑imla sidi rbbi a‑tn‑fllas‑yuṣṣa,

⁴ tigira n‑ma‑inra siḥun agllid n‑ayt‑amur lli‑iḥkamn ġ‑ḥašbun, nttan d‑ɛug agllid n‑bašan lli‑iḥkamn ġ‑ɛaštarut d‑idrɛi.

⁵ ibdu musa ar‑asn‑itfasar almmud‑ad, d‑ntni sul llan ġ‑tsga‑yan yaḍni n‑wasif n‑urdun ġ‑wakal n‑muwab, yini‑asn:

⁶ «isawl‑d srnġ rbbi siditnġ ġ‑dar‑udrar n‑ḥurib yini: ‹kigan ayd tgawrm ġ‑dar‑udrar‑ad.

⁷ nkrat a‑tmuddum, tzaydm s‑dar iwrar n‑ayt‑amur d‑iduran‑nsn ġ‑lh̬la n‑ɛaraba, tddum s‑tmizar n‑iwrar d‑igsarn, ula s‑lh̬la n‑nagab, ula s‑tamiw n‑umda imqqurn, tkšmm s‑wakal n‑ayt‑kanɛan d‑ayt‑lubnan ar asif imqqurn lli‑igan asif n‑furat.

⁸ ha‑yyi srsġ‑awn‑in akal‑ad ġ‑lgddam‑nun. kšmat srs, teṭṭafm akal lli‑f‑ggulliġ i‑id‑babatun ibrahim d‑isḥaq d‑yaɛqub ad‑asn‑t‑fkġ ntni d‑wamud‑nsn tigira‑nsn.› »