tasutin 28 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

isakmurn n‑kraygatt ass

¹ isawl‑d sidi rbbi s‑musa yini‑as:

² «uṣṣa ayt‑israyil tinit‑asn: ‹rarat lɛaql a‑yyi‑di‑takkam isakmurn‑inu n‑umššu ijdrn s‑waḍu‑ns imimn, ar‑iyi‑tn‑di‑tssakmurm ġ‑izmaz‑nsn.›

³ tinit‑asn: ‹ġmkad a‑iga‑usakmur ijdrn lli‑ra‑takkam i‑rbbi siditun. kraygatt ass ssattuyat‑n sin ilqqaġn kkanin asggʷas ġ‑ur‑illi kra n‑lɛib.

⁴ tjdrm yan ġ‑ilqqaġn‑an zikk, wayya ġ‑tdggʷat.

⁵ tzaydm‑as tawafka n‑imndi, a‑tg yan‑uġʷrraf n‑uggʷrn [kraḍ id‑kilu], ityawrway s‑rrbɛ n‑tbʷqqalt n‑zzit iṣfan [yan litru].

⁶ ad‑yaqlay‑waḍu‑ns imimn kraygatt ass, ig asakmur ijdrn ġmklli‑f‑yuṣṣa rbbi siditun ġ‑udrar n‑sinay.

⁷ tzaydm‑as ula tawafka n‑tissi, a‑tg rrbɛ n‑tbʷqqalt n‑waman n‑waḍil iktin [yan litru], tffim tawafka‑yan n‑tissi ġ‑tḥanut tamẓlayt ġ‑umnid n‑rbbi siditun.

⁸ tjdrm wis sin ilqqaġn ġ‑tdggʷat, tzaydm‑as tawafka n‑imndi d‑tin‑waman n‑waḍil iktin zund zikk, a‑ig asakmur ijdrn s‑waḍu imimn i‑rbbi siditun.

isakmurn n‑wass n‑usunfu

⁹ « ‹kraygatt ass n‑usunfu skarat sin ilqqaġn kkanin asggʷas ġ‑ur‑illi kra n‑lɛib. kud yan, tzaydm‑as tawafka n‑imndi, a‑tg sin iġurfan n‑uggʷrn [sḍis id‑kilu] ityawrwayn s‑zzit, tzaydm‑as ula tawafka n‑tissi.

¹⁰ ssattuyat‑tn‑in kraygatt ass n‑usunfu, ad‑agʷrn asattuy n‑uwssan yaḍni ula tawafka‑nsn n‑tissi.

isakmurn ġ‑tlalit n‑wayyur

¹¹ « ‹talalit n‑kraygatt ayyur, zaydat tssattuym‑n asakmur ijdrn i‑rbbi siditun, a‑ig sin igayzn zġ‑tuwrut, d‑yan izimmr, d‑ssa n‑ilqqaġn kkanin asggʷas ġ‑ur‑illi kra n‑lɛib.

¹² tzaydm i‑kraygatt amugay tawafka n‑imndi, a‑tg kraḍ iġurfan n‑uggʷrn [tẓa n‑id‑kilu] ityawrwayn s‑zzit. tzaydm i‑kraygatt izimmr tawafka n‑imndi, a‑tg sin iġurfan n‑uggʷrn [sḍis id‑kilu] ityawrwayn s‑zzit.

¹³ tzaydm i‑kraygatt alqqaġ tawafka n‑imndi, a‑tg yan‑uġʷrraf n‑uggʷrn [kraḍ id‑kilu] ityawrwayn s‑zzit. ġmkan a‑ra‑ig asakmur ijdrn s‑waḍu‑ns imimn ar‑ti‑tssattuym i‑rbbi siditun.

¹⁴ zaydat‑asn tiwafkiw‑ad n‑tissi, a‑tg mnaṣṣ n‑tbʷqqalt n‑waman n‑waḍil iktin i‑kraygatt amugay, tg tulut n‑tbʷqqalt i‑kraygatt izimmr, tg rrbɛ n‑tbʷqqalt i‑kraygatt alqqaġ. ġmkan ad‑gan isakmurn jdrnin ġ‑tlalit n‑kraygatt ayyur ġ‑iyrn n‑usggʷas.

¹⁵ skarat ula yan ikru zġ‑waġaḍn a‑ig asakmur f‑tjli‑nun i‑rbbi siditun, tzaydm‑t i‑usattuy n‑kraygatt ass ula tawafka‑ns n‑tissi.

isakmurn ġ‑lɛid n‑usurf

¹⁶ « ‹ass wis kkuẓ d‑mraw (14) ġ‑wayyur izwurn n‑kraygatt asggʷas a‑ra‑ig lɛid n‑usurf i‑rbbi siditun.

¹⁷ ass wis smmus d‑mraw (15) ula nttan ra‑ig lɛid. tzrim ssa n‑uwssan ar‑gisn‑tšttam arh̬ṣiṣ.

¹⁸ ass amzwaru ġ‑uwssan‑an skrat a‑d‑kullu‑tmnaggarm d‑rbbi‑nun. a‑ur‑gis‑tqasam kra n‑twuri.

¹⁹ ssattuyat asakmur ijdrn i‑rbbi siditun, a‑ig sin imugayn zġ‑tuwrut, d‑yan izimmr, d‑ssa n‑ilqqaġn kkanin asggʷas. tqllbm‑tn a‑ur‑gisn‑yili kra n‑lɛib.

²⁰ tzaydm i‑kud yan gisn tawafka n‑imndi ityawrwayn s‑zzit, a‑tg kraḍ iġurfan n‑uggʷrn [tẓa n‑id‑kilu] i‑umugay, tg sin iġurfan [sḍis id‑kilu] i‑izimmr,

²¹ tg yan‑uġʷrraf i‑kraygatt alqqaġ ġ‑ssa n‑ilqqaġn‑an.

²² skarat ula yan‑waġaḍ a‑ig asakmur f‑tjli‑nun a‑kʷn‑ifukku.

²³ tzaydm‑tn i‑usattuy n‑zikk ṣbaḥ lli‑bdda‑tssattuym kraygatt ass.

²⁴ ġmkan a‑ra‑takkam i‑rbbi siditun isakmurn‑inu n‑umššu ijdrn s‑waḍu‑ns imimn kraygatt ass ġ‑ssa‑uwssan‑an, tzaydm‑tn i‑usattuy n‑kraygatt ass ula tawafka‑ns n‑tissi.

²⁵ wis ssa n‑uwssan‑an, tskrm daġ a‑d‑kullu‑tmnaggarm d‑rbbi‑nun. a‑ur‑gis‑tqasam kra n‑twuri.

isakmurn n‑lġllt tamzwarut

²⁶ « ‹ass n‑lġllt tamzwarut lli‑ġ‑ra‑tssakmurm tawafka n‑imndi amzwaru i‑rbbi siditun, ġ‑uzmz n‑lɛid n‑win smmus id‑mraw (50) n‑wass, skrat a‑d‑kullu‑tmnaggarm d‑rbbi‑nun. a‑ur‑gis‑tqasam kra n‑twuri.

²⁷ ssattuyat asakmur s‑waḍu imimn i‑rbbi siditun, a‑ig sin imugayn, d‑yan izimmr, d‑ssa n‑ilqqaġn kkanin asggʷas.

²⁸ kud yan, tzaydm‑as tawafka n‑imndi, a‑tg kraḍ iġurfan n‑uggʷrn [tẓa n‑id‑kilu] ityawrwayn s‑zzit i‑kraygatt amugay, tg sin iġurfan [sḍis id‑kilu] i‑izimmr,

²⁹ tg yan‑uġʷrraf [kraḍ id‑kilu] i‑kraygatt alqqaġ ġ‑ssa n‑ilqqaġn‑an.

³⁰ skrat ula yan‑waġaḍ, a‑ig asakmur f‑tjli‑nun a‑kʷn‑ifukku.

³¹ tzaydm‑tn ntni d‑twafkiw‑nsn n‑tissi i‑usattuy n‑kraygatt ass ula tawafka‑ns n‑imndi. tqllbm‑tn a‑ur‑gisn‑yili kra n‑lɛib.› »