tasutin 23 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

awal amzwaru n‑balɛam

¹ yini balɛam ġakudan i‑balaq: «bnu‑yyi ġid ssa n‑ikʷrkar, tawit‑iyi‑d ssa n‑imugayn d‑ssa n‑izamarn.»

² iskr balaq maylli‑s‑as‑inna balɛam, zaydn s‑sin ssattuyn yan‑umugay d‑yan izimmr f‑kraygatt akrkur.

³ yini ilmma balɛam i‑balaq: «bidd ġ‑dar isakmurn‑nk jdrnin. rad‑dduġ nkki a‑ur‑imil yašk‑id sidi rbbi imnaggar‑iyi‑d. aynna‑yyi‑d‑imla, rad‑ak‑t‑iniġ.» iddu balɛam ġakudan s‑mani ih̬wan yattuy.

⁴ yašk‑id rbbi s‑dar balɛam. yini‑as balɛam: «han skrġ ssa n‑ikʷrkar, ssakmurġ yan‑umugay d‑yan izimmr f‑kraygatt yan gisn.»

⁵ ig‑n sidi rbbi awal ġ‑imi n‑balɛam. yini‑as ilmma: «wrri s‑dar balaq tinit‑as awal‑ad.»

⁶ iwrri‑d s‑dars, yaf‑t‑id ibidd sul ġ‑tama n‑tġrṣiwin‑ns jdrnin, ntta d‑iriyasn n‑muwab kullutn.

⁷ isawl‑d balɛam yut‑as lmɛna‑yad yini: «yiwi‑yyi‑d balaq zġ‑wakal n‑aram, agllid n‑muwab, zġ‑iwrar n‑ššrq: ‹ašk‑id dari a‑tnɛlt yaɛqub, tnkrt a‑th̬zut ayt‑israyil.›

⁸ mamnk a‑rad‑nɛlġ yan ur‑inɛil rbbi? mamnk a‑rad‑h̬zuġ yan ur‑ih̬zi walli illan?

⁹ zġ‑iggi n‑ijarifn a‑zġ‑tn‑in‑uggʷiġ, d‑ih̬f n‑iwrar a‑zġ‑tn‑in‑mnadġ. han aqbil‑an ittrs waḥdut, ityawẓlay zġ‑gr iqbiln.

¹⁰ yaɛqub iga zund amlal. ma‑iẓḍarn a‑iḥasb tiẓratin‑ns? ma‑issnn mnšk a‑illan ġ‑ugdrur‑ns? amar yufan ad‑mmtġ lmut n‑yan iṣlaḥn, tggru‑yyi s‑mklli‑s‑rad‑as‑tggru.»

¹¹ yini balaq i‑balɛam: «mayd‑iyi‑tskrt? iwiġ‑k‑id a‑tnɛlt inuwwašn‑inu, d‑ha kiyi lbaraka ayd‑s‑tn‑tbarkt.»

¹² irar‑as‑d balɛam: «is‑ur‑iyi‑ih̬ṣṣa ad‑iniġ ma‑d‑iga sidi rbbi ġ‑imi‑nu?»

wis sin iwaliwn n‑balɛam

¹³ yini‑as balaq: «ġir ašk‑id didi s‑mani yaḍni, tẓrt‑tn‑in ula zġ‑ġin. ġir kra idrusn a‑ra‑n‑gisn‑tẓrt, urd kullutn. nɛl‑iyi‑tn‑in zġ‑ġin.»

¹⁴ yawi‑t s‑igr n‑ṣufim lli‑illan ġ‑ih̬f n‑uwrir n‑bisgah, ibnu gis ssa n‑ikʷrkar issattuy yan‑umugay d‑yan izimmr f‑kraygatt akrkur.

¹⁵ yini balɛam i‑balaq: «bidd ġ‑dar isakmurn‑nk jdrnin. rad‑dduġ a‑n‑mnaggarġ d‑sidi rbbi.»

¹⁶ yašk‑id sidi rbbi s‑dar balɛam, ig yan‑wawal ġ‑imi‑ns. yini‑as ilmma: «wrri s‑dar balaq tinit‑as awal‑ad.»

¹⁷ iwrri‑d s‑dars, yaf‑t‑id ibidd sul ġ‑tama n‑tġrṣiwin‑ns jdrnin, ntta d‑iriyasn n‑muwab. isqsa‑t balaq: «ma‑s‑d‑inna rbbi da‑bdda‑illan?»

¹⁸ isawl‑d balɛam yut‑as lmɛna‑yad yini: «nkr a‑balaq tsfldt‑iyi, trẓmt imẓgan‑nk a‑yus n‑ṣiffur.

¹⁹ rbbi ur‑igi bnadm a‑isskirkis, wala iga yus n‑urgaz a‑ti‑tigʷraẓ. iġ‑iqawl s‑kra, is‑ur‑ra‑t‑ikmml? iġ‑ifka awal‑ns, is‑ur‑ra‑t‑issafu?

²⁰ hati yuṣṣa‑yyi ad‑barkġ. d‑lbaraka‑ns, ur‑ẓḍarġ a‑stt‑rarġ.»