tasutin 22 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

agllid n‑muwab yuzn s‑balɛam

¹ muddun ayt‑israyil, srsn ilmma ġ‑uzaġar n‑muwab ġ‑tama n‑wasif n‑urdun ġ‑illiġ‑n‑ngabaln d‑tmdint n‑ariḥa.

² balaq lli‑igan yus n‑ṣiffur, ig agllid n‑muwab, iẓra kullu mad‑skrn ayt‑israyil i‑ayt‑amur.

³ ġuwḍn ayt‑muwab iksaḍn bahra, ašku ggutn ayt‑israyil.

⁴ inin ayt‑muwab i‑imġarn n‑ayt‑midyan: «tamurġi‑an ra‑thlk kullu ma‑darnġ‑illan. rad‑aġ‑ššn ġmklli šttan imugayn tuga n‑igran.» inkr balaq lli‑igan yus n‑ṣiffur, ig agllid n‑muwab ġ‑uwssan‑an,

⁵ yazn irqqasn s‑balɛam lli‑igan yus n‑baɛur ġ‑tmdint n‑fatur ġ‑tama n‑wasif n‑furat ġ‑tmazirt n‑ɛamaw, iġr‑as‑d s‑dars yini: «ha yan‑uqbil iffuġ‑d zġ‑miṣr, idl kullu udm n‑wakal. hati ġilad isrs‑d ġ‑tama‑nu.

⁶ ašk‑id tɛawnt‑iyi ašku tjhhdn flla, tdɛut‑asn s‑nnɛlt a‑ur‑imil nruġ‑tn ṭṭayġ‑tn zġ‑wakal‑ad. ašku ssnġ wanna tbarkt ra‑ig ambarki, d‑wanna tnɛlt ra‑ig unɛil.»

⁷ ddun imġarn n‑muwab d‑win midyan, awin atig n‑ssiḥr ġ‑ufus‑nsn, ruḥn dar balɛam inin‑as awal n‑balaq.

⁸ yini‑asn: «a‑tnsm ġ‑dari ġ‑iḍ‑ad. azkka ra‑ywn‑rarġ awal s‑aynna‑s‑iyi‑d‑inna sidi rbbi.» qaman ilmma iriyasn n‑muwab ġ‑dar balɛam.

⁹ yašk‑id rbbi s‑balɛam yini‑as: «mad‑gan irgazn‑ad dark illan?»

¹⁰ yini balɛam i‑rbbi: «yuzn‑tn‑d sri balaq yus n‑ṣiffur agllid n‑muwab a‑yyi‑d‑inin:

¹¹ ‹ha yan‑uqbil iffuġ‑d zġ‑miṣr, idl kullu udm n‑wakal. ašk‑id tɛawnt‑iyi tdɛut‑asn s‑nnɛlt, a‑ur‑imil ẓḍarġ a‑n‑fllasn‑akʷiġ ṭṭayġ‑tn.› »

¹² irar‑d rbbi i‑balɛam: «a‑ur‑didsn‑tmunt wala tnɛlt mddn‑an, ašku imbarkiyn ad‑gan.»

¹³ inkr balɛam zikk, yini i‑iriyasn n‑balaq: «wrryat s‑tmazirt‑nun, ašku sidi rbbi ur‑iyi‑yudj a‑didun‑munġ.»

¹⁴ nkrn iriyasn n‑muwab wrrin s‑dar balaq inin‑as: «yagʷi balɛam a‑d‑didnġ‑imun.»

¹⁵ yazn daġ balaq iriyasn yaḍni, ggutn ɛzzun f‑imzwura.

¹⁶ aškin‑d dar balɛam inin‑as: «ha mad‑ak‑inna balaq yus n‑ṣiffur: ‹a‑ur‑tadjt kra a‑k‑in‑iḥṣar a‑ur‑d‑dari‑taškt,

¹⁷ ašku s‑ṣṣaḥt ra‑k‑ssrbḥġ. d‑kra‑s‑iyi‑tnnit ra‑t‑skrġ. ašk‑id tɛawnt‑iyi tnɛlt aqbil‑ad.› »

¹⁸ isawl‑d balɛam yini i‑imɛawann n‑balaq: «iġ‑akkʷ‑yyi‑ifka balaq tigmmi‑ns iɛmmrn s‑nnʷqrt d‑uwrġ, ur‑rad‑iẓḍarġ ad‑ssurfġ awal n‑rbbi da‑bdda‑illan ig rbbi‑nu, la ġ‑ma‑imqqurn ula ġ‑ma‑imẓẓin.

¹⁹ ula kunni, ġir ad‑dari‑tqamam ġ‑iḍ‑ad, f‑ad‑issanġ is‑ra‑yyi‑d‑yini sidi rbbi awal yaḍni.»

²⁰ iban‑d rbbi i‑balɛam ġ‑iḍ‑an yini‑as: «lliġ‑d‑uškan irgazn‑ad a‑k‑awin, nkr tmunt didsn, walaynni a‑ur‑tskrt abla s‑wawal nna‑s‑ak‑nniġ.»

amuddu n‑balɛam d‑tġyult‑ns

²¹ zikk ṣbaḥ inkr balɛam iḥlls taġyult‑ns, imun d‑iriyasn n‑muwab.

²² issudu balɛam f‑tġyult‑ns, ilin dids sin ih̬ddamn‑ns. walaynni lliġ idda, iznd fllas lġaḍab n‑rbbi, s‑ha lmalak n‑sidi rbbi ibidd srs ġ‑uġaras iqqn‑as‑t.

²³ taġyult, tẓra nttat lmalak n‑sidi rbbi ibidd ġ‑uġaras d‑tuzzalt ġ‑ufus‑ns, tanf zġ‑uġaras tkšm s‑igr. yut balɛam taġyult a‑stt‑id‑irar.

²⁴ ibidd daġ srs lmalak ġ‑yat‑tġarast inukman ġ‑gr igran n‑waḍil, yili‑uġʷrab ġ‑tsga‑yad d‑h̬ta.

²⁵ taġyult, lliġ tẓra lmalak n‑sidi rbbi, tmun d‑uġʷrab, tmzi dids aḍar n‑balɛam. yut‑stt nttan tis snat‑twal.

²⁶ izayd lmalak n‑sidi rbbi s‑lgddam‑ns, ibidd ġ‑yan mani bahra inukman, ur‑gis maniġ a‑tzray la f‑ufasi ula f‑uẓlmaḍ.

²⁷ lliġ‑tẓra‑tġyult lmalak n‑sidi rbbi, tẓl ġ‑ddu balɛam. ibzg fllas balɛam, yut‑stt daġ s‑uɛmud‑ns.

²⁸ ġakudan a‑irẓm sidi rbbi imi i‑tġyult, tsawl s‑balɛam tini‑as: «mad‑ak‑skrġ aylliġ‑iyi‑tutt kraṭṭ‑twal?»

²⁹ irar balɛam i‑tġyult: «ašku tgit‑iyi d‑taḍṣa. mra is‑dari kra n‑tuzzalt ġ‑ufus, ra‑km‑nġġ ġil ġil.»

³⁰ tini‑tġyult i‑balɛam: «is‑urd taġyult‑nk ad‑giġ, ar‑iyi‑tssudut kullu ma‑tkkit sul s‑ġassad? is‑jji‑ak‑skrġ zund ġassad?» yini‑as: «uhu.»

³¹ ġakudan a‑irẓm sidi rbbi alln n‑balɛam, ar‑itmnad lmalak n‑sidi rbbi ibidd ġ‑uġaras d‑tuzzalt ġ‑ufus‑ns. issknu‑d balɛam ih̬f‑ns ar akal.

³² yini‑as lmalak n‑sidi rbbi: «mah̬ aylliġ tutt taġyult‑nk kraṭṭ‑twal? uškiġ‑d nkkin a‑k‑ḥṣarġ, ašku ġ‑iẓri‑nu aġaras yʷh̬šnn ayd tumẓt.

³³ taġyult‑ad tẓra‑yyi tanf‑iyi kraṭṭ‑twal. mra is‑ur‑iyi‑tunf, lukun nġiġ‑k, adjġ‑tt nttat a‑tddr.»

³⁴ yini balɛam ġakudan i‑lmalak n‑sidi rbbi: «ha‑yyi jliġ, ur‑ssinġ is‑d‑sri‑tbiddt ġ‑uġaras. ġilad iġ‑yʷh̬šn mayd skrġ ġ‑iẓri‑nk, rad‑wrriġ s‑dari.»

³⁵ yini lmalak n‑sidi rbbi i‑balɛam: «mun d‑irgazn‑an, walaynni ad‑ur‑tinit abla awal nna‑s‑ak‑nniġ.» izayd balɛam ġakudan d‑iriyasn n‑balaq.

³⁶ lliġ isfld balaq is‑d‑yuška balɛam, iffuġ a‑t‑in‑imnaggar ġ‑tmdint n‑muwab lli‑illan ġ‑ttmi n‑tmazirt‑ns ġ‑uwttu n‑wasif n‑arnun.

³⁷ yini balaq i‑balɛam: «is‑ur‑n‑srk‑uzinġ a‑di‑taškt ġil ġil s‑dari? mah̬ aylliġ ur‑di‑tuškit? is‑tġalt is‑ur‑ẓḍarġ a‑k‑ssrbḥġ s‑lh̬ir?»

³⁸ yini balɛam i‑balaq: «ha‑yyi uškiġ‑d s‑dark. walaynni is‑ẓḍarġ nkki ad‑iniġ kra? awal nna‑yyi‑d‑iga rbbi ġ‑imi‑nu a‑s‑rad‑sawlġ.»

³⁹ imun balɛam d‑balaq, lkmn tamdint n‑qiryat‑ḥuṣut.

⁴⁰ iġrṣ gis balaq i‑imugayn d‑uwlli, yazn kra ġ‑tġrṣiw i‑balɛam d‑iriyasn lli‑dids‑illan.

⁴¹ ndid azkka inkr balaq yawi balɛam, issawn‑t s‑bamut‑baɛl a‑n‑imnad kra ġ‑ayt‑israyil lli‑n‑yakmurn.