tasutin 20 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

lmut n‑maryam

¹ ġ‑wayyur amzwaru tlkm tamunt n‑ayt‑israyil s‑lh̬la n‑ẓiyn, gawrn ġ‑tsga n‑qadaš. tmmt gis maryam, ttyawmḍal gis.

aman ffuġn‑d zġ‑uẓru

² lliġ ur‑llin‑waman dar tamunt, munn‑d daġ f‑musa d‑harun.

³ ẓin mddn‑an d‑musa inin‑as: «mra is‑nmmut ġakud lliġ mmutn aytmatnġ ġ‑umnid n‑sidi rbbi.

⁴ mah̬ a‑di‑tiwim tamunt n‑sidi rbbi s‑lh̬la‑ya, a‑gis‑nmmt nkkʷni d‑lksibt‑nġ?

⁵ mah̬ a‑yġ‑di‑tssiwnm zġ‑miṣr s‑taġart‑ad yʷh̬šnn? ur‑tgi i‑imndi wala tga i‑tazart wala aḍil wala rrmman, wala gis aman n‑tissi.»

⁶ iddu musa d‑harun zġ‑dar tamunt s‑dar imi n‑uh̬iyyam n‑umnaggar, ḍrn f‑uwdmawn‑nsn s‑wakal. iban‑asn‑d lmajd n‑sidi rbbi.

⁷ yini sidi rbbi i‑musa:

⁸ «asi aɛmud, tssmunt‑d mddn kullutn, kiyi d‑gʷmak harun. tsawlm s‑uẓru ġ‑lgddam‑nsn, tinim‑as a‑d‑irẓm i‑waman. tssufġt‑asn‑d aman zġ‑uẓru, tssut tamunt ula lksibt‑nsn.»

⁹ yasi‑d musa aɛmud zġ‑tzdġt n‑sidi rbbi ġmklli‑t‑yuṣṣa.

¹⁰ issmun‑d musa d‑harun mddn kullutn ġ‑lgddam n‑uẓru, yini‑asn: «ġir sfldat a‑imɛṣan. is‑ad‑awn‑d‑nssufġ aman zġ‑uẓru‑ad?»

¹¹ yall afus‑ns yut s‑uɛmud‑ns ġ‑uẓru snat‑twal, ffuġn‑d‑waman ggutnin. tsu kullu tamunt, tsu ula lksibt‑nsn.

¹² imma sidi rbbi ġakudan inna‑d i‑musa d‑harun: «han urd nkki a‑ġ‑tumnm, ašku ur‑yyi‑tgim d‑rbbi amẓlay ġ‑lgddam n‑ayt‑israyil. f‑ġayan urd kunni a‑ra‑išškšm tamunt‑ad s‑wakal lli‑asn‑fkiġ.»

¹³ aman‑an gan ‹aman n‑mariba› [tga lmɛna‑ns ‹ṭaẓit›], ašku ġin a‑ġ‑ẓin ayt‑israyil d‑rbbi da‑illan, issbayyn‑asn‑d is‑iga rbbi amẓlay.

tanuwwašt n‑ayt‑adum

¹⁴ yazn musa irqqasn zġ‑qadaš s‑dar‑ugllid n‑adum yini‑as: «awal‑ad iga zġ‑gʷmak israyil. tssnt kullu tammara lli‑fllanġ‑izrin.

¹⁵ tsfldt is‑ttin‑kkan huwwdn id‑babatnġ s‑miṣr, ngawr‑n ġ‑miṣr isggʷasn ggutnin, tɛddan fllanġ ayt‑miṣr nkkʷni d‑id‑babatnġ.

¹⁶ ar‑ilmma‑naqra s‑rbbi da‑illan, isfld i‑wawal‑nġ, yazn‑d yan lmalak issufġ‑aġ‑d zġ‑miṣr. ha‑yaġ ġilad nlla ġ‑qadaš lli‑igan tamdint ġ‑tama n‑tmazirt‑nk.

¹⁷ nḍalb‑ak ad‑aġ‑tadjt a‑nzri zġ‑tmazirt‑nk. ur‑ra‑nkšm s‑kra n‑igr ula kra n‑uwrti n‑waḍil, ula nswa zġ‑kra n‑wanu. aġaras n‑ugllid a‑ra‑nk, ur‑ra‑nanf la s‑ufasi wala aẓlmaḍ ard nzri iwtta‑nk.»

¹⁸ irar‑as‑d adum ġakudan yini: «uhu, ur‑ra‑tzrim zġ‑tmazirt‑inu. han ra‑n‑srun‑nffuġ s‑uwzzal.»

¹⁹ inin‑as ayt‑israyil: «aġaras n‑ugllid a‑mi‑ra‑nawn. aman nna‑dark‑nswa nkkʷni d‑lksibt‑nġ, nfk‑ak atig‑nsn. ur‑nri abla ad‑as‑ng aḍar nzri.»

²⁰ irar‑asn‑d: «han ur‑ra‑tzrim.» iffuġ‑d adum d‑irgazn‑ns, yawi‑d akabar itjhhdn a‑d‑fllasn‑yakʷi.

²¹ ġmkan a‑s‑yagʷi adum a‑yadj ayt‑israyil ad‑zrin zġ‑wakal‑ns. wrrin‑d ilmma ayt‑israyil zġ‑ġin.

lmut n‑harun

²² tmuddu ilmma kullu tamunt n‑israyil zġ‑qadaš aylliġ tlkm s‑dar‑udrar n‑hur.

²³ isawl‑d sidi rbbi s‑musa d‑harun ġ‑dar‑udrar n‑hur ġ‑tama n‑tmazirt n‑adum, yini‑asn:

²⁴ «ra‑ityattay harun ġila s‑gr mddn‑ns lli‑zrinin. ur‑ra‑ikšm s‑wakal lli‑fkiġ i‑ayt‑israyil, ašku tɛṣam awal‑inu ġ‑dar‑waman n‑mariba.

²⁵ awi harun d‑yus aliɛazr, tġlim s‑udrar n‑hur.

²⁶ kks i‑harun timlsa‑ns, tsslst‑tnt i‑yus aliɛazr. ġin a‑ġ‑ra‑immt harun ityattay s‑gr mddn‑ns.»

²⁷ iskr musa maylli‑f‑t‑yuṣṣa sidi rbbi, ġlin s‑udrar n‑hur ġ‑umnid n‑tamunt kullutt.

²⁸ ikks musa timlsa i‑harun, issls‑tnt i‑yus aliɛazr, immt harun ġin ġ‑iggi n‑udrar. iggʷz‑d ilmma musa d‑aliɛazr zġ‑udrar.

²⁹ mddn‑an kullutn ẓran is‑immut harun. ar‑allan ayt‑israyil f‑harun kraḍ id‑mraw (30) n‑wass.