tasutin 17 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

tayyawin ġ‑uɛmud n‑harun

¹ isawl‑d sidi rbbi s‑musa yini‑as:

² «sawl s‑ayt‑israyil, tamẓt zġ‑darsn sin d‑mraw (12) n‑uɛmud, kraygatt taqbilt d‑uɛmud‑ns, awin‑ak‑tn‑d imġarn‑nsn s‑sin d‑mraw, tarat ism n‑kraygatt amġar f‑uɛmud‑ns,

³ tarat ism n‑harun f‑uɛmud n‑ayt‑lawi. ašku ra‑ig yan‑uɛmud i‑kraygatt ih̬f n‑tqbilt.

⁴ tsrst‑tn‑in ilmma ġ‑uh̬iyyam n‑umnaggar ġ‑lgddam n‑ṣṣnduq n‑tuggʷa, ġ‑illiġ a‑didun‑tmnaggarġ.

⁵ han argaz nna‑stiġ, ra‑yut‑uɛmud‑ns s‑tayyawin. ġmkan a‑s‑rad‑gġ ttmi i‑ingmugn lli‑fllawn‑tngmugn ayt‑israyil.»

⁶ isawl musa s‑ayt‑israyil, fkn‑as‑d kullu imġarn‑nsn iɛmad, kraygatt amġar d‑uɛmud‑ns s‑sin d‑mraw. yili‑uɛmud n‑harun ġ‑gr iɛmad‑nsn.

⁷ isrs‑n musa iɛmad‑an ġ‑umnid n‑sidi rbbi ġ‑uh̬iyyam n‑tuggʷa.

⁸ ndid azkka ikšm musa s‑uh̬iyyam n‑tuggʷa, yaf‑n aɛmud n‑harun lli‑igan win ayt‑lawi, yut s‑tayyawin d‑ijddign d‑lluz inwan.

⁹ yasi‑d musa kullu iɛmad‑lli zġ‑umnid n‑sidi rbbi s‑dar ayt‑israyil kullutn, ar‑gisn‑tmnadn. yasi kraygatt yan aɛmud‑ns.

¹⁰ yini sidi rbbi i‑musa: «rar aɛmud n‑harun s‑lgddam n‑ṣṣnduq n‑tuggʷa, ad‑bdda‑iqama ig tamatart i‑imɛṣan, tssbiddt ingmugn‑nsn flla, a‑ur‑mmtn.»

¹¹ ġmkan a‑iskr musa. ġmklli‑f‑t‑yuṣṣa sidi rbbi, ġmkan a‑iskr.