tasutin 16 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

ṭaẓit n‑ayt‑quraḥ

¹ inkr yan gu‑lawi ism‑ns quraḥ, iga yus n‑yiṣhar lli‑igan yus n‑qahat, nttan d‑kra ġ‑ayt‑rawbin ismawn‑nsn datan d‑abiram lli‑igan tarwa n‑aliyab, d‑uwn lli‑igan yus n‑falat,

² awin irgazn nkrn s‑musa ntni d‑sin id‑miyya d‑smmus id‑mraw (250) n‑urgaz n‑ayt‑israyil lli‑ganin ih̬fawn ġ‑gr tamunt, tyawssann ntni s‑ismawn‑nsn.

³ munn‑d f‑musa d‑harun inin‑asn: «han tssurfm awttu. ašku ayt‑tamunt, hatni gan kullu imẓlayn n‑sidi rbbi, yili nttan ġ‑wammas‑nġ kullwaġ. mah̬ a‑tssimġurm ih̬fawn‑nun f‑tamunt n‑sidi rbbi?»

⁴ lliġ isfld musa i‑ġayan, iḍr f‑uwdm‑ns s‑wakal.

⁵ yini ilmma i‑quraḥ d‑usmun‑ns: «ard iġli‑wass, ra‑d‑issbayyn sidi rbbi manwa iẓli i‑ih̬f‑ns a‑n‑srs‑yakmur. wanna isti, nttan a‑ra‑n‑srs‑issakmur.

⁶ skrat ġmkad a‑quraḥ, kiyi d‑usmun‑nk. awyat‑d taṭṭasin‑nun azkka,

⁷ tgm‑d gisnt tirgin rġanin d‑lbh̬ur s‑umnid n‑sidi rbbi. wanna isti sidi rbbi, nttan a‑ra‑ig amẓlay‑ns. han kunni ayd issurfn ġilad awttu ay‑ayt‑lawi.»

⁸ izayd musa yini i‑quraḥ: «ġir sfldat ay‑ayt‑lawi.

⁹ tawuri‑nun, is‑ur‑darun tgi yat? hati iẓli‑kʷn sidi rbbi n‑israyil zġ‑gr tamunt n‑mddn‑ns f‑a‑n‑srs‑ttakmurm tqasam‑t ġ‑tzdġt‑ns, tbiddm ula ġ‑umnid n‑tamunt n‑ayt‑israyil ar‑asn‑tth̬damm.

¹⁰ yadj‑k kiyi d‑aytmak kullutn n‑ayt‑lawi a‑n‑srs‑ttakmurm. imma ġilad, is‑tram ad‑kullu‑tgm imsakmurn tfukkum willi jlanin?

¹¹ han sidi rbbi a‑s‑tnkrt kiyi d‑usmun‑nk. imma harun, ma‑iga nttan aylliġ a‑fllas‑ttngmugm?»

¹² yazn musa ma‑d‑yaqran i‑datan d‑abiram lli‑igan tarwa n‑aliyab s‑dars. imma ntni rurn‑as‑d: «ur‑ra‑n‑dark‑našk.

¹³ is‑ur‑dark‑igi yat, ġ‑lliġ‑aġ‑di‑tssufġt zġ‑wakal lli‑ġ‑ingi‑ugʷfay d‑tammnt, trart‑aġ‑d a‑nmmt ġ‑lh̬la‑ya, tirit ula a‑tgt ih̬f‑nk d‑lḥakm fllanġ?

¹⁴ ha‑yaġ ġilad ur‑aġ‑tšškšimt s‑wakal lli‑ġ‑ingi‑ugʷfay d‑tammnt, ula tfkit‑aġ a‑nṭṭaf urtan d‑igran n‑waḍil. is‑ra‑di‑tġzat alln i‑mddn‑ad? uhu, ur‑ra‑n‑našk s‑dark.»

¹⁵ nkrn‑d iriyn ġ‑musa bahra yini i‑sidi rbbi: «ad‑ur‑tqblt asakmur‑nsn. ur‑jji‑tɛddaġ f‑kra n‑yan gisn, wala umẓġ zġ‑gisn kra n‑tġyult.»

¹⁶ yini musa ġakudan i‑quraḥ: «a‑di‑tḥaḍrt kiyi d‑usmun‑nk azkka ġ‑umnid n‑sidi rbbi, kiyi d‑ntni d‑harun.

¹⁷ a‑d‑yasi kraygatt yan taṭṭast‑ns, ig gis lbh̬ur, yawi‑tt‑id kraygatt yan s‑umnid n‑sidi rbbi. rad‑gnt snat id‑miyya d‑smmust id‑mrawt (250) n‑taṭṭast‑nsn, wala tink, wala tin harun, kraygatt yan d‑taṭṭast‑ns.»

¹⁸ ġmkan a‑s‑d‑yiwi kud yan taṭṭast‑ns, gn gisnt tirgin rġanin d‑lbh̬ur, biddn ġ‑dar imi n‑uh̬iyyam n‑umnaggar ntni d‑musa d‑harun.

¹⁹ issmun‑d fllasn quraḥ kullu tamunt ġ‑dar imi n‑uh̬iyyam n‑umnaggar. iban‑d lmajd n‑sidi rbbi ġakudan i‑tamunt kullutt.

²⁰ yini‑d sidi rbbi ġakudan i‑musa d‑harun:

²¹ «ittyat‑n zġ‑gr tamunt‑an f‑a‑tn‑fnuġ s‑yat‑twal.»

²² iḍr musa d‑harun f‑uwdmawn‑nsn s‑wakal inin: «wa rbbi, wa rbbi da‑itggan rruḥ ġ‑kullu ma‑iṭṭafn tifiyi, iġ‑ijla yan, is‑ra‑th̬zut tamunt kullutt?»

²³ yini sidi rbbi i‑musa:

²⁴ «sawl s‑tamunt‑an tinit‑asn: ‹aggugat zġ‑dar‑tzdġt n‑quraḥ d‑datan d‑abiram.› »

²⁵ inkr musa iddu s‑dar datan d‑abiram, ḍfurn‑t imġarn n‑ayt‑israyil.

²⁶ isawl s‑tamunt yini‑asn: «ittyat zġ‑ih̬iyyamn n‑mddn‑an ʷh̬šnnin. d‑a‑ur‑tggrm i‑kra igan winsn, a‑ur‑kʷn‑tawi lɛqubit‑nsn.»

²⁷ ittin ġakudan zġ‑dar‑tzdġt n‑quraḥ d‑datan d‑abiram. iffuġ‑d datan d‑abiram biddn ġ‑imi n‑ih̬iyyamn‑nsn, ntni d‑tmġarin‑nsn d‑tarwa‑nsn d‑wazzann‑nsn mẓẓinin.

²⁸ isawl daġ musa yini: «ġmkad a‑s‑ra‑tissanm izd sidi rbbi a‑yyi‑d‑yuznn ad‑skarġ kullu iskkirn‑ad, ur‑a‑tn‑skarġ zġ‑ih̬f‑inu.

²⁹ iġ‑mmutn ġwid ġmklli kullu tmmtatn mddn, nġd iġ‑asn‑ijra ġaylli ijrrun i‑kullu mddn, ra‑d‑iban is‑urd sidi rbbi a‑yyi‑d‑yuznn.

³⁰ walaynni iġ‑iskr sidi rbbi kra ur‑illin, irẓm‑wakal išš‑tn ntni d‑kullu ma‑igan winsn, ggʷzn ġakudan s‑dar willi mmutnin d‑ntni sul ddrn, ra‑tissanm mddn‑ad is‑ḥgrn sidi rbbi.»

³¹ ġir inna iwaliwn‑an, istġ‑wakal ġ‑ddawatsn.

³² irẓm‑wakal iṣrṭ‑n mddn‑an d‑ayt‑darsn. iṣrṭ‑n ayt‑quraḥ kullutn d‑wayda‑nsn kullut.

³³ ggʷzn ntni ula kullu ma‑igan winsn, d‑ntni sul ddrn, s‑udġar n‑willi mmutnin. iqqn‑fllasn‑wakal, tthlkn ġ‑wammas n‑tamunt laḥ‑tn.

³⁴ lliġ sfldn ayt‑israyil i‑tġuya‑nsn, rwln kullu willi‑asn‑isutln ar‑ttinin: «ad‑ur‑aġ‑n‑iṣrṭ‑wakal ula nkkʷni.»

³⁵ tffuġ‑d lɛafiyt zġ‑dar sidi rbbi ġakudan, tfnu irgazn lli‑n‑issakmurn lbh̬ur s‑sin id‑miyya d‑smmus id‑mraw (250).

³⁶ isawl‑d sidi rbbi s‑musa yini‑as:

³⁷ «ini i‑aliɛazr lli‑igan yus n‑umsakmur harun: ‹ssitti taṭṭasin‑an zġ‑lɛafiyt, tssuktt‑n tirgin‑nsnt ġ‑mani yaggugn.›

³⁸ ašku tyawẓlaynt‑iyi taṭṭasin n‑irgazn lli‑mmutnin f‑tjli‑nsn. zayd ilmma tḍrrqm‑tnt ad‑gnt ma‑s‑a‑tdalm tisi n‑tġrṣi. ašku ssakmurn‑tnt‑d ġ‑umnid n‑rbbi siditsn, hatnti tyawẓlaynt‑iyi. ġmkan a‑rad‑bdda‑gnt tamatart i‑ayt‑israyil.»

³⁹ iddu‑umsakmur aliɛazr, yasi‑d taṭṭasin n‑wanas lli‑d‑yadlli‑ssakmurn willi jdrnin, zaydn ḍrrqn‑tnt skrn zġ‑gisnt asddul i‑tisi n‑tġrṣi.

⁴⁰ iskr aliɛazr ġmklli‑s‑as‑inna sidi rbbi f‑imi n‑musa. iga mayan lyamart ma‑s‑a‑d‑kttin ayt‑israyil, a‑ur‑sar‑n‑yakmur yan a‑ibh̬h̬r ġ‑umnid n‑sidi rbbi, abla imsakmurn lli‑ganin amud n‑harun, a‑ur‑imil ijru‑asn zund quraḥ d‑usmun‑ns.

⁴¹ ndid azkka ar‑kullu‑ttngmug tamunt n‑ayt‑israyil f‑musa d‑harun inin‑asn: «wa kunni tnġam ayt‑sidi rbbi.»

⁴² lliġ‑di‑tmun tamunt‑an f‑musa d‑harun, grawln kullu s‑uh̬iyyam n‑umnaggar, ẓrn amdlu idl‑t, iban‑d lmajd n‑sidi rbbi.

⁴³ imatti‑n musa d‑harun s‑lgddam n‑uh̬iyyam n‑umnaggar.

⁴⁴ yini sidi rbbi ġakudan i‑musa:

⁴⁵ «ittyat zġ‑gr tamunt‑an a‑tn‑fnuġ s‑yat‑twal.» imma ntni ḍrn s‑sin f‑uwdmawn‑nsn s‑wakal.

⁴⁶ yini musa i‑harun: «asi taṭṭast‑nk, tɛmmrt‑stt s‑trgin rġanin zġ‑tisi n‑tġrṣi, tgt gis lbh̬ur, tḥarrut tawit‑stt s‑wammas n‑tamunt tfukkut‑tn. ašku igguz‑d fllasn h̬ziyt zġ‑dar sidi rbbi. han aṭṭan ar‑d‑izzigiz.»

⁴⁷ yasi‑tt harun ġmklli‑s‑as‑inna musa, yazzl s‑wammas n‑tamunt, walaynni han aṭṭan ar‑d‑izzigiz ġ‑gr mddn. ig‑n lbh̬ur ar‑itfukku mddn.

⁴⁸ ibidd ġmkan ġ‑gr willi mmutnin d‑willi ddrnin, s‑ibidd‑waṭṭan.

⁴⁹ imma willi mmutnin s‑waṭṭan‑an gan kkuẓ d‑mraw n‑walf d‑ssa n‑id miyya (14 700), bla willi mmutnin s‑tġawsa n‑quraḥ.

⁵⁰ iwrri‑d ilmma harun s‑dar musa ġ‑imi n‑uh̬iyyam n‑umnaggar. ibidd‑waṭṭan.