tasutin 15 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

luṣiyat f‑twafkiw d‑isakmurn

¹ yini sidi rbbi i‑musa: «sawl s‑ayt‑israyil tinit‑asn:

² ‹ha ma‑fllawn‑illan ġakud lliġ tkšmm akal lli‑awn‑fkiġ a‑gis‑tzdġm.

³ iġ‑n‑tssattuym tawafka s‑lɛafiyt a‑ig aḍu imimn i‑rbbi siditun zġ‑imugayn nġd ulli, ig‑iyt tiġrṣi ijdrn nġd tiġrṣi n‑sslamt nġd tayafut n‑tgallit nġd tawafka n‑lh̬ir nġd tin lɛid,

⁴ illa f‑wanna iran a‑issakmur tiġrṣi‑ns i‑rbbi sidis, ad‑as‑izayd ula tawafka n‑imndi. ra‑tg nttat yan‑uġʷrraf n‑uggʷrn [kraḍ id‑kilu], ityawrway s‑rrbɛ n‑tbʷqqalt n‑zzit [yan litru].

⁵ izayd ula tawafka n‑tissi i‑kraygatt tiġrṣi ijdrn ula tin sslamt. ra‑tg nttat rrbɛ n‑tbʷqqalt n‑waman n‑waḍil iktin [yan litru] i‑kraygatt alqqaġ.

luṣiyat f‑wanna ijlan

^22-23 « ‹ha ma‑fllawn‑illan iġ‑tddam ard tjlum bla tnuwwam. ašku luṣiyat lli‑f‑kʷn‑yuṣṣa rbbi siditun f‑imi n‑musa llant bdda f‑kraygatt tasut zġ‑wass lli‑ġ‑tnt‑inna rbbi siditun tasawnt.

²⁴ iġ‑ur‑srsnti‑tskirm bla tnuwwam ġayan, wala tssn fllas tamunt, hati illa f‑kullu tamunt a‑n‑tssattuy yan‑umugay a‑ig tiġrṣi ijdrn, tfk‑d aḍu imimn i‑rbbi siditun. tzaydm‑as tawafka n‑imndi d‑twafka n‑tissi ġmklli‑f‑kʷn‑uṣṣaġ, tzaydm ula yan‑waġaḍ f‑tjli‑nun.

²⁵ ġmkan a‑s‑ra‑ifukku‑umsakmur kullu tamunt n‑ayt‑israyil. rad‑asn‑ṣamḥġ ašku ur‑nuwwan ad‑jlun, fkn fllas asakmur ijdrn f‑tjli‑nsn i‑rbbi siditsn.

²⁶ rad‑ṣamḥġ i‑kullu tamunt n‑ayt‑israyil, ntni d‑ibrraniyn nna‑darsn‑igawrn, ašku mddn kullutn jlan bla nuwwan.

²⁷ « ‹iġ‑ijla ġir yan giwn bla inuwwa, illa fllas a‑iskr yat taġaṭṭ ikkan yan‑usggʷas a‑tg asakmur f‑tjli‑ns.

²⁸ ġmkan a‑ra‑ifukku‑umsakmur ġ‑umnid n‑rbbi siditun walli ijlan bla inuwwa. ra‑t‑ifukku, ṣamḥġ‑as.

²⁹ yat‑tnbaṭṭ a‑rad‑darun‑yili f‑wanna ijlan bla inuwwa, ig‑iyt gu‑darun n‑ayt‑israyil, nġd abrrani igawrn darun.

³⁰ « ‹imma wanna inuwwan a‑iffuġ aġaras, ig‑iyt gu‑darun n‑ayt‑israyil nġd abrrani igawrn darun, han iḥgr rbbi siditun. ra‑yakuf ntta zġ‑gr mddn‑ns.

³¹ han iḥgr awal n‑rbbi siditun, yanf i‑maylli‑f‑uṣṣaġ. ra‑yakuf nttan, tili fllas lɛqubit‑ns.»

³² lliġ llan ayt‑israyil ġ‑lh̬la, afn‑in yan‑urgaz ar‑issmunu ikššuḍn ġ‑wis ssa n‑uwssan.

³³ awin‑t‑id willi‑t‑in‑yufan ar‑issmunu ikššuḍn, s‑umnid n‑musa d‑harun d‑tamunt n‑mddn kullutn.

³⁴ gn‑t‑in ġ‑ddu tiḍaf, ašku ur‑ssinn ma‑rad‑as‑skrn.

³⁵ yini‑d sidi rbbi i‑musa ġakudan: «iqqan‑d argaz‑an a‑immt. ih̬ṣṣa kullu tamunt a‑t‑in‑tkkat s‑iẓran ġ‑brra n‑usras.»

³⁶ awin‑t s‑brra n‑usras, utn‑t s‑iẓran aylliġ immut, ġmklli‑s‑yuṣṣa sidi rbbi musa.