tasutin 14 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

ar‑kullu‑tngmugn ayt‑israyil

¹ ar‑tssġuyyu tamunt n‑ayt‑israyil ar‑kullu‑allan ġ‑iḍ‑an.

² ar‑kullu‑tngmugn f‑musa d‑harun ar‑asn‑ttinin: «mra is‑nmmut ġ‑miṣr, ula mra is‑nmmut ġir ġ‑lh̬la‑yad.

³ mah̬ a‑yġ‑d‑yiwi sidi rbbi s‑tmazirt‑ad a‑gis‑nmmt s‑uwzzal, tyamaẓnt‑tmġarin‑nġ d‑tarwa‑nġ mẓẓinin s‑tgʷmrt? is‑ur‑aġ‑yuf ġilad a‑nwrri s‑miṣr?»

⁴ inin i‑ngratsn: «nkrat ġilad a‑nsti anmġur yaḍni, nwrri s‑miṣr.»

⁵ iḍr musa d‑harun f‑uwdm‑nsn s‑wakal ġ‑umnid n‑kullu tamunt n‑ayt‑israyil.

tuggʷa n‑yahušuɛ d‑kalab

⁶ imma yahušuɛ yus n‑nuwn d‑kalab yus n‑yafunna lli‑ganin zġ‑gr willi‑n‑yuggʷan akal‑an, bbin timlsa‑nsn,

⁷ inin i‑kullu tamunt n‑ayt‑israyil: «akal lli‑nsslaka, hati ifulki bahra.

⁸ iġ‑fllanġ‑irḍa sidi rbbi, rad‑aġ‑išškšm s‑wakal‑an ifk‑aġ‑t, ig akal lli‑ġ‑ingi‑ugʷfay d‑tammnt.

⁹ ad‑ur‑tẓim d‑sidi rbbi wala tksuḍm zġ‑imzdġn n‑wakal‑an, ašku rad‑gn aġrum ġ‑imi‑nġ. hati laḥ‑asn ma‑tn‑issntaln, illa didnġ rbbi da‑illan. a‑ur‑zġ‑gisn‑tiksaḍm.»

musa iḍalb rbbi f‑mddn‑ns

¹⁰ walaynni tzuyd tamunt‑an inin kullu a‑tn‑utn s‑iẓran. iban‑d lmajd n‑sidi rbbi ġakudan i‑ayt‑israyil kullutn ġ‑uh̬iyyam n‑umnaggar.

¹¹ isawl‑d sidi rbbi s‑musa yini: «mnšk a‑ra‑yyi‑sul‑ḥgrn mddn‑ad? mnšk a‑rad‑qaman ur‑iyi‑uminn, wah̬h̬a kullu timitar lli‑skrġ ġ‑wammas‑nsn?

¹² ra‑tn‑utġ s‑waṭṭan, kksġ‑asn lwrt‑nsn, gġ‑k kiyi d‑uqbil imqqurn itjhhdn yagʷr‑tn.»

¹³ yini musa i‑sidi rbbi: «walaynni rad‑fllas‑sfldn ayt‑miṣr, ašku zġ‑wammas‑nsn a‑zġ‑tssiwnt mddn‑ad s‑jjhd‑nk,

¹⁴ inin fllas ula i‑willi zdġnin ġ‑wakal‑ad. hati sfldn izd kiyi a‑sidi rbbi a‑illan ġ‑tuẓẓunt n‑mddn‑nk, ašku tbant‑aġ‑d udm s‑uwdm, tsrst fllanġ amdlu‑nk, ar‑aġ‑tzggurut s‑tannalt n‑umdlu ġ‑uzal d‑tin n‑lɛafiyt ġ‑iyḍ.

¹⁵ iġ‑tnġit mddn‑ad kullutn ġilad, rad‑inin iqbiln lli‑isfldn i‑lah̬bar‑nk:

¹⁶ ‹ur‑iẓḍar rbbi siditsn a‑išškšm mddn‑ns s‑wakal lli‑f‑iggulla ad‑asn‑t‑ifk, ġayan a‑f‑tn‑inġa ġ‑lh̬la.›

¹⁷ ġilad a‑rbbi‑nu, a‑tigat lquwwa‑nk ġmklli‑s‑aġ‑tqawlt tinit:

¹⁸ ‹rbbi da‑bdda‑illan, iga wad ur‑izrabn a‑iġḍb, tigat dars tayri izgan, ar‑itṣamaḥ i‑willi ʷh̬šnnin ula willi jlanin, walaynni ur‑ra‑tn‑yadj bla lɛqubit. ar‑itrara f‑lh̬ʷšant n‑lajdud i‑tarwa‑nsn ula tarwa n‑tarwa‑nsn, ar tis kraṭṭ ula tis kkuẓṭ tasutin.›

¹⁹ ġilad a‑sidi rbbi ḍalbġ‑ak a‑tṣamḥt f‑lh̬ʷšant n‑mddn‑ad s‑tugtt n‑lḥnant‑nk izgan, ġmklli‑s‑a‑ysn‑bdda‑ttṣamaḥt zġ‑ġakud lliġ‑d‑ffuġn zġ‑miṣr sul s‑ġilad.»

awal n‑sidi rbbi f‑ayt‑israyil

²⁰ yini‑as sidi rbbi ġakudan: «ha‑yyi ṣamḥġ‑asn ġmklli‑s‑yyi‑tḍalbt.

²¹ awal iṣḥan zund tudrt‑inu ayd‑awn‑nniġ, ġmklli iṣḥa is‑rad‑kullu‑tɛmmr ddunit s‑lmajd n‑wad bdda illan.

²² han ġwid iẓran lmajd‑inu d‑timitar lli‑skrġ ġ‑miṣr ula ġ‑lh̬la, armn‑iyi mrawt‑twal, ur‑a‑sflidn s‑wawal‑inu,

²³ ḥtta yan gisn ur‑ra‑iẓr akal lli‑f‑ggulliġ a‑t‑fkġ i‑id‑babatsn. ur‑ra‑t‑iẓr ḥtta yan ġ‑ġwilli‑yyi‑iḥgrn.

²⁴ walaynni ah̬ddam‑inu kalab, issbayyn‑d rruḥ yaḍni, iḍfur‑iyi zġ‑ttmi n‑nniyt‑ns. ra‑t‑šškšmġ s‑tmazirt lli‑d‑isslaka, ṭṭafn‑tt tarwa n‑tarwa‑ns,

²⁵ wah̬h̬a zdġn ayt‑ɛamaliq d‑ayt‑kanɛan ġilad ġ‑talatin‑an. azkka wrryat ġ‑uġaras n‑lh̬la s‑tsga n‑umda azggʷaġ.»

²⁶ isawl‑d sidi rbbi s‑musa d‑harun yini‑asn:

²⁷ «mnšk a‑rad‑sul‑flla‑ttngmug tamunt‑ad yʷh̬šnn? sfldġ i‑ingmugn n‑mddn‑ad n‑ayt‑israyil lli‑s‑a‑flla‑tngmugn.

²⁸ sawl srsn tinit: ‹izga‑wawal‑ad zund tudrt‑inu, inna‑t wad bdda illan. ġaylli‑mi‑darun‑sfldġ a‑s‑rad‑awn‑rarġ.

²⁹ rad‑kullu‑tḍrm tmmtm ġ‑lh̬la‑yad. han willi dar sin id‑mraw (20) n‑usggʷas s‑uflla ġ‑lḥsab‑nun, ar‑flla‑tngmugn,

³⁰ ḥtta yan gisn ur‑ra‑ikšm s‑tmazirt lli‑s‑qawlġ a‑kʷn‑srs‑awiġ a‑gis‑tzdġm, abla kalab yus n‑yafunna d‑yahušuɛ yus n‑nuwn.

³¹ imma tarwa‑nun lli‑f‑tnnam rad‑tyamaẓn s‑tgʷmrt, ntni a‑rad‑šškšmġ, h̬alḍn akal lli‑ur‑trim.

³² han kunni rad‑kullu‑tḍrm tmmtm ġ‑lh̬la‑ya.

³³ kkuẓ id‑mraw (40) n‑usggʷas a‑rad‑kssan tarwa‑nun lksibt ġ‑lh̬la, ar‑trfufunn f‑ssibt‑nun kunni‑ad ur‑yuminn, ard tmmtm kunni kullukʷn ġ‑lh̬la.

³⁴ ġunšk lli‑gan‑uwssan ġ‑di‑tsslakam akal‑an, a‑rad gn isggʷasn lli‑ra‑tasim lɛqubit‑an, kraygatt ass s‑usggʷas. kkuẓ id‑mraw (40) n‑wass a‑gis‑tkkam, d‑kkuẓ id‑mraw (40) n‑usggʷas a‑ra‑tẓrm mamnk a‑kʷn‑teḍaḍḍaġ.

³⁵ nkki‑ad igan rbbi siditun ayd isawln. s‑ṣṣaḥt rad‑skrġ ġayan i‑kullu tamunt‑ad yʷh̬šnn lli‑d‑flla‑imšaškan. lh̬la‑yad a‑ġ‑rad‑kullu‑tmmtm, ttmmum gis.› »

³⁶ imma irgazn lli‑yuzn musa a‑n‑aggʷn akal, wrrin‑d ar‑tɛawadn f‑wakal‑an is‑yʷh̬šn, rarn tamunt kullutt a‑ttngmug f‑musa,

³⁷ mmutn ntni s‑waṭṭan ġakudan ġ‑umnid n‑sidi rbbi, kullu willi itɛawadn is‑yʷh̬šn‑wakal.

³⁸ iqama ġir yahušuɛ yus n‑nuwn d‑kalab yus n‑yafunna ġ‑gr willi iddan ad‑ẓrn ma‑illan ġ‑wakal‑an.

ttrẓan ayt‑israyil

³⁹ lliġ isslkm musa iwaliwn‑an i‑kullu ayt‑israyil, taġ‑tn‑tguḍi bahra.

⁴⁰ nkrn zikk ṣbaḥ irin ad‑awnn s‑iwrar‑an ar‑ttinin: «ha‑yaġ ġila ra‑nawn s‑illi‑s‑aġ‑iqawl rbbi siditnġ, ašku iban ginġ is‑njla bahra.»

⁴¹ imma musa irur‑asn: «mah̬ ġilad a‑tram a‑tanfm i‑wawal n‑sidi rbbi bla lfaytt?

⁴² ad‑ur‑tawnm. han ra‑ttrẓm f‑ufus n‑inuwwašn‑nun. ašku sidi rbbi ur‑didun‑illi.

⁴³ ayt‑ɛamaliq d‑ayt‑kanɛan a‑illan ġ‑lgddam‑nun, ra‑tḍrm s‑uwzzal. ašku twrrim ur‑sul‑tḍfurm sidi rbbi, d‑nttan ur‑ra‑didun‑yili.»

⁴⁴ imma ntni ssmqqurn ih̬fawn‑nsn, awnn s‑iwrar. walaynni ur‑iffuġ ṣṣnduq n‑lɛhd n‑sidi rbbi zġ‑usras wala iffuġ musa zġ‑gis.

⁴⁵ ha ayt‑ɛamaliq d‑ayt‑kanɛan lli‑izdġn ġ‑iwrar‑an huwwdn‑d srsn ġakudan, utn‑tn rẓn‑tn, ẓẓun gisn aylliġ lkmn tamdint n‑ḥurma.