tasutin 13 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

sin d‑mraw n‑inigi iwnn s‑kanɛan

¹ isawl‑d sidi rbbi s‑musa yini‑as:

² «azn kra n‑irgazn a‑n‑aggʷn ẓrn ma‑illan ġ‑wakal n‑kanɛan lli‑fkiġ i‑ayt‑israyil. kraygatt taqbilt n‑id‑babatsn, taznt zġ‑gis yan‑umġar.»

³ yazn‑tn ilmma musa zġ‑lh̬la n‑faran, ġmklli‑s‑as‑inna sidi rbbi. gn kullu irgazn‑an imġarn ġ‑gr ayt‑israyil.

¹⁷ lliġ‑tn‑yuzn musa a‑n‑aggʷn ẓrn ma‑illan ġ‑wakal n‑kanɛan, yini‑asn: «awnat s‑lh̬la n‑nagab, tzaydm ilmma s‑tmazirt n‑iwrar,

¹⁸ tẓrm mamnk a‑tga‑tmazirt‑an, tẓrm ula mddn lli‑gis‑zdġnin, is‑tjhhdn nġd ḍɛfn? is‑drusn nġd ggutn?

¹⁹ tẓrm mamnk a‑iga‑wakal lli‑ġ‑zdġn, is‑iɛdl nġd uhu? tẓrm ula mamnk ad‑gant‑tmdinin lli‑ġ‑zdġn, izd ġir tigʷmma nġd lulliyn‑asnt igudar dusnin?

²⁰ tẓrm ula akal, is‑ijji nġd ihiyf? is‑gis taganin nġd uhu? zɛmat tawim‑d kra zġ‑lġllat n‑wakal‑an.» tizi‑an tga azmz n‑waḍil amzwaru.

²¹ awnn ġakudan ar‑taggʷan ẓrn ma‑illan ġ‑wakal‑an kullut, zġ‑lh̬la n‑ẓiyn ar tamdint n‑raḥub ġ‑tsga n‑tizi n‑ḥamat.

²² iwnn zwar s‑lh̬la n‑nagab, lkmn tamdint n‑ḥabrun. ilint‑gis‑tqbilin n‑ah̬iman d‑šišay d‑talmay, ntni gan kullu tarwa n‑ɛanaq. ḥabrun ttbna ssa n‑isggʷasn ur‑ta‑ttbni‑tmdint n‑ṣuɛan ġ‑miṣr.

²³ huwwdn s‑talat n‑aškul, bbin gis yan iẓli ġ‑tlla yat‑tzrmt n‑waḍil imqqurn, asin‑tt‑id sin f‑yan‑ukuray. awin‑d ula kra zġ‑rrmman d‑ikuzarn.

²⁴ f‑ssibt n‑tzrmt lli‑d‑gis‑bbin ayt‑israyil a‑f‑gan i‑udġar‑an ism ‹talat n‑aškul› [tga lmɛna‑ns ‹tizrmt›].

tuggʷa f‑wakal d‑imzdġn‑ns

²⁵ kkuẓ id‑mraw (40) n‑wass a‑n‑zzrin ar‑n‑taggʷan ẓrn ma‑illan ġ‑wakal‑an, wrrin‑d ilmma.

²⁶ lkmn‑d musa d‑harun d‑kullu tamunt n‑ayt‑israyil ġ‑lh̬la n‑faran ġ‑tsga n‑qadaš. sawln‑asn kullutn f‑ma‑illan, mln‑asn lġllat n‑tmazirt‑an.

²⁷ inin i‑musa: «nkka‑d akal lli‑s‑aġ‑tuznt. iṣḥa is‑gis‑ingi‑ugʷfay d‑tammnt. ula lġllat‑ns hatnti.

²⁸ walaynni mddn lli‑izdġn ġ‑wakal, tjhhdn ntni. timdinin‑nsn mqqurnt bahra s‑igudar dusnin. nẓra ġin ayt‑ɛanaq ula ntni.

²⁹ ula lh̬la n‑nagab, zdġn gis ayt‑ɛamaliq. ula tamazirt n‑iwrar, ɛmmrn‑tt ayt‑ḥit d‑ayt‑yabus d‑ayt‑amur. ilin ayt‑kanɛan ġ‑tama n‑umda ar tama n‑wasif n‑urdun.»

³⁰ imma kalab issfssa mddn ġ‑umnid n‑musa yini: «a‑nzayd ġilad nawn s‑wakal‑an nɛmmr‑t, ašku nẓḍar‑as.»

³¹ imma willi dids munnin nnan: «ur‑nẓḍar a‑nddu s‑dar mddn‑an, ašku tjhhdn fllanġ.»

³² sawln i‑ayt‑israyil f‑mnšk a‑s‑išqa‑wakal lli‑n‑uggʷan, inin: «han akal lli‑nsslaka iga wad išttan imzdġn‑ns. mddn lli‑gis‑nẓra, hatni kullu ġzzifn bahra.

³³ nẓr gis ula ‹nafilim› n‑ayt‑ɛanaq lli‑ganin tarwa n‑iġzuyfa tjhhdnin. iban‑aġ ih̬f‑nġ zund ibršan, d‑ġmkan a‑nga ġ‑iẓri‑nsn ula ntni.»