tasutin 11 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

ingmugn n‑ayt‑israyil

¹ izri ma‑izrin bdun mddn ar‑tngmugn f‑tmmara‑nsn, isfld‑asn sidi rbbi. lliġ isfld sidi rbbi i‑ma‑ttinin, iznd lġaḍab‑ns aylliġ trġa lɛafiyt n‑sidi rbbi ġ‑gratsn, tjdr kra n‑tsgiw ġ‑usras.

² ġrn‑in mddn ġakudan i‑musa. iẓẓall musa iḍalb sidi rbbi, s‑tnaqṣ lɛafiyt th̬si.

³ ig ilmma ism ‹tabɛira› i‑udġar‑an [tga lmɛna‑ns ‹ajddar›], ašku trġa lɛafiyt n‑sidi rbbi ġ‑gratsn.

⁴ bdun iġribn lli‑d‑didsn‑imunn ar‑tẓuẓḍn tiram n‑miṣr, ar‑ssġuyyun ula ayt‑israyil ar‑ttinin: «amar yufan a‑nšš kra n‑tfiyi.

⁵ nkti‑d islman lli‑nštta ġ‑miṣr bla iqaridn, d‑lh̬yar d‑lmnun d‑lḥarrif d‑uẓalim d‑tskrt.

⁶ imma ġilad tmda ṣṣaḥt‑nġ, ur‑a‑ntmnad abla ġwad mi ttinin ‹man›.»

⁷ amššu‑ad n‑‹man› iga zund amud n‑lqzbur, llun‑ns iwrrġ zund salaban.

⁸ ar‑tffuġn mddn ar‑t‑id‑grrun. ar‑t‑ẓẓaḍn ġ‑uzrg nġd ar‑ti‑tkkʷmn ġ‑ufrdu. ar‑t‑ssnwan ġ‑tkinin, nġd ar‑t‑qrrfn ar‑zġ‑gis‑skarn tinnurin. tg‑tirmt‑ns zund arh̬ṣiṣ inwan ġ‑zzit.

⁹ ġakud nna‑di‑teṭṭar‑tġli ġ‑iyḍ ġ‑usras, ar‑d‑dids‑itmunu ‹man›.

ṭiyr i‑musa f‑mddn‑ns

¹⁰ isfld musa i‑mddn ar‑ssġuyyun, kraygatt yan d‑tawjja‑ns ġ‑imi n‑uh̬iyyam‑ns. iznd lġaḍab irġan n‑sidi rbbi. ṭiyr i‑musa bahra,

¹¹ yini musa i‑sidi rbbi: «mah̬ a‑tgit ah̬ddam‑nk ġ‑tmukrist‑ad? mad‑skrġ ur‑srs‑trḍit, aylliġ flla tsrst kullu aẓaẓu n‑mddn‑ad?

¹² izd nkkin a‑irban mddn‑ad, aruġ‑tn‑d zġ‑udis‑inu aylliġ‑iyi‑tuṣṣat a‑tn‑asiġ f‑idmarn‑inu ġmklli ttasi‑tmġart arraw‑ns issumumn, ard‑tn‑sslkmġ tamazirt lli‑f‑tggullit a‑stti‑tfkt i‑id‑babatsn?

¹³ maniġ rad‑afġ tifiyi ma‑s‑a‑ššbaɛġ kullu mddn‑ad? hatni ar‑flla‑ssġuyyun ar‑ttinin: ‹fk‑aġ tifiyi ma‑nštta.›

¹⁴ ur‑ẓḍarġ ad‑asiġ kullu mddn‑ad waḥduyy. hati asitti‑yad iẓẓay bahra flla.

¹⁵ iġd ġmkad a‑gigi‑trit, ġir nġ‑iyi ġil ġil iġ‑flla‑trḍit, a‑ur‑iyi‑sul‑taġ‑tguḍi.»

ssa n‑id‑mraw n‑umġar

¹⁶ yini sidi rbbi i‑musa: «awi‑yyi‑d ssa n‑id‑mraw (70) n‑urgaz zġ‑gr imġarn n‑ayt‑israyil, ad‑gn willi‑s‑tssnt is‑gan imġarn d‑iriyasn ġ‑dar mddn‑nsn. tssmunt‑tn‑d, biddn dik ġ‑dar‑uh̬iyyam n‑umnaggar.

¹⁷ ra‑n‑gguzġ ad‑dik‑sawlġ, asiġ zġ‑rruḥ lli‑fllak‑illan gġ‑t fllasn, baš ad‑ak‑ɛawnn ġ‑uẓaẓu n‑mddn a‑ur‑ti‑tasit waḥduk.

¹⁸ zayd ġilad tinit i‑mddn: ‹ssġusat ih̬fawn‑nun i‑uzkka, ašku ra‑gis‑tššm tifiyi. rbbi siditun isfld‑awn lliġ a‑tssġuyyum ar‑ttinim: ma‑rad‑aġ‑d‑ifk tifiyi ma‑nštta? tinim ula: han miṣr a‑ġ‑aġ‑illa lh̬ir. ẓrat ġilad rbbi siditun rad‑awn‑d‑ifk tifiyi ma‑tšttam.

¹⁹ urd ġir yan‑wass a‑ra‑stti‑tššm ula sin‑uwssan, ula smmus ula mraw ula sin id‑mraw (20) n‑wass.

²⁰ ayyur n‑waḍan a‑ra‑stti‑tšttam ard‑awn‑di‑tffuġ zġ‑inh̬ar tḥašam‑tt, ašku tagʷim rbbi siditun da‑illan ġ‑wammas‑nun, ar‑tallam ġ‑umnid‑ns, ar‑ttinim: mah̬ a‑d‑nffuġ zġ‑miṣr?› »

²¹ yini‑as musa ġakudan: «mddn‑ad dari illan gan sḍis id‑miyya n‑walf (600 000) n‑yan, walaynni ar‑ttinit: ‹rad‑asn‑fkġ tifiyi mad‑šttan ayyur n‑waḍan.›

²² is‑ra‑tn‑yuwdu iġ‑nġrṣ i‑tuwrutin n‑uwlli d‑imugayn? is‑ra‑tn‑uwdun islman n‑umda iġ‑tn‑d‑nssmun?»

²³ yini sidi rbbi i‑musa: «is‑igzzul‑ufus n‑wad bdda illan? ġilad a‑ra‑tẓrt awal‑inu is‑ra‑yafu nġd uhu.»

²⁴ iffuġ‑d musa yini i‑mddn maylli‑as‑d‑inna sidi rbbi, issmun‑d ssa n‑id‑mraw (70) n‑urgaz zġ‑gr imġarn n‑ayt‑israyil, isslulliy‑tn i‑uh̬iyyam.

²⁵ igguz‑d sidi rbbi ġakudan ġ‑umdlu isawl‑d srs, yasi zġ‑rruḥ lli‑illan f‑musa ig‑t f‑ssa n‑id‑mraw n‑umġar. lliġ‑fllasn‑ittrs rruḥ, ar‑sawaln s‑maylli‑asn‑imala rbbi. ġir tizi‑an ad‑skrn ġmkan.

²⁶ imma sin ġ‑imġarn‑an qaman ġ‑usras, ur‑ffuġn s‑uh̬iyyam. ismawn‑nsn gan aldad d‑midad. ittrs‑d fllasn rruḥ ula ntni, ar‑sawaln ġ‑usras s‑maylli‑asn‑imala rbbi.

²⁷ yazzl yan‑uɛyyal iɛlm musa yini‑as: «han aldad d‑midad ar‑sawaln s‑wawal n‑rbbi ġ‑usras.»

²⁸ isawl‑d yahušuɛ yus n‑nuwn lli‑igan amqasa n‑musa zġ‑mẓẓiy‑ns, yini‑as: «ḥṣr‑tn a‑sidi musa.»

²⁹ irar‑as musa: «is‑trit a‑yyi‑tssimġurt f‑wiyya? amar yufan ad‑kullu‑sawaln mddn n‑sidi rbbi s‑wawal‑ns, ig fllasn sidi rbbi rruḥ‑ns.»

³⁰ iwrri‑d ilmma musa d‑imġarn n‑ayt‑israyil s‑usras.

rbbi yuzn‑asn‑d tiskurin

³¹ sidi rbbi issnkr‑d aḍu ġakudan, yawi‑d tiskurin n‑igran zġ‑tsga n‑umda, iluḥ‑tn‑d ġ‑lh̬la lli‑ilulliyn i‑usras. igatnt ġ‑kraygatt tasga s‑ma‑itggan tawada n‑wass. gudint f‑wakal ma‑itggan sin iġalln.

³² ffuġn mddn ar‑d‑smununn tiskurin ġ‑wass‑an azal wala iḍ, wala wis sin‑uwssan kullut. kud yan issmun‑d uggʷar n‑mraw isittitn, fsrn‑tnt ġ‑tamiw n‑usras ad‑iqarnt.

³³ ar‑sul‑tfiẓẓn tifiyi, ur‑ta‑stt‑kmmln, s‑iznd lġaḍab n‑sidi rbbi f‑mddn‑an, yut‑tn s‑waṭṭan bahra išqan.

³⁴ f‑mayan a‑f‑a‑ttinin i‑udġar‑an ‹qibrut‑hatawa› [tga lmɛna‑ns ‹ismḍal n‑ššhawa›], ašku ġin a‑ġ‑mḍln willi bahra šthanin tifiyi.

³⁵ muddun ilmma mddn zġ‑qibrut‑hatawa s‑ḥaṣirut, gawrn gis.