tasutin 10 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

amuddu zġ‑udrar n‑sinay

¹¹ wis sin isggʷasn tigira n‑ufuġ zġ‑miṣr, ġ‑wass wis sin id‑mraw (20) n‑wayyur wis sin, ityalal‑umdlu f‑uh̬iyyam n‑tuggʷa.

¹² nkrn ayt‑israyil muddun ġ‑lh̬la n‑sinay ftun ass f‑wass ar illiġ‑d‑ittrs‑umdlu ġ‑lh̬la n‑faran.

²⁹ inna musa i‑uḍggʷal‑ns ḥubab lli‑igan yus n‑raɛwil [yatru] gu‑midyan: «ha‑yaġ ra‑nmuddu s‑illi‑f‑aġ‑inna sidi rbbi ‹rad‑awn‑t‑fkġ›. mun didnġ, nskr gik afulki, ašku sidi rbbi iqawl i‑ayt‑israyil s‑ufulki.»

³⁰ imma nttan irur‑as: «uhu, ur‑rad‑dduġ. rad‑wrriġ s‑tmazirt‑inu s‑dar ayt‑dari.»

³¹ yini‑as musa: «a‑ur‑aġ‑tflt, ašku kiyi a‑issnn maniġ a‑nsras ġ‑lh̬la‑ya, tgt kiyi zund alln‑nġ.

³² iġ‑didnġ‑tmunt, lh̬ir nna‑yaġ‑iskr sidi rbbi, rad‑ak‑t‑nskr ula kiyi.»

³³ ġmkan a‑s‑nkrn zġ‑dar‑udrar n‑sidi rbbi, muddun tawada n‑kraḍ‑uwssan. kraḍ‑uwssan‑an ar‑ittidu ṣṣnduq n‑lɛhd ġ‑lgddam‑nsn, izwar‑asn s‑illiġ rad‑sunfun.

³⁴ ġakud nna‑ffuġn zġ‑illiġ srsn, yili‑fllasn‑umdlu n‑sidi rbbi ġ‑uzal.

³⁵ ġakud nna‑usin ṣṣnduq i‑umuddu, yini musa: «nkr a‑sidi rbbi tmzrt inuwwašn‑nk, rwln ula ġ‑umnid‑nk winna‑k‑kurhanin.»

³⁶ d‑ġakud nna‑ittrs ṣṣnduq i‑usunfu yini: «wrri‑d a‑sidi rbbi s‑wammas n‑wafḍan n‑ayt‑israyil.»