tasutin 1 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

musa iḥasb tamunt n‑ayt‑israyil

¹ wis sin isggʷasn tigira n‑ufuġ n‑ayt‑israyil zġ‑wakal n‑miṣr, ġ‑wass izwarn n‑wayyur wis sin, isawl‑d sidi rbbi s‑musa ġ‑uh̬iyyam n‑umnaggar ġ‑lh̬la n‑sinay yini‑as:

² «ḥasbat tamunt n‑ayt‑israyil kullutt, tarat ismawn‑nsn yan s‑yan, kraygatt awtm s‑tagʷmat‑ns d‑uẓur n‑lajdud‑ns.

³ zayd kiyi d‑harun tḥasbm kullu ma‑ikkan sin id‑mraw n‑usggʷas (20) s‑uflla ġ‑israyil, kullu ma‑iẓḍarn a‑iffuġ s‑imiġ, tarat ismawn‑nsn akabar s‑ukabar.

⁴ ra‑k‑iɛawn yan‑urgaz zġ‑kraygatt taqbilt. kud yan ra‑ig ih̬f f‑tagʷmat n‑id‑babas.»

⁴⁴ iḥasb‑tn musa d‑harun d‑sin d‑mraw (12) n‑ih̬f n‑ayt‑israyil, iddu kud yan gisn iḥasb taqbilt‑ns.

⁴⁵ ḥasbn ġ‑ayt‑israyil kullu ma‑ikkan sin id‑mraw (20) n‑usggʷas s‑uflla, yiẓḍar a‑itffuġ s‑imiġ, kraygatt yan s‑ism‑ns d‑uẓur n‑lajdud‑ns.

⁴⁶ willi ḥasbn gan sḍis id‑miyya d‑kraḍ n‑walf, d‑smmus id‑miyya, d‑smmus id‑mraw (603 550).

tawuri n‑ayt‑lawi

⁴⁷ walaynni ur‑ḥasbn taqbilt n‑ayt‑lawi,

⁴⁸ ašku inna sidi rbbi i‑musa:

⁴⁹ «taqbilt n‑ayt‑lawi, a‑ur‑tti‑tḥasbt ula turit‑stt ġ‑gr‑tqbilin n‑israyil.

⁵⁰ walaynni ẓli ayt‑lawi ad‑tqasan ah̬iyyam n‑tuggʷa, ar‑tsalan irukutn‑ns d‑kullu ma‑gis‑illan. ntni a‑ra‑itasi ah̬iyyam d‑irukutn‑ns kullutn. ra‑tgabaln ah̬iyyam, ar‑as‑sslulliyn tazdġt‑nsn.

⁵¹ ġakud nna‑ra‑imatti‑uh̬iyyam, ayt‑lawi a‑ra‑t‑ifsin. d‑ġakud nna‑ra‑ittrs, ntni a‑ra‑t‑issbiddn. iġ‑t‑in‑ilkm kra n‑yan ur‑zġ‑gisn‑igin, iqqan‑d a‑immt.

⁵² wiyyaḍ n‑ayt‑israyil rad‑ssbiddn ih̬iyyamn‑nsn akabar s‑ukabar, kraygatt argaz s‑ism‑ns d‑mddn‑ns.

⁵³ imma ayt‑lawi rad‑sslulliyn tazdġt‑nsn i‑uh̬iyyam n‑tuggʷa, a‑ur‑yili h̬ziyt f‑tamunt n‑ayt‑israyil. han ayt‑lawi a‑ra‑igabl ah̬iyyam n‑tuggʷa.»

⁵⁴ skrn ayt‑israyil ġmkan. skrn s‑kullu ma‑f‑yuṣṣa sidi rbbi musa.