ṣafanyah 3 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

laman ikmmln ġ‑kraygatt mani

⁹ «ġ‑uwssan‑an rad‑ssġusġ infurn n‑ayt‑tmizar, afad ad‑kullu‑aqran i‑ism n‑rbbi da‑bdda‑illan, qasan‑iyi kullu s‑yan‑uwl.

¹⁰ han zġ‑tsga‑yan n‑isaffn n‑ḥabaš a‑zġ‑rad‑d‑aškin willi‑yyi‑itẓallan, gn tarwa n‑mddn‑inu lli‑akutnin, awin‑iyi‑d tawafka.

¹¹ ġassan ur‑sul‑ra‑yili ma‑ra‑kʷn‑issḥššm f‑iskkirn lli‑s‑iyi‑tɛṣam. ašku‑rad‑ssittiġ zġ‑wammas‑nun ġwilli issimġurn ih̬f‑nsn, d‑ur‑sar‑ra‑yili ma‑issfurrugn ġ‑uwrir‑inu amẓlay.

¹² walaynni rad‑flġ ġ‑wammas‑nun kra n‑igllinn lli‑ur‑dar yat, ar‑ttɛnnan s‑ism n‑rbbi da‑bdda‑illan.

¹³ ġwilli iqaman ġ‑ayt‑israyil ur‑rad‑tɛddan f‑yan, wala rad‑sawaln s‑tkrkas, wala ra‑tk‑tkndawt infurn‑nsn. hatni rad‑šbɛn gnn, d‑ur‑ra‑yili ma‑tn‑issiwidn.»

¹⁴ asi amarg n‑lfrḥ a‑tamdint n‑ṣiyun, tallt awal‑nk a‑israyil, tfrḥm tfjjijm ay‑ayt‑urušalim zġ‑ttmi n‑uwl‑nun.

¹⁵ ašku sidi rbbi ikks‑awn lɛqubit lli‑fllawn‑illan, issaggug‑n fllawn inuwwašn‑nun. yili sidi rbbi ġ‑wammas‑nun, ig nttan agllid n‑ayt‑israyil, d‑ur‑sul‑ra‑tiksaḍm kra yʷh̬šnn.

¹⁶ ġassan ra‑ityawnna i‑urušalim: «a‑ur‑tiksaḍm ay‑ayt‑ṣiyun, wala alwan ifassn‑nun.

¹⁷ rbbi siditun illa ġ‑wammas‑nun, ig amdwas itjhhdn a‑kʷn‑ijjnjm. ra‑srun‑issmrḥba s‑lfrḥ, isshnnu‑kʷn s‑tayri‑ns, yall awal‑ns ar‑fllawn‑ittirir.

¹⁸ [yini sidi rbbi:] «rad‑ssmunġ ġwilli iẓuẓḍn tamunt n‑lɛid, a‑ur‑sul‑tasim taẓẓayt n‑lɛar.

¹⁹ ẓrayt, tizi‑an rad‑ssknukiġ kullu willi fllawn itɛddan, jjnjmġ tanna giwn issbiḍirn, ssmunġ‑d ula tilli imzrn, ssnflġ lɛar‑nun s‑ššukr, a‑kʷn‑ttuqqarn ġ‑kullu ddunit.

²⁰ tizi‑an ra‑kʷn‑d‑awiġ, ssmunġ‑kʷn‑d s‑darun, rarġ‑awn‑d timih̬ar n‑tmazirt‑nun. kullu ayt‑tmizar n‑ddunit ra‑kʷn‑alġn uqqrn ism‑nun, tẓrm‑t kunni s‑walln‑nun. rbbi siditun a‑t‑innan.»