ṣafanyah 1 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

rad‑sfiḍġ kullu ma‑illan ġ‑ddunit

¹ awal n‑sidi rbbi lli‑d‑yuškan i‑ṣafanyah yus n‑kuši lli‑igan yus n‑gadalyah yus n‑amaryah yus n‑ḥizqiyah ġ‑uwssan n‑yušiyah yus n‑amun agllid n‑yahuda.

² «rad‑sfiḍġ kullu ma‑illan zġ‑iggi n‑wakal. inna‑t rbbi da‑bdda‑illan.

³ rad‑zġ‑gis‑sfiḍġ bnadm ula lbhaym, sfiḍġ igḍaḍ n‑ignwan ula islman n‑imdwan. rad‑zġ‑gis‑sfiḍġ kullu ma‑issṭarn ula kullu ma‑issyʷh̬šann, kkisġ bnadm kullut zġ‑iggi n‑wakal. rbbi da‑bdda‑illan a‑t‑innan.

⁴ «ra‑n‑gġ afus‑inu s‑tmazirt n‑yahuda ula kullu imzdġn n‑urušalim, ssittiġ ma‑iqaman i‑‹baɛl› ġ‑wakal‑an, sfiḍġ zġ‑gis ismawn n‑inmġurn n‑laṣnam,

⁵ ula win imsakmurn lli‑n‑iknnun f‑iggi n‑tgʷmma i‑kullu itran n‑ignwan. hatni wah̬h̬a da‑knnun ġ‑umnid‑inu ar‑tgallan s‑ism‑inu, ar‑tgallan ula s‑walli‑mi‑ttinin ‹mulak›.

⁶ wrrin zġ‑uġaras n‑rbbi siditsn, ur‑sul‑a‑sri‑siggiln ula da‑gigi‑sqsan.»

⁷ fssayt ġ‑umnid n‑rbbi siditnġ. ašku yakmur‑d‑wass n‑walli bdda illan. hati ijjujad sidi rbbi yat‑tġrṣi, iẓli willi mi‑d‑iġra s‑dars.

⁸ ass n‑tġrṣi n‑sidi rbbi, hati inna fllas: «ġassan rad‑utġ lɛqubit f‑inmġurn n‑tmazirt ula tarwa n‑ugllid, ula willi ibrzn s‑tmlsa n‑iġribn.

⁹ ra‑gis‑utġ lɛqubit f‑kullu willi issurufn lɛtubat, ar‑tɛmmarn tigmmi n‑siditsn s‑lbaḍl ula lġʷšš.»

¹⁰ yini sidi rbbi: «ġassan rad‑ssġuyyun ayt‑urušalim ġ‑dar imi n‑islman, ar‑kkatn s‑tġuya ġ‑tsga n‑tmdint n‑ljdid, sfldn i‑uqqryan itjhhdn, ikka‑d iggi n‑iwrar.

¹¹ allayt awal‑nun ay‑ayt‑ssuq ar‑tallam, ašku rad‑fllawn‑bbiġ isbbabn‑nun, kksġ zġ‑darun kullu iṣrarfin n‑nnʷqrt.

¹² tizi‑an rad‑ššnubbšġ urušalim s‑isufa, utġ lɛqubit f‑willi iṭrrḥn ġ‑ddnub‑nsn, ar‑ttinin: ‹urd rbbi a‑ra‑iskr kra ifulkin ula kra yʷh̬šnn.›

¹³ ra‑ityakar‑wayda‑nsn, h̬lunt‑ula‑tgʷmma‑nsn. wah̬h̬a bnan tigʷmma‑yan, ur‑ra‑gisnt‑zdġn, wah̬h̬a ẓẓan aḍil, ur‑rad‑sun aman‑ns.

¹⁴ «yakmur‑d‑wass ihiyyan n‑rbbi da‑illan, yakmur‑d ġilad, hati ar‑d‑itazzal. sfldat i‑ijjij n‑tguḍi ġ‑wass n‑sidi rbbi, ar‑gis‑ssġuyyun imdwas ḥaršnin.

¹⁵ ass‑an ra‑ig win lɛqubit, tili gis taġuft ula takrrayt. ig ass n‑tḍuri ula tirẓa, tili gis tawda ula tiksaḍ. ig ass n‑imdla ula tillas ḍlanin,

¹⁶ ig ass n‑nnffar ula taġuyit n‑imiġ, ar‑n‑takʷin f‑igudar ar‑kkatn ġ‑lbruj.

¹⁷ rad‑sshršġ mddn ard tlulliyn zund ibukaḍn, ašku ar‑tyʷh̬šann d‑rbbi da‑bdda‑illan. rad‑ffin idammn‑nsn zund amlal, ḍrn ilawan‑nsn zund amazir.

¹⁸ ur‑ra‑tn‑ijjnjm la urġ ula nnʷqrt, ġ‑wass n‑lɛqubit n‑rbbi da‑illan. ra‑ifnu akal s‑tayri‑ns ijddrn, ḥina ra‑tmmun kullu imzdġn n‑ddunit.»