raɛut 4 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

buɛaz itahl raɛut

¹ yawn buɛaz s‑dar imi n‑tmdint iskiws, s‑hay‑antal yaḍni izri, ig walli‑f‑isawl buɛaz. yini‑as buɛaz: «ašk‑id a‑gʷma, gawr ġid.» yašk‑id s‑tama‑ns iskiws.

² iġr‑d buɛaz i‑mraw irgazn zġ‑imġarn n‑tmdint yini‑asn: «gawrat ġid.» skiwsn didsn.

³ yini ilmma i‑walli igan antal: «han nuɛmi lli‑d‑iwrrin zġ‑tmazirt n‑muwab tra a‑tzznz akal n‑gu‑darnġ alimalik.

⁴ swangmġ is‑flla‑illa ad‑ak‑t‑iniġ, f‑a‑ti‑tsġt ġ‑umnid n‑ġwid igawrn ġi d‑umnid n‑imġarn n‑tmdint. iġ‑trit ġilad a‑ti‑tfrut, fru‑t. iġ‑ur‑trit a‑ti‑tfrut, tinit‑t ad‑issanġ. ašku kiyi ad‑dar lḥqq amzwaru a‑ti‑tfrut. nkki walaġ‑k‑in ġ‑mayan.» irar‑as‑d: «ra‑t‑fruġ.»

⁵ yini buɛaz ġakudan: «ass nna‑tsġit akal‑an zġ‑ufus n‑nuɛmi, tawit dids ula raɛut ullt‑muwab lli‑mi‑immut‑urgaz, tskrt dids amud ma‑itwrratn ism n‑walli immutn.»

⁶ irar‑as‑d ġwalli igan antal: «lliġ iga ġmkan, ur‑ẓḍarġ ad‑fruġ akal‑an, a‑ur‑imil jluġ lwrt‑inu. zayd tfrut‑t kiyi, ašku ur‑as‑ẓḍarġ.»

⁷ ġ‑uwssan‑an kkan‑ttin mddn n‑ayt‑israyil ar‑skarn ġmkad. iġ‑ran ad‑zzgan awal f‑kra sġan nġd kra fran, ra‑ikks yan gisn turẓiyt‑ns ifk‑tt i‑wayyaḍ.

⁸ lliġ inna ġwalli igan antal i‑buɛaz: «zayd tsġt‑t kiyi», hati ikkis turẓiyt‑ns.

⁹ yini buɛaz i‑imġarn d‑mddn kullutn: «kunni tgam inagan ġassad nis‑sġiġ kullu ma‑igan win alimalik d‑kullu ma‑igan win kilyun d‑maḥlun zġ‑dar nuɛmi.

¹⁰ awiġ dids ula raɛut ullt‑muwab lli‑mi‑immut maḥlun, a‑tg tamġart‑inu, f‑ad‑dids‑skrġ amud ma‑itwrratn ism n‑walli immutn, a‑ur‑yitti ism n‑walli immutn zġ‑gr aytmas ula zġ‑gr tamunt n‑tmazirt‑ns. d‑ha kunni tgam inagan ġassad.»

¹¹ inin‑as kullu willi igawrn ġ‑dar imi n‑tmdint ntni d‑imġarn: «nga nkkʷni inagan. a‑ig sidi rbbi tamġart lli‑ra‑ikšm s‑tgmmi‑nk d‑zund raḥil d‑layah lli‑iskrn snatitsnt tasut i‑israyil. a‑tgt kiyi wad idusn ġ‑tmazirt n‑afrata, tgt wad ityawssann ġ‑tmdint n‑bitlaḥm,

¹² ig‑wamud lli‑rad‑ak‑ifk sidi rbbi zġ‑tmġart‑an zund win fariṣ lli‑turu tamar i‑yahuda.»

tfrḥ nuɛmi d‑tadjarin‑ns

¹³ yawi buɛaz raɛut, tg tamġart‑ns. ikšm fllas, ifk‑as sidi rbbi a‑trbbu, taru yan‑warraw.

¹⁴ inint‑tmġarin ġakudan i‑nuɛmi: «ad‑kullu‑nttalġ sidi rbbi lli‑ur‑km‑ifiln bla antal. a‑t‑ig rbbi d‑walli‑mi‑ityawssan ism‑ns ġ‑gr ayt‑israyil.

¹⁵ ra‑ig ntta walli ra‑issddr rruḥ‑nm, yasi tawssrt‑nm, ašku turu‑am‑t‑tslit‑nm lli‑dar‑tɛzzat, d‑nttat tuf‑am ssa n‑tarwa.»

¹⁶ tasi nuɛmi arraw‑an tssgn‑t f‑ifaddn‑ns, twrri nttat tg talli‑t‑itrbbun.

¹⁷ gnt tadjarin‑ns ism ‹ɛubid› i‑warraw‑an, ar‑ttinint: «ilul‑d‑warraw i‑nuɛmi». ra‑iwrri ig ntta babas n‑yassa lli‑igan babas n‑dawd.

¹⁸ ġmkad ad‑gant tasutin n‑fariṣ. fariṣ yuru ḥaṣrun.

¹⁹ ḥaṣrun yuru aram. aram yuru ɛamminadab.

²⁰ ɛamminadab yuru naḥšun. naḥšun yuru salmun.

²¹ salmun yuru buɛaz. buɛaz yuru ɛubid.

²² ɛubid yuru yassa. yassa yuru dawd.