raɛut 3 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

raɛut tdda s‑unrar

¹ tini‑as‑tfqqirt‑ns nuɛmi: «is‑ur‑rad‑am‑sigglġ s‑rraḥt‑nm a‑illi, f‑ad‑am‑tili sslamt?

² han buɛaz lli‑mi‑ttmunut d‑tɛyyalin‑ns, is‑ur‑aġ‑igi kra? hati ġ‑iḍ‑ad ra‑izuzzur ṭumẓin ġ‑unrar.

³ sird ġilad tẓẓġurt ih̬f‑nm, tdlt s‑ufawwu‑nm, thuwwdt s‑dar‑unrar. walaynni han ad‑ur‑yissan‑urgaz‑an is‑tllit ġin ard išš isu.

⁴ tgablt‑t‑in ar tissant maniġ ign, tqlt ar‑t‑in‑yawi‑yiṭs, tftut ilmma tallt f‑tama n‑iwurzan‑ns tgnt. nttan rad‑am‑iml ma‑ra‑tskrt.»

⁵ tini‑as raɛut: «kullu ma‑tnnit ra‑t‑skrġ.»

⁶ thuwwd raɛut s‑unrar, tskr ġmklli‑s‑as‑tnna‑tfqqirt‑ns.

⁷ lliġ išša buɛaz isu ifjjij f‑ih̬f‑ns, iddu ign ġ‑tama n‑taffa n‑ṭmẓin. tašk‑id nttat s‑tntla, tall f‑tama n‑iwurzan‑ns tgn.

⁸ ġ‑tuẓẓunt n‑iyḍ iggʷd‑urgaz zġ‑iyṭs‑ns igrawl, s‑d‑yufa yat‑tmġart tgn ġ‑dar iwurzan‑ns.

⁹ yini‑as: «ma‑tgit kmmi?» tini‑as‑d: «tamqasat‑nk raɛut ad‑giġ. fsr flla inrfl n‑uslham‑nk, ašku tgit‑iyi antal.»

¹⁰ yini‑as: «a‑km‑ibark sidi rbbi a‑illi. afulki‑ad gigi tskrt yugʷr walli izwurn, ašku ur‑tsigglt kra n‑uɛyyal dar ayda ula kra n‑uɛyyal ur‑dar yat.

¹¹ ġilad a‑illi, ad‑ur‑tiksaḍt. rad‑skrġ s‑mayd tḍalbt, ašku hay‑ayt‑tmdint‑inu kullutn ssnn is‑tgit tamġart iṣlaḥn.

¹² iṣḥa is‑giġ yan zġ‑intaln‑nm, walaynni illa yan‑untal yaḍni, iga‑yam kra uggʷar‑inu.

¹³ qama sul ġ‑iḍ‑ad ar zikk ṣbaḥ a‑nẓr. iġ‑ira a‑km‑idl, han ifulki iġ‑km‑idl. iġ‑ur‑iri a‑km‑idl, ha‑yyi nniġ‑am s‑tudrt n‑sidi rbbi ard‑km‑dlġ nkki. gn ġilad ar ṣbaḥ.»

¹⁴ tgn ġ‑tama n‑iwurzan‑ns ar zikk ṣbaḥ, tnkr‑d ur‑ta‑di‑tġli tifawt a‑ur‑tt‑iẓr yan, ašku inna‑yas buɛaz: «a‑ur‑yissan yan is‑di‑tuška kra n‑tmġart s‑unrar.»

¹⁵ izayd yini‑as: «mdi‑d tamlḥaft‑an‑ġ‑tmuttlt, tamẓt ġ‑inrfal‑ns.» tmdi‑as‑tt‑in, iffi‑as‑d gis sḍist lɛbrat n‑ṭmẓin. twrri‑d ġakudan s‑tmdint.

¹⁶ lliġ‑n‑tkšm, tsqsa‑tt‑tfqqirt‑ns: «ma‑ijran a‑illi?» tɛawd‑as f‑kullu ma‑iskr‑urgaz‑an f‑ssibt‑ns,

¹⁷ tini: «ifka‑yyi‑d sḍist lɛbrat n‑ṭmẓin, yini‑yyi: ‹urd s‑ifassn h̬wanin a‑s‑ra‑twrrit dar‑tfqqirt‑nm.› »

¹⁸ tini‑as nuɛmi: «skiws a‑illi ard tissant ma‑s‑ra‑tggru‑tġawsa‑yad, ašku ur‑ra‑isunfu‑urgaz‑an ġassad ard ikmml maylli inna.»