raɛut 2 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

buɛaz gu‑bitlaḥm

¹ illa ġin yan zġ‑ayt‑dars n‑urgaz n‑nuɛmi, ig wad iḥaršn iṭṭaf lh̬ir, ig zġ‑tagʷmat n‑alimalik, ism‑ns buɛaz.

² tini raɛut ullt‑muwab i‑tfqqirt‑ns nuɛmi: «adj‑iyi ad‑dduġ s‑dar‑tmgra, ar‑grruġ taydrt nna‑iḍrn i‑wanna dar ufiġ rrḍa ġ‑iẓri‑ns.» tini‑as: «zayd a‑illi.»

³ tddu s‑illiġ a‑mggrn, ar‑tgrru taydrt lli‑iḍrn i‑išuwwaln. ttaġ‑d tasga n‑igr lli‑tlkm, tga tin buɛaz lli‑igan zġ‑tagʷmat n‑alimalik.

⁴ s‑ha buɛaz yuška‑d tasaɛt‑an zġ‑bitlaḥm. yini i‑išuwwaln: «a‑kʷn‑iɛawn sidi rbbi.» inin‑as‑d: «a‑k‑ibark sidi rbbi.»

⁵ yini ilmma buɛaz i‑uɛyyal lli‑illan f‑išuwwaln: «illis n‑mit a‑tga‑tɛyyalt‑an?»

⁶ yini‑as‑d walli illan f‑išuwwaln: «taɛyyalt‑an tga ullt‑muwab lli‑d‑imunn d‑nuɛmi zġ‑wakal n‑muwab.

⁷ tḍalb zġ‑gigi tini‑yyi: ‹ġir adj‑iyi ad‑grruġ ġ‑gr tadliwin ar‑ssmunuġ ma‑iḍrn i‑išuwwaln.› ġmkan a‑s‑di‑tuška, tzayd zġ‑zikk sul s‑ġilad, abla yan imikk a‑tsunfa ġ‑umalu.»

⁸ isawl‑d buɛaz ġakudan i‑raɛut yini‑as: «sfld a‑illi. a‑ur‑tddut a‑tgrrut ġ‑kra n‑igr yaḍni. qama ġ‑gr‑tɛyyalin‑inu. a‑ur‑tddut s‑mani yaḍni.

⁹ awi‑tt ġir ġ‑igr‑ad, tḍfurt willi‑t‑imggrn. han uṣṣaġ iɛyyaln a‑ur‑am‑ggrn. iġ‑km‑yaġ irifi, tddut tsut ġ‑irukutn lli‑d‑ugʷmn iɛyyaln.»

¹⁰ tssknu‑d ih̬f‑ns ar akal tini‑as: «mah̬ aylliġ ufiġ rrḍa ġ‑iẓri‑nk, tssḥssat sri d‑nkki tabrraniyt ad‑giġ?»

¹¹ isawl‑d buɛaz yini‑as: «sfldġ f‑kullu ma‑tskrt i‑tfqqirt‑nm zġ‑lliġ‑am‑immut‑urgaz. sawln‑iyi mamnk a‑n‑tflt babam d‑innam d‑tmazirt lli‑ġ‑tlult, taškit‑d s‑dar mddn lli‑ur‑tssint.

¹² ad‑am‑ih̬llṣ sidi rbbi f‑maylli tskrt, issafu‑am‑t rbbi da‑illan, ig rbbi n‑ayt‑israyil lli‑s‑di‑tuškit a‑tntlt ġ‑ddu‑tfrawin‑ns.»

¹³ tini‑as ġakudan: «amar yufan ad‑sul‑afġ rrḍa ġ‑iẓri‑nk a‑sidi, ašku tsshnnat‑iyi ġilad ġ‑tsawlt s‑tmqasat‑nk, wah̬h̬a ur‑giġ zġ‑tmqasatin‑nk.»

¹⁴ lliġ tlkm tasaɛt n‑imkli, yini‑as buɛaz: «ašk‑id tiššt imikk n‑uġrum, ar‑tssaykt tuffaẓin‑nm aman n‑waḍil.» tgawr ġ‑tama n‑išuwwaln, imdi‑as‑n buɛaz kra n‑tzlfin. tšš aylliġ tšbɛ, iqama‑yas‑d sul.

¹⁵ lliġ tdda a‑tgrru, yuṣṣa buɛaz iɛyyaln‑ns yini‑asn: «adjat‑stt a‑tgrru ḥtta ġ‑gr tadliwin, a‑ur‑tti‑tssḥššmm.

¹⁶ ldyat‑as‑d ula kra n‑tiydrin zġ‑tadliwin, tadjm‑tt a‑tgrru. a‑ur‑tti‑tẓim.»

¹⁷ ar‑tgrru raɛut ġ‑igr‑an ar takʷya n‑tafukt. ar‑tssusus ilmma maylli tgʷra, ig ma‑itggan lɛbrt n‑ṭmẓin.

¹⁸ tasi‑tnt twrri‑d s‑tmdint. tml i‑tfqqirt‑ns maylli‑di‑tssmun, tldi‑d ula maylli‑as‑iqaman lliġ tšbɛ, tfk‑as‑t.

¹⁹ tsqsa‑tt‑tfqqirt‑ns: «manizġ‑di‑tgʷrit ġassad? maniġ‑n‑th̬dmt? a‑ig ambarki walli srm issḥssan.» tsawl nttat i‑tfqqirt‑ns f‑walli dar th̬dm tini: «argaz lli‑dar‑h̬dmġ ġassad, iga ism‑ns buɛaz.»

²⁰ tini nuɛmi i‑tslit‑ns: «ad‑as‑tili lbaraka n‑sidi rbbi lli‑ur‑iwrrin f‑tayri‑ns izgan f‑willi iddrn ula f‑willi immutn.» tzayd nuɛmi tini‑as: «argaz‑an iga‑yaġ kra. ig yan zġ‑willi iẓḍarn ad‑aġ‑ssntln.»

²¹ tini‑as raɛut ullt‑muwab: «yuṣṣa‑yyi: ‹ad‑ur‑tflt iɛyyaln‑inu ard kmmln kullu tamgra‑nu.› »

²² tini nuɛmi i‑tslit‑ns raɛut: «ifulki a‑illi a‑tmunt d‑tɛyyalin‑ns, a‑ur‑imil ijru‑am kra ġ‑kra n‑igr yaḍni.»

²³ ġmkan a‑s‑tqama nttat ġ‑gr‑tɛyyalin n‑buɛaz ar‑tgrru, aylliġ tkmml‑tmgra n‑ṭmẓin wala tin irdn. tzdġ ġ‑dar‑tfqqirt‑ns.