naḥum 1 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

awal n‑rbbi f‑tmdint n‑ninwah

¹ awal n‑rbbi f‑tmdint n‑ninwah, iẓra‑t naḥum gʷ‑ulquš yara‑t.

² sidi rbbi iga wad išqan f‑ma‑igan wins, ar‑itamẓ lḥqq ġ‑inuwwašn‑ns. ar‑gisn‑itamẓ lḥqq s‑trġi išqan.

³ walli bdda illan ur‑a‑izrab a‑iġḍb, walaynni iga wad iquwwan, d‑ur‑ra‑yadj ayt‑lh̬ʷšant bla lɛqubit. han da‑d‑ittaški ġ‑ijawan ula timziwit, gn imdla n‑ignwan zund agdrur ġ‑ddu iḍarn‑ns.

⁴ yamr amda imqqurn izwu‑t, issiqar ula kullu isaffn. sllawnt‑tmizar n‑bašan d‑karmal, ḍrn ijddign n‑lubnan.

⁵ ar‑tndudiyn idrarn ġ‑ufus‑ns, ar‑fssin kullu iwrar. ar‑ttmussu ddunit ġ‑umnid‑ns, ar‑trgigiyn kullu imzdġn‑ns.

⁶ ma‑iẓḍarn a‑ibidd ġ‑tasaɛt n‑lġaḍab‑ns? ma‑iẓḍarn a‑yasi tirġi n‑h̬ziyt‑ns? ar‑di‑tffin iriyn‑ns zund lɛafiyt, d‑nttan a‑irẓẓan ijarifn.

⁷ sidi rbbi ifulki bahra, ig lbrj ġ‑wass n‑taġuft, yissan willi zugnin s‑dars.

⁸ imma willi‑t‑itḍaḍḍan, anggay itjhhdn a‑s‑ra‑tn‑ifnu, iṭṭay inuwwašn‑ns s‑tillas.

⁹ mayd tnuwwam f‑sidi rbbi? ra‑t‑isstmmu laḥ‑tt. ur‑sul‑ra‑d‑inkr‑uduyy‑nsn tis snat‑twal.

¹⁰ rad‑mlilliyn s‑tissi‑nsn iktin, tyamaẓn ntni ġ‑gr isnnann, tšš‑tn lɛafiyt zund ilibi iqqurn.