naḥamyah 9 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

tbidd tamunt ġ‑umnid n‑rbbi

¹ munn‑d daġ ayt‑israyil ġ‑wass wis sin id‑mraw d‑kkuẓ (24) n‑wayyur‑an. hatni aẓumn lsn lh̬iš, ar‑zuzzurn agdrur f‑ih̬fawn‑nsn.

² ġakudan ad‑bḍan ayt‑israyil ih̬f‑nsn zġ‑kullu mddn n‑iqbiln yaḍni. biddn ar‑tqrrun s‑tjli‑nsn, qrrun ula s‑iskkirn ʷh̬šnnin n‑id‑babatsn.

³ biddn kullu ġin ma‑itggan kraṭṭ tasaɛin, ar‑aqran ġ‑warra n‑ulmmud n‑rbbi siditsn. zaydn kraṭṭ tasaɛin yaḍni ar‑tqrrun i‑rbbi siditsn ar‑ti‑ttalġn.

⁴ biddn ayt‑lawi ġ‑iskʷfal, ismawn‑nsn yahušaɛ d‑bani d‑qadmiyal d‑šabanyah d‑bunni d‑šarabyah d‑bani d‑kanani, alln awal‑nsn ar‑aqran i‑rbbi siditsn.

⁵ sawln‑d ilmma ayt‑lawi yahušaɛ d‑qadmiyal d‑bani d‑ḥašabniyah d‑šarabyah d‑hudiyah d‑šabanyah d‑bataḥyah, inin: «nkrat a‑ttalġm rbbi da‑illan ig rbbi‑nun kullu ma‑izrin ula kullu mayd iftan.» inin ilmma: «ambarki a‑iga lmajd n‑ism‑nk, yattuy f‑kullu lḥmd n‑bnadm, yagʷr kullu ma‑s‑a‑t‑nttalġ.

lɛjayb n‑rbbi ula tijli n‑mddn‑ns

⁶ kiyi waḥduk a‑igan rbbi da‑bdda‑illan. kiyi a‑iskrn ignwan d‑ignna f‑uflla n‑ignwan, ula kullu ikabarn‑nsn. tskrt akal ula kullu ma‑gis‑illan, tskrt imdwan ula kullu ma‑gisn‑issudun. kiyi ad‑asn‑yakkan kullu tudrt. ar‑ak‑tsjadn ula ikabarn n‑ignwan.

⁷ kiyi a‑igan rbbi da‑bdda‑illan. tgt rbbi lli‑istin abram, tssufġt‑t‑id zġ‑tmdint n‑ur zġ‑tmazirt n‑ayt‑kaldan, tgt‑as ism ibrahim.

⁸ tufit‑t‑in yumn gik s‑nniyt n‑uwl‑ns, tskrt dids lɛhd baš a‑tfkt i‑wamud‑ns akal n‑ayt‑kanɛan d‑ayt‑ḥit d‑ayt‑amur d‑ayt‑fariz d‑ayt‑yabus d‑ayt‑girgaš. tssafut awal‑nk, ašku ar‑bdda‑tskart s‑lḥqq.

⁹ «tẓrt ilmma tadallit n‑id‑babatnġ ġ‑wakal n‑miṣr, tsfldt ula i‑tġuyit‑nsn ġ‑dar‑umda azggʷaġ.

¹⁰ s‑tmitar d‑lɛjayb a‑s‑tutt firɛawn d‑ih̬ddamn‑ns ula kullu ayt‑tmazirt‑ns, ašku tssnt mnšk ad‑fllasn‑ssfurrugn, d‑ġmkan a‑s‑iwrri ityawssan ism‑nk bahra sul s‑ġassad.

¹¹ tbḍut amda ġ‑lgddam‑nsn, zrin f‑taġart ġ‑wammas n‑waman. tluḥt‑n willi gisn iẓẓan ġ‑tdrut n‑waman, ggʷzn zund iẓran ġ‑uduyy n‑umda.

¹² tzwurt‑asn s‑tannalt n‑umdlu ġ‑uzal, d‑tannalt n‑lɛafiyt ġ‑iyḍ, ad‑asn‑tsufut aġaras lli‑tn‑d‑iqqann.

¹³ tʷggzt‑d darsn f‑udrar n‑sinay, tsawlt‑d srsn zġ‑ignna, tfkt‑asn lḥkamat nmnin d‑ilmmudn ṣḥanin d‑tnbaḍin d‑luṣiyat ṣlaḥnin.

¹⁴ tmlt‑asn ass lli‑tẓlit i‑usunfu. tzaydt tamrt‑tn f‑ufus n‑uh̬ddam‑nk musa s‑luṣiyat d‑tnbaḍin d‑ilmmudn.

¹⁵ lliġ‑tn‑yaġ laẓ, tfkt‑asn‑d aġrum zġ‑ignna. lliġ‑tn‑yaġ irifi, tssufġt‑d aman zġ‑ujarif. tinit‑asn ilmma ad‑d‑kšmn ṭṭafn akal lli‑f‑tggullit ad‑asn‑ti‑tfkt.

¹⁶ «walaynni ar‑ssfurrugn id‑babatnġ, ssiqarn ih̬f‑nsn. ur‑a‑skarn s‑luṣiyat‑nk,

¹⁷ agʷin a‑srk‑sflidn. ur‑a‑swingimn ġ‑lɛjayb lli‑tskrt ġ‑wammas‑nsn. ssiqarn ul‑nsn, irin ad‑ẓlin yan ma‑ysn‑izggurun ad‑wrrin s‑tsmugit ġ‑miṣr. walaynni kiyi tgit rbbi da‑itṣamaḥn, tgt wad itḥnnun ar‑ttrḥamt. ur‑a‑tzrabt a‑tġḍbt, tigat dark tayri izgan. ur‑tn‑akkʷ‑tfilt.

¹⁸ zaydn ntni skrn igiz zġ‑ma‑ifsin, inin i‑ngratsn: ‹ġwad a‑igan rbbi‑nun lli‑kʷn‑d‑issiwnn zġ‑wakal n‑miṣr.› hatni ḥgrn‑k bahra.

¹⁹ imma kiyi tgit wad bahra itrḥamn. ur‑tn‑tfilt ġ‑lh̬la, wala laḥ‑asn tannalt n‑umdlu lli‑asn‑izggurun ġ‑uzal, wala laḥ‑asn tannalt n‑lɛafiyt lli‑asn‑itisfiwn aġaras lli‑tn‑d‑iqqann d‑iyḍ.

²⁰ taznt‑d rruḥ‑nk ifulkin a‑tn‑isslmad. ur‑asn‑tkkist aġrum n‑‹man› i‑imi‑nsn, tfkt‑asn ula aman ġ‑tizi n‑irifi.

²¹ kkuẓ id‑mraw (40) n‑usggʷas a‑tn‑tusit ġ‑lh̬la, ur‑jji‑tn‑ih̬ṣṣa yat. ur‑balant‑tmlsa‑nsn ula bzgn iḍarn‑nsn.

²² «tfkt‑asn ilmma tiglday d‑iqbiln, tbḍut‑asn‑in iwtta ġ‑tuggugt. wrrin ṭṭafn akal n‑siḥun agllid n‑ḥašbun, d‑win ɛug agllid n‑bašan.

²³ tssigtt tarwa‑nsn zund itran n‑ignwan, tšškšmt‑tn‑d s‑wakal lli‑s‑tnnit i‑id‑babatsn ra‑srs‑kšmn ṭṭafn‑t.

²⁴ ġmkan ad‑kšmn tarwa‑nsn s‑wakal ṭṭafn‑t, ašku tssknukit imzdġn n‑wakal ġ‑lgddam‑nsn, tsrst‑n ayt‑kanɛan ġ‑ufus‑nsn, ntni d‑igldan‑nsn d‑iqbiln lli‑illan ġ‑wakal, f‑a‑gisn‑skrn mknna ran.

²⁵ amẓn timdinin dusnin d‑igran jjinin, ṭṭafn tigʷmma ɛmmrnt s‑lh̬ir, afn‑in tinuḍfiwin tyawġzant, d‑uwrtan n‑waḍil d‑win zzit d‑iṣġarn n‑lġllat ggutnin. ar‑šttan šbɛn, wrrin ṣḥun ar‑tfjjijn s‑tugtt n‑tmih̬ar lli‑asn‑tfkit.

²⁶ «walaynni hatni nkrn, ẓin dik ɛṣun‑k. luḥn‑in almmud‑nk s‑tġurdin n‑tadawt‑nsn. nġn ula lanbiya‑nk lli‑tn‑itẓin f‑a‑tn‑d‑rarn s‑dark. zaydn ḥgrn‑k bahra.

²⁷ tgt‑tn‑in ġakudan ġ‑ufus n‑inuwwašn‑nsn, ar‑tn‑bahra‑ssrfufunn. ġ‑tizi n‑trfufnt ar‑n‑srk‑aqran, tsfldt‑asn‑d zġ‑ignna. tskrt s‑rrḥmt‑nk da‑iggutn, tfkt‑asn‑d injjamn ma‑tn‑itfukkun zġ‑ufus n‑inuwwašn‑nsn.

²⁸ «walaynni ġakud nna‑thnnan, wrrin daġ ar‑skarn ma‑yʷh̬šnn ġ‑iẓri‑nk. tgt‑tn‑in daġ ġ‑ufus n‑inuwwašn‑nsn, ar‑tn‑taḍḍrn. imma ntni grawln‑in daġ s‑dark ar‑srk‑aqran, tsfldt‑asn ġ‑ignna. mnnawt‑twal a‑tn‑ttfukkit s‑rrḥmt‑nk da‑iggutn.

²⁹ ar‑tn‑ttẓit baš a‑tn‑di‑trart s‑uġaras‑nk. imma ntni ar‑sul‑ssfurrugn, ur‑a‑sflidn s‑luṣiyat‑nk, ula da‑skarn s‑lḥkamat‑nk lli‑s‑a‑itddr wanna srsnt iskarn. rarn‑in srk taġruṭṭ lli‑izaġn, ssiqarn fllak ih̬fawn‑nsn, agʷin a‑srk‑sflidn.

³⁰ tugtt n‑isggʷasn a‑ysn‑ttṣbart, ar‑tn‑ttẓit s‑rruḥ‑nk f‑ufus n‑lanbiya. imma ntni agʷin a‑srk‑sflidn. tgt‑tn‑in ġakudan ġ‑ufus n‑iqbiln n‑ddunit.

³¹ walaynni tgit wad bahra itrḥamn, ur‑tn‑tfnit ula tflt‑tn. ašku tgit rbbi da‑itḥnnun ar‑itrḥam.

³² «wa rbbi‑nġ, wa rbbi imqqurn itjhhdn issiwidn, wa rbbi da‑izgan bdda ġ‑lɛhd‑nk d‑tayri‑nk iṣḥan, tssnt kullu tikrrayin lli‑fllanġ‑izrin nkkʷni d‑igldan‑nġ d‑iriyasn d‑imsakmurn d‑lanbiya d‑id‑babatnġ ula mddn‑nk kullutn zġ‑uwssan n‑igldan n‑aššur sul s‑ġassad. wa rbbi, a‑ur‑ig kullu ġayan kra imẓẓin ġ‑iẓri‑nk.

³³ ġaylli kullu fllanġ izrin, lḥqq a‑s‑fllanġ‑tḥkamt. ha kiyi tskrt ma‑iṣlaḥn, imma nkkʷni nskr ma‑yʷh̬šnn.

³⁴ ašku ur‑skirn igldan‑nġ d‑iriyasn‑nġ d‑imsakmurn‑nġ d‑id‑babatnġ s‑ulmmud‑nk, ula sfldn s‑luṣiyat‑nk ula tuggʷa‑nk lli‑s‑a‑tn‑ttẓit.

³⁵ ur‑rin a‑k‑qasan, lliġ a‑tfjjijn ġ‑tgldit‑nsn s‑lh̬ir iggutn lli‑asn‑tfkit, ġ‑wakal yusɛan ijjin lli‑asn‑tjjujadt, agʷin ad‑d‑wrrin zġ‑iskkirn‑nsn ʷh̬šnnin.

³⁶ ha‑yaġ ġilad nga ismgan ġ‑wakal‑ad lli‑tfkit i‑id‑babatnġ a‑tfraḥn s‑lġllat‑ns d‑timih̬ar‑ns. ha‑yaġ nga gis ismgan.

³⁷ akal‑ad ar‑itazn timih̬ar‑ns i‑igldan lli‑fllanġ‑tgit f‑ssibt n‑kullu ma‑nskr yʷh̬šn. ar‑tḥkamn f‑ddat‑nġ ula lbhaym‑nġ mknna‑tn‑iɛjbn, nili ġ‑tnukmut išqan.

³⁸ f‑ssibt n‑ġayan, ha‑yaġ ġilad nra a‑nskr lɛhd izgan, nara‑t ġ‑yan‑warra, ršmn‑t iriyasn‑nġ d‑ayt‑lawi d‑imsakmurn‑nġ.»