naḥamyah 8 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

ɛazra ar‑yaqra f‑ayt‑urušalim

¹ munn‑d kullu ġakudan s‑usarag ġ‑umnid n‑imi n‑waman ġ‑urušalim, ḍalbn aktatbi ɛazra ad‑d‑yawi arra n‑ulmmud n‑musa lli‑s‑yuṣṣa sidi rbbi ayt‑israyil.

² ġmkan a‑s‑d‑yiwi‑umsakmur ɛazra arra n‑ulmmud s‑umnid n‑tamunt‑an ġ‑irgazn ula timġarin ula kullu ma‑iẓḍarn a‑ifhm ma‑mi‑isflid. ig lḥal ass amzwaru ġ‑wayyur wis ssa.

³ ibidd ġ‑ih̬f n‑usarag ġ‑umnid n‑imi n‑waman, ar‑fllasn‑yaqra zġ‑zikk ṣbaḥ ar tuẓẓunt n‑wass, ġ‑umnid n‑irgazn d‑tmġarin d‑kullu willi iẓḍarn ad‑fhmn. ar‑kullu‑sflidn mddn s‑ma‑illan ġ‑warra n‑ulmmud, rarn srs lɛaql.

⁴ ibidd‑uktatbi ɛazra f‑wadkkʷan n‑ukššuḍ lli‑ityawskarn i‑tġri‑an. ibidd dids ġ‑tsga‑ns tafasiyt mattityah d‑šamaɛ d‑ɛanayah d‑uriyah d‑ḥilqiyah d‑maɛsiyah, ibidd ula ġ‑uẓlmaḍ‑ns badayah d‑mišayal d‑malkiyah d‑ḥašum d‑ḥašbaddana d‑zakaryah d‑mašullam.

⁵ ar‑gis‑tmnadn mddn kullutn lliġ irẓm arra‑yan, ašku illa ɛazra ġ‑mani fllasn yattuyn. lliġ‑t‑irẓm, nkrn kullu mddn‑an biddn.

⁶ isawl ɛazra ar‑ittalġ sidi rbbi da‑yugʷrn kullu kra illan, inin ilmma mddn kullutn: «amin, amin», alln ifassn‑nsn s‑ignwan. adrn ilmma i‑ih̬f‑nsn, ssknun udmawn‑nsn s‑wakal šjdn i‑sidi rbbi.

⁷ sul biddn kullu ġin, ar‑tn‑tɛawann ayt‑lawi ad‑fhmn almmud. gn ismawn n‑ayt‑lawi‑an yahušaɛ d‑bani d‑šarabyah d‑yamin d‑ɛaqqub d‑šabbtay d‑hudiyah d‑maɛsiyah d‑qaliṭa d‑ɛzaryah d‑yuzabad d‑ḥanan d‑balayah.

⁸ ar‑fllasn‑aqran imikk s‑imikk ġ‑warra‑yan n‑ulmmud n‑rbbi, ar‑tfasarn lmɛna‑ns baš ad‑kullu‑fhmn tiġri.

⁹ lliġ sfldn mddn i‑iwaliwn n‑ulmmud, ar‑kullu‑allan. isawl srsn naḥamyah lli‑igan lḥakm, nttan d‑ɛazra lli‑igan amsakmur d‑uktatbi, ula ayt‑lawi lli‑tn‑isslmadn, inin i‑tamunt n‑mddn‑an: «ġassad iga ass iẓlin s‑rbbi siditun. ad‑ur‑gis‑tallam ula da‑ttnddrm.»

¹⁰ yini‑asn ilmma: «zaydat s‑sslamt, tššm ma‑iḍnin, tsum ma‑imimn, taznm tiġamatin i‑willi ur‑dar yat, ašku ġassad iẓli s‑siditnġ. ad‑awn‑ur‑ṭiyr, ašku lfrḥ n‑sidi rbbi a‑igan adwas‑nun.»

¹¹ zaydn ayt‑lawi ar‑tn‑kullu‑sshnnun inin‑asn: «fssayt, ašku ġassad iga ass amẓlay. ad‑awn‑ur‑ṭiyr.»

¹² ddun mddn‑an kullutn s‑sslamt ad‑šttan ar‑ssan aznn tiġamatin. ar‑kullu‑tfraḥn i‑ngratsn, ašku fhmn iwaliwn lli‑mi‑sfldn.

lɛid n‑iḥšaš

¹³ ndid azkka munn‑d kullu ih̬fawn n‑tagʷmatin n‑ayt‑yahuda, ntni d‑imsakmurn d‑ayt‑lawi, s‑dar‑uktatbi ɛazra, skrn f‑ad‑kullu‑siggiln ġ‑warra n‑ulmmud.

¹⁴ afn‑in ġ‑ulmmud lli‑f‑tn‑yuṣṣa sidi rbbi f‑ufus n‑musa is‑ih̬ṣṣa ayt‑israyil ad‑zdġn ġ‑iḥšaš ġ‑uwssan n‑lɛid n‑wayyur wis ssa.

¹⁵ ih̬ṣṣa‑tn daġ a‑srs‑tɛlamn ar‑tbrraḥn ġ‑kullu timdinin‑nsn ula ġ‑urušalim ar‑ttinin: «ffuġat s‑iwrar tawim‑d tiṣṭṭwin n‑zzit d‑tayda d‑rriḥan ula talḍayin n‑tayniwin ula tin iṣġarn yaḍni s‑tfrawin‑nsn, tskrm srsnt iḥšaš ġmklli ityaran ġ‑ulmmud.»

¹⁶ ffuġn mddn ġakudan awin‑d tiṣṭṭwin, skrn iḥšaš i‑ih̬f‑nsn, kraygatt yan ġ‑iggi n‑tgmmi‑ns nġd ġ‑usarag n‑tgmmi‑ns, skrn‑tn ula ġ‑usarag n‑tgmmi n‑rbbi d‑usays ġ‑dar imi n‑waman ula ġ‑dar imi n‑afraym.

¹⁷ kullu tamunt n‑willi‑d‑yuškan zġ‑uskrf [n‑babil] skrn iḥšaš zdġn gisn. ar‑kullu‑tfraḥn bahra, ašku ur‑jji‑skirn ayt‑israyil ġmkan zġ‑uwssan n‑yahušuɛ yus n‑nuwn ar ġassan.

¹⁸ ass f‑wass, zġ‑wass izwurn ar wad iggʷran, ar‑fllasn‑yaqra ɛazra ġ‑warra n‑ulmmud. ssa n‑uwssan ad‑skrn lɛid. wis tam‑uwssan skrn tamunt ihiyyan ġmklli illan ġ‑tnbaṭṭ n‑rbbi.