naḥamyah 6 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

tirggam n‑inuwwašn

¹ isfld sanballaṭ d‑ṭubiyah d‑gašam lli‑igan aɛrab, d‑wiyyaḍ ġ‑inuwwašn‑nġ, is‑kmmlġ agadir. ur‑sul‑iqama mani gis ih̬ʷlan, wah̬h̬a ur‑ta‑giġ iflwan i‑imawn tizi‑an.

² yazn‑d sri sanballaṭ d‑gašam inin‑iyi: «ašk‑id a‑nmnaggar ġ‑kra n‑mani ġ‑uzaġar n‑unu.» walaynni nuwwan ad‑iyi‑skrn kra yʷh̬šnn.

³ aznġ‑asn irqqasn iniġ: «tawuri ihiyyan ayd qasaġ. ur‑ẓḍarġ a‑n‑ggʷzġ. mah̬ aylliġ rad‑flġ tawuri a‑tbidd, ggʷzġ‑n s‑darun?»

⁴ aznn‑d sri kkuẓṭ‑twal, ar‑asn‑traraġ ġmkan.

⁵ tis smmust‑twal yazn‑d daġ sri sanballaṭ ah̬ddam‑ns, yasi‑d yat‑tbrat irẓmn ġ‑ufus‑ns,

⁶ ityara gis: «han lkmn lah̬bar‑nk i‑ayt‑tmizar, ula gašam ar‑tt‑fllak‑ittini, han tqṣadt kiyi d‑uwdayn a‑tɛṣum agllid. ġayan a‑f‑a‑tbnnum agadir. ar‑fllak‑ttinin is‑trit a‑tgt ih̬f‑nk d‑ugllid‑nsn,

⁷ tskrt kra n‑lanbiya a‑srk‑tbrraḥn ġ‑urušalim ar‑ttinin: ‹hay‑agllid illa ġ‑wakal n‑yahuda.› s‑ṣṣaḥt iwaliwn‑an, ɛlayn ad‑ruḥn agllid. ih̬ṣṣa‑k a‑di‑taškt s‑darnġ a‑d‑nmšaška i‑ngratnġ.»

⁸ aznġ‑as ġakudan iniġ: «ġaylli‑s‑tnnit, han ur‑akkʷ‑illi ġayan. tskrt‑t ġir zġ‑ih̬f‑nk.»

⁹ ašku nnan ntni, iġ‑aġ‑ssiwdn rad‑alwan ifassn‑nġ ġ‑twuri a‑ur‑sar‑tkmml. wa rbbi, zayd ġilad tssdust ifassn‑inu.

¹⁰ kšmġ s‑dar šmaɛyah yus n‑dalayah yus n‑mahiṭabil lli‑iḥuddan ġ‑tgmmi‑ns. yini‑yyi: «rwaḥ a‑nmun s‑tgmmi n‑rbbi, s‑ugʷns n‑tḥanut tamẓlayt, nrgl‑d fllanġ tiflwin‑ns. ašku rad‑d‑aškin a‑k‑nġn. hatnin d‑iyḍ a‑rad‑d‑aškin a‑k‑nġn.»

¹¹ rarġ‑as: «izd wan nkki da‑irggʷl? izd wan nkki a‑ra‑ikšm s‑tgmmi tamẓlayt qamaġ ddrġ? uhu, ur‑ra‑srs‑kšmġ.»

¹² fhmġ ġakudan is‑urd rbbi ad‑as‑imlan awal‑an, walaynni ikʷra‑t ṭubiyah d‑sanballaṭ a‑yyi‑t‑yini.

¹³ d‑ġayad a‑f‑t‑kʷran, baš ad‑iksaḍġ skrġ ġaylli iffuġn aġaras, ssh̬srn ism‑inu baš a‑gigi‑ṭṭnaẓn.

¹⁴ wa rbbi‑nu, a‑ur‑tettut i‑ṭubiyah d‑sanballaṭ ġaylli gigi skrn, ula tettut tannabit nuɛadyah d‑lanbiya yaḍni lli‑iran a‑yyi‑ssiwidn.

ikmml‑ugadir n‑urušalim

¹⁵ ġmkan a‑s‑ikmml‑ugadir ġ‑wass wis sin id‑mraw d‑smmus (25) n‑wayyur ‹alul›. tiwi‑tbnnayt‑ns smmus id‑mraw d‑sin (52) n‑wass.

¹⁶ lliġ fllas sfldn kullu inuwwašn‑nġ, hatni ksuḍn kullu iqbiln lli‑aġ‑isutln. wrrin ẓran ih̬f‑nsn is‑ur‑gin yat, ašku ssnn izd rbbi‑nġ a‑yġ‑iɛawnn aylliġ tkmml‑twuri.

¹⁷ walaynni iggut ġ‑ih̬fawn n‑tagʷmatin n‑ayt‑yahuda ma‑itaznn tibratin i‑ṭubiyah ġ‑uwssan‑an, ġmklli‑tn‑d‑lkkmnt‑tbratin zġ‑dars.

¹⁸ ašku iggut ġ‑ayt‑yahuda mad‑dids‑iskrn tagallit, lliġ itahl illis n‑šakanyah yus n‑araḥ, yawi illis n‑mašullam yus n‑barah̬yah i‑yus yahuḥanan.

¹⁹ ar‑di‑ttaškin mddn ar‑iyi‑sawaln f‑ifulkitn lli‑iskr ṭubiyah, ar‑ttidun ar‑as‑addrn ula iwaliwn‑inu. imma ntta izuyd ar‑iyi‑d‑itazn tibratin a‑yyi‑issiwid.