naḥamyah 5 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

naḥamyah iɛawn willi ḍɛfnin

¹ ġ‑uwssan‑an a‑ġ‑tnkr‑tġuyit iggutn, ar‑ssmummuyn irgazn d‑tmġarin‑nsn s‑aytmatsn ayt‑yahuda.

² ašku illa gisn ma‑ittinin: «ha‑yaġ nggut nkkʷni d‑tarwa‑nġ d‑istitnġ. awi‑aġ‑d imndi a‑nšš nddr.»

³ inin wiyyaḍ: «ha‑yaġ nrhn igran‑nġ d‑urtan n‑waḍil d‑tgʷmma‑nġ, a‑srsn‑nsġ imndi f‑ssibt n‑uġʷni‑ad.»

⁴ inin wiyyaḍ: «ha‑yaġ nrḍl‑d iqaridn ma‑s‑a‑nfrru ḍḍabiyt i‑ugllid f‑igran‑nġ d‑urtan‑nġ n‑waḍil.»

⁵ ar‑ttinin: «aytmatn a‑nga, nšrk didsn idammn, tarwa‑nġ gan zund winsn, walaynni iqqan‑aġ‑d ad‑asn‑nzznz tarwa‑nġ d‑istitnġ s‑tsmugit. han kra ġ‑istitnġ ġilad, wrrint gant tismgin. ur‑darnġ ma‑nskar, ašku han igran‑nġ d‑urtan‑nġ n‑waḍil, ġ‑ufus n‑wiyyaḍ a‑ġ‑llan.»

⁶ lliġ sfldġ i‑ma‑ttinin ula mamnk a‑ssġuyyun, ṭiyr‑iyi bahra.

⁷ swangmġ d‑ih̬f‑inu, ẓiġ ġakudan d‑ih̬fawn n‑tagʷmatin d‑ingabaln iniġ‑asn: «han kunni, is‑ur‑a‑itamẓ kraygatt yan giwn ma‑igan win gʷmas?» ssmunġ‑d fllasn yat tamunt imqqurn,

⁸ iniġ‑asn: «ha nkkʷni nga‑n tiqqi‑nġ ar‑d‑nsaġ aytmatnġ n‑ayt‑yahuda lli‑inzan s‑dar ayt‑tmizar yaḍni. imma kunni, han tzuydm ar‑tzznzam aytmatun, baš a‑tn‑d‑daġ‑nsaġ.» fssan ntni, ur‑ssinn ma‑rad‑inin.

⁹ iniġ‑asn: «han yʷh̬šn ġaylli tskarm. is‑ur‑kʷn‑ih̬ṣṣa a‑tfttum s‑tksaḍ n‑rbbi‑nġ, baš a‑ur‑ginġ‑teṭnaẓn ayt‑tmizar yaḍni lli‑igan inuwwašn‑nġ?

¹⁰ ula nkki d‑aytma d‑ih̬ddamn‑inu ar‑nrṭṭl iqaridn d‑imndi i‑mddn, walaynni ih̬ṣṣa‑yaġ kullwaġ a‑ur‑sul‑zġ‑gisn‑nḍalb maylli‑asn‑nḍfur.

¹¹ rarat‑asn igran‑nsn d‑urtan n‑waḍil d‑zzit d‑tgʷmma‑nsn, trarm‑asn ula maylli darsn tumẓm ġ‑iqaridn d‑irdn d‑waman n‑waḍil d‑zzit ma‑yugʷrn arṭṭal‑nsn.»

¹² sawln‑d ġakudan inin: «rad‑asn‑nrar kullu mayan, d‑ur‑ra‑zġ‑gisn‑nḍalb yat. ra‑nskr s‑mklli tnnit» ġrġ ġakudan i‑imsakmurn, ssgallġ mddn ġ‑umnid‑nsn ad‑skrn s‑wawal lli‑s‑nnan.

¹³ ssussġ igiwal n‑tmlsit‑inu iniġ‑asn: «wanna ur‑iskirn s‑wawal‑an, a‑t‑issuss rbbi zġ‑tgmmi‑ns d‑twuri‑ns. a‑yasus ġmkad, a‑ur‑sul‑dars‑yili yat.» tjawb‑d kullu tamunt‑an inin: «amin», ar‑ttalġn sidi rbbi. skrn mddn ġakudan s‑mklli qawln.

¹⁴ zġ‑tizi lli‑ġ‑iyi‑iga‑ugllid d‑lḥakm ġ‑wakal n‑yahuda, sin d‑mraw (12) n‑usggʷas ayan, zġ‑usggʷas wis sin id‑mraw (20) ġ‑tgldit n‑artaḥšašta ar asggʷas wis kraḍ id‑mraw d‑sin (32), ur‑jji‑ššiġ nkki d‑aytma zġ‑umššu lli‑igan lḥqq n‑lḥakm.

¹⁵ kkan‑ttin lḥukkam lli‑yyi‑d‑izwurn ar‑bahra‑ẓẓuẓayn f‑mddn, ar‑zġ‑gisn‑tamẓn kkuẓ id‑mraw (40) n‑uqarid n‑nnʷqrt i‑wass, gan win tirmt d‑tissi. ula ih̬ddamn‑nsn ar‑tɛddan f‑mddn. imma nkki ur‑jji‑skirġ ġmkan, ašku ar‑bahra‑tuqqarġ rbbi.

¹⁶ sslhuġ ih̬f‑inu ġir s‑tbnnayt n‑ugadir. han ih̬ddamn‑inu ar‑n‑kullu‑tmunun f‑twuri‑an. ur‑jjid nkkʷnin a‑isġan kra n‑wakal i‑ih̬f‑nġ.

¹⁷ ar‑dari‑šttan miyya d‑smmus id‑mraw (150) n‑yan, gan ntni ayt‑yahuda d‑ih̬fawn n‑tagʷmatin d‑wiyyaḍ nna‑d‑darnġ‑yuškan zġ‑iqbiln lli‑aġ‑isutln.

¹⁸ kraygatt ass ar‑asn‑skarġ yan‑umugay d‑sḍis ihray ḍninin d‑ifullusn. kraygatt mraw‑uwssan ar‑asn‑di‑tawiġ tayddidin d‑tʷgšlin n‑waman n‑waḍil iktin. d‑nkki ur‑jji‑ḍalbġ amššu lli‑igan lḥqq n‑lḥakm, ašku ssnġ is‑ra‑iẓẓay f‑mddn.

¹⁹ wa rbbi‑nu, swangm‑d kullu maylli skrġ f‑mddn‑ad, trḍut flla.